सुकुम्बासी बस्तीमा महानगरले डोजर चलायो 

काठमाडौं, ३० साउन - मनोहरा खोला किनार रहेको सुकुम्बासी बस्तीमा काठमाडौं महानगरपालिकाले शुक्रबार डोजर लगाएर घर टहरा भत्काएको छ । कामपाको टोलीले बिहान ११ बजे घर भत्काउन थालेपछि स्थानीय आक्रोशित भए । बस्तीवासीले नगर प्रहरीमाथि ढुंगामुढा गरे ।

झडपमा तीन प्रहरी घाइते भएका छन् । बस्तीवासीले पूर्वसूचना नदिएको र घरका सामान निकाल्न पनि समय नदिइएको बताएका छन् । महानगर प्रहरी प्रमुख राजु पाण्डेले अवैध संरचना हटाउन २-३ महिनादेखि बारम्बार सूचना दिइएको दाबी गरेका छन् । उनका अनुसार यो क्षेत्र मनोहरा जग्गा एकीकरण आयोजना अन्तर्गतको सार्वजनिक जग्गा हो, जहाँ बिचौलियाले अवैध कब्जा गरेर घर बसेका छन् ।

घटनाको मुख्य कारण भनेको बिचौलियाद्वारा सस्तोमा जग्गा बिक्री गरी बस्ती बसाल्न दिइएको विवाद हो । बस्तीवासीले बिचौलियाले लालपुर्जा दिने वाचा गरेर जग्गा बेचेर अहिले आफूहरूलाई घरबारविहीन बनाएको गुनासो गरेका छन् ।

महानगरले भत्काइएका ३० भन्दा बढी संरचनाहरू नयाँ र अवैध रहेको जनाएको छ । आयोजनाका कानुन अधिकृत मनोज भेटुवालले बिचौलियाविरुद्ध कारबाही गर्ने र जग्गा असली मालिकलाई फिर्ता गर्ने योजना रहेको बताएका छन् ।

झडपपछि बस्तीवासीले सम्बन्धित समितिहरू खोजी गर्दै दोषी बिचौलियामाथि कारबाहीको माग गरेका छन् । घर भत्काएका सामान असरल्ल भएका परिवारहरूको बिजोग छ । जग्गा अवैध कब्जा गरेर बनाइएका संरचना भत्काउने कामलाई निरन्तरता दिने संकेत कामपाले दिएको छ ।