राजनीति

कांग्रेसको १५ औं महाधिवेशनः कर्णालीबाट केन्द्रीय सदस्यमा प्रेमबहादुर शाहीको उम्मेदवारी

न्यूज २४ दैनिक

बुधबार, असोज २१, २०८३ ०८:२०

कांग्रेसको १५ औं महाधिवेशनः कर्णालीबाट केन्द्रीय सदस्यमा प्रेमबहादुर शाहीको उम्मेदवारी

काठमाडौँ । नेपाली कांग्रेसको १५ औँ महाधिवेशनमा कर्णाली प्रदेश भूगोलतर्फबाट केन्द्रीय सदस्य पदका लागि प्रेमबहादुर शाहीले उम्मेदवारी दर्ता गरेका छन्।

दैलेखलाई राजनीतिक आधार बनाएका शाहीले विद्यार्थी राजनीतिबाट आफ्नो राजनीतिक यात्रा सुरू गरेका हुन्। उनले नेपाल विद्यार्थी संघ हुँदै नेपाल तरूण दलको केन्द्रीय समितिमा रहेर काम गरेको अनुभव छ।

शाहीले विद्यार्थी तथा तरूण संगठनमा हासिल गरेको अनुभवलाई पार्टीको केन्द्रीय तहमा उपयोग गर्ने उद्देश्यले उम्मेदवारी दिएको बताएका छन् ।

उनले युवाका मुद्दा, रोजगारी, उद्यमशीलता, प्रविधि, सुशासन तथा समसामयिक राजनीतिक विषयलाई कांग्रेसको बहसमा प्राथमिकता दिनुपर्ने धारणा राखेका छन्।

युवा पुस्ताको पार्टीमा अर्थपूर्ण सहभागिता, पुस्तान्तरण र संगठनलाई समयअनुकूल बनाउने विषयलाई पनि उनले आफ्नो राजनीतिक एजेन्डासँग जोड्दै आएका छन्।

कर्णालीका भौगोलिक विकटता, रोजगारीको कमी, युवा पलायन, शिक्षा, स्वास्थ्य, पूर्वाधार तथा उत्पादनमुखी अर्थतन्त्रका सवाललाई राष्ट्रिय राजनीतिक बहससँग जोड्नुपर्ने शाहीको भनाइ छ।

उनले कर्णालीको आवाजलाई नेपाली कांग्रेसको राष्ट्रिय नीति र राजनीतिक दृष्टिकोणसँग जोडेर अघि बढ्ने बताएका छन्।

विद्यार्थी राजनीतिदेखि तरुण दलको केन्द्रीय जिम्मेवारी सम्मको अनुभवलाई अब पार्टीको केन्द्रीय समितिमा लैजाने उद्देश्यसहित आफ्नो उम्मेदवारी अघि सारेको उनको भनाइ छ।

प्रकाशित मिति: बुधबार, असोज २१, २०८३ ०८:२०

प्रतिक्रिया दिनुहोस्