काठमाडौंमा भारतको स्वतन्त्रता दिवस : शैक्षिक सहयोग र वीर परिवारको सम्मान

काठमाडौं, ३० साउन - भारतको ७९औं स्वतन्त्रता दिवसको अवसरमा काठमाडौंस्थित भारतीय दूतावासमा आज विशेष कार्यक्रम सम्पन्न भएको छ ।

भारतीय राजदूतले झण्डोत्तोलन गर्दै उद्घाटन गरेको समारोहमा राष्ट्रपति द्रौपदी मुर्मुको राष्ट्रका नामको सम्बोधन प्रसारण गरिएको थियो, जसमा विगत ७८ वर्षको उपलब्धि र भावी योजनाबारे चर्चा गरियो ।

कार्यक्रममा राजदूतले भारतीय सशस्त्र बलका दिवंगत सदस्यका परिवारलाई ६.४ करोड भारतीय रुपैयाँ बराबरको एजीआईएफ चेक हस्तान्तरण गर्दै सम्मान गरे । साथै, नेपालका सातै प्रदेश र २१ जिल्लाका ३९ विद्यालय तथा पुस्तकालयलाई पुस्तक अनुदानको घोषणा गर्दै शिक्षा क्षेत्रमा पहुँच वृद्धि गर्ने प्रतिवद्धता व्यक्त गरियो ।

समारोहमा अतिथि, भारतीय समुदाय, दूतावासका अधिकारी तथा परिवारहरूको सहभागिता थियो । स्वामी विवेकानन्द सांस्कृतिक केन्द्र र केन्द्रीय विद्यालयका विद्यार्थीहरूले देशभक्तिपूर्ण गीत र सांस्कृतिक प्रस्तुति दिँदै उत्सवलाई जीवन्त बनाएका थिए ।