भिसा लिडरशिप कन्क्लेभमा विभिन्न बैंकलाई अवार्ड

काठमाडौं (संवाददाता)– विश्वप्रसिद्ध भुक्तानी सेवा प्रदायक भिसा इन्टरनेशनलले नेपालको डिजिटल भुक्तानी इकोसिस्टमलाई अगाडि बढाउने प्रतिबद्धता जनाउँदै आयोजना गरेको ‘भिसा लिडरशिप कन्क्लेभ, २०२५’मा विभिन्न बैंकहरुलाई सम्मान गरेको छ । गत बुधबार काठमाडौंको मेरियट होटलमा आयोजित कार्यक्रममा विभन्नि २० वटा श्रेणीमा १३ विजेतालाई सम्मान गरेको हो । 

उपभोक्ता डेबिट र क्रेडिट कार्ड, प्रिपेड कार्ड, व्यवसाय प्राप्त गर्ने, सीमापार भुक्तानी, सम्पर्करहित समाधान, व्यावसायिक कार्ड, फिनटेक साझेदारी, उत्पादन नवप्रवर्तन र व्यापारी उत्कृष्टता विधामा विभिन्न बैंकलाई सम्मान गरेको हो । 

नबिल बैंकलाई तीन अवार्ड
नबिल बैंकले भिसा इन्टरनेशनलद्वारा प्रदान गरिने तीन वटा अवार्ड जितेको छ । बैंकले यस वर्ष एक्सिलेन्स इन कन्जुमर डेविट कार्डस्  बिजनेस प्रिन्सिपल क्लाइन्ट, एक्सिलेन्स इन कन्ट्याकलेस–इसुइङ र एक्सिलेन्स इन इ–कमर्श एक्वायरिङ बिजनेस प्रिन्सिपल क्लाइन्ट विधामा अवार्ड जितेकोे हो । 

काठमाडौंस्थित मेरियट होटलमा आयोजित एक कार्यक्रममा अवार्ड प्रदान गरिएको बैंकले जनाएको छ । 

अवार्ड ग्रहणपछि नबिल बैंकका नायब प्रमुख कार्यकारी अधिकृत आदर्श बजगाईंले आफूहरुलाई थप ऊर्जा प्रदान गरेको बताए । उनले उक्त उपलब्धिको श्रेय बैंकका कार्डवाहक ग्राहक, व्यवसायी तथा कर्मचारीलाई जाने बताए । 

भिसा इन्टरनेशनल कार्डप्रदायक कम्पनी हो । भिसाले नेपालमा वार्षिक रुपमा भिसा लिडरसिप कन्क्लेभ आयोजना गर्दै आएको छ । नेपालका बैंक तथा वित्तीय संस्था, फिनटेक, इ– कमर्स, व्यापार व्यवसायमा भिसा कार्डको प्रयोग हुँदै आएको छ ।

नबिल बैंक नेपालको एक अग्रणी बैंक हो । नबिलले २५ लाखभन्दा बढी सेवाग्राहीलाई देशभरिको २६८ शाखा र ३२१ एटीएममार्फत सेवा प्रदान गर्दै आएको छ । विगत चार दशकदेखि नबिल बैंकले नेपाली बैंकिङ क्षेत्रमा नवीनतम सेवाको सुरुवात गर्न अग्रणी भूमिका खेल्नुका साथै नेपालको बैंकिङ विकासको इतिहासमा कोसेढुंगाको रुपमा काम गर्दै आएको छ । 

एनएमबिलाई कमर्सियल कार्ड बिजनेस अवार्ड
एनएमबि बैंकले भिसा इन्टरनेशनलबाट ‘एक्सिलेन्स इन कमर्सियल कार्डस बिजनेस’ अवार्ड प्राप्त गरेको छ । 

बैंकले व्यावसायिक कार्ड क्षेत्रमा गरेको उत्कृष्ट प्रदर्शन र डिजिटल भुक्तानीलाई अगाडि बडाउनमा गरेको महत्वपूर्ण योगदानको सम्मानस्वरूप यो अवार्ड प्राप्त गरेको हो ।

एनएमबि बैंकले हाल देशभर २०२ वटा शाखा, १८४ वटा एटिएम र ९ वटा एक्सटेन्सन काउन्टरहरू मार्फत आफ्ना ग्राहकहरूलाई उच्चस्तरीय सेवा प्रदान गर्दै आइरहेको छ ।

सिद्धार्थ बैंकलाई पनि तीन अवार्ड
विश्वप्रसिद्ध भुक्तानी सेवा प्रदायक संस्था भिसा इन्टरनेशनलसँग एसोसिएट क्लाइन्टको रुपमा साझेदारी गर्दै आएको सिद्धार्थ बैंकले विभिन्न तीन विधामा अवार्ड प्राप्त गरेको छ । 

डिजिटल भुक्तानी सेवामा देखाएको उत्कृष्ट प्रदर्शन, व्यावसायिक साझेदारीप्रतिको प्रतिबद्धता र ग्राहक केन्द्रित सेवाको मूल्यांकनको आधारमा अवार्ड प्राप्त गरेको बैंकले जनाएको छ । बुधबार काठमाडौंमा आयोजित भिसा लिडर्सिप कनक्लेभको अवसरमा बैंकले सो पुरस्कार प्राप्त गरेको हो ।

बैंकको डिजिटल भुक्तानी सेवा, कार्ड व्यवसाय एवं व्यावसायिक साझेदारीमा देखाएको उत्कृष्ट प्रदर्शनका आधारमा ग्राहक क्रेडिट कार्ड, प्रिपेड कार्ड र पस एक्वाइरिङमा उतकृष्ट प्रदर्शन गरेबापत पुरस्कार प्राप्त गरेको हो । 

ग्राहकलाई सुरक्षित, छरितो तथा आधुनिक डिजिटल बैंकिङ सेवा प्रदान गर्ने उद्देश्य अनुरूप सिद्धार्थ बैंकले क्रेडिट कार्ड, प्रिपेड कार्ड तथा पिओएस सेवामा उल्लेखनीयरूपमा बजार बिस्तार गर्दै आएको छ । यो उपलब्धीले बैंकको सेवा गुणस्तर, प्रविधिमैत्री नीति तथा बजारमा बढ्दो विश्वासलाई पुष्टि गरेको बैंकले जनाएको छ ।

२०८२ असार मसान्तसम्म बैंकहरूले तीन लाख १८ हजार क्रेडिक कार्ड जारी गरेकोमा सिद्धार्थ बैंकले मात्रै ६० हजार वितरण गरेको छ । क्रेडिट कार्ड जारी हुनुमा बैंकको बजार हिस्सा १९ प्रतिशत र कारोबार हिस्सा १५ प्रतिशत रहेको छ । 

यस्तै २०८२ असार मसान्तसम्म बैंकहरूले २ लाख ५० हजार प्रिपेड कार्ड जारी गरेकोमा सिद्धार्थ बैंकको मात्रै ३४ हजार छ । यस्तै एक करोड २५ लाख पस कारोबार भएकोमा सिद्धार्थ बैंकबाट मात्रै ९ लाख ३६ हजार कारोबार भएको छ ।