पाँच दिनपछि बाटो खुल्यो, अवस्था भोकमरीको

गोरखा । बूढीगण्डकी बाढीले अवरुद्ध बाटो आंशिक रूपमा खुलेपछि धार्चे–२ केरौंजा र रुन्चेतका बासिन्दा गन्तव्यतर्फ जान थालेका छन् । बाढीले बाटो र पुल बगाएपछि पाँच दिनदेखि आउजाउ अवरुद्ध थियो । उक्त बाटो बिहीबारदेखि आंशिक रूपमा सञ्चालनमा आएको धार्चे गाउँपालिकाका अध्यक्ष लक्ष्मण गुरुङले जानकारी दिए । 
गत आइतबार आएको बाढीले धार्चेको खानीबेंसी, माछाखोला, खोर्लाबेंसी र दोभानको झोलुंगे पुल र बेलिब्रिज बगाएको थियो । आवागमन रोकिएपछि उत्तरी गोरखाका विभिन्न गाउँमा भोकमरीको अवस्था आएको छ । गाउँपालिकाको आह्वानमा करिब ५० जना स्थानीय युवाले लगातार तीन दिन काम गरेपछि बाटो आंशिक रूपमा सञ्चालनमा आएको अध्यक्ष गुरुङले बताए । ‘मंगलबार, बुधबार र आज केरौंजा, केरौंजाबेंसी र रुन्चेत गाउँका ४०–५० जना मिलेर बाढीले ल्याएको लेदो फ्याँक्ने, ठाउँठाउँमा मुढा तेस्र्याउने, भ¥याङ हाल्ने गरेर अलि अलि हिँड्न मिल्ने बनाएका छौं,’ उनले भने, ‘बाटो खुलेपछि रोकिएर रहेका सयजना जति भ¥याङ र डोरीको सहायताले गाउँमा पुगेका छन् । अरू पनि आउने क्रममा छन् ।’ बाटो मर्मत जारी रहेको उनले बताए । 
केरौंजाबेंसीका ज्याला मजदुरी गरेर खाने स्थानीयलाई बाटो अवरुद्ध हुँदा खाद्यान्न अभाव हुने अवस्था आएको छ । अध्यक्ष गुरुङका अनुसार स्थानीयले मर्मत गरेको बाटोमा मान्छे जसोतसो हिँड्न मिल्ने भए पनि भारी उतार्न र खच्चड हिँडाउन भने सम्भव छैन । 
‘केरौंजा, केरौंजाबेंसी, लामाबेंसी र रुन्चेतका करिब ६०० परिवारमा खाद्यान्न ढुवानी गर्ने एउटै माध्यम खच्चड हो । अझै केही दिन ढुवानी नगर्ने हो भने त्यहाँ खाद्यान्न अभाव हुन्छ,’ उनले भने, ‘खाद्यान्न कहाँबाट लैजाने ? कसरी लैजाने ? दिनभरि मजदुरी गरेर साँझबिहान छाक टार्नेहरूले अब कसरी हात मुख जोड्ने ? भन्ने समस्या छ ।’ 
धार्चे–२ केरौंजातर्फ जाने बाटो आंशिक रूपमा खुले पनि वडा नं १ र ३ तथा चुमनुब्री गाउँपालिकातर्फ जाने बाटो भने अझै खुलाउन नसकिएको अध्यक्ष गुरुङले बताए । जसले गर्दा चाडबाडको समयमा मानिस हिँडडुल गर्न पाएका छैनन् । बाढीबाट प्रभावित धार्चे गाउँपालिकाको विभिन्न बस्तीमा मात्रै तत्कालका लागि अभाव टार्न एक हजार २०० बोरा चामल आवश्यक पर्ने पालिका अध्यक्ष गुरुङले बताए ।