खाल्डाखुल्डीरहित सडक अभियान

सडक डिभिजन कार्यालय काठमाडौंको सहरी सडक खाल्डाखुल्डीरहित बनाउने विशेष अभियानअन्तर्गत खटिएका प्राविधिक कर्मचारी । चक्रपथभित्रका सडक मर्मत सकेपछि कार्यालयले अब चक्रपथबाहिरका सडक सुधारतर्फ ध्यान केन्द्रित गरेको जनाएको छ । नियमित मर्मतसँगै तत्कालै खाल्डो पुर्ने उद्देश्यले ‘सडक पोटहोल मर्मत एम्बुलेन्स’ सेवा सञ्चालनमा ल्याइएपछि मर्मत कार्य तीव्र बनेको छ ।

अभियानअन्तर्गत गत बिहीबार भौतिक पूर्वाधार तथा यातायात मन्त्री कुलमान घिसिङले काठमाडौं सडक डिभिजन कार्यालयमा पोटहोल मर्मत एम्बुलेन्स र ‘रोड मेन्टिनेन्स साइट रेस्क्यु’ (आरएमएसआर) नामक मोबाइल एप सार्वजनिक गरेका थिए । डिभिजनका इञ्जिनियर रामचन्द्र फुयाँलका अनुसार एम्बुलेन्समार्फत ४७२ किलोमिटर सडक पूर्ण रूपमा खाल्डाखुल्डीरहित बनाउने लक्ष्य छ । यो सेवा वर्षभरि २४ घण्टा सञ्चालन हुनेछ र वर्तमान प्रणालीले आकस्मिक अवस्थामासमेत तुरुन्तै मर्मत गर्न सक्ने क्षमता राख्छ । उनका अनुसार अत्यधिक सवारी चापका कारण अधिकांश मर्मतकार्य रातिको समयमै हुनेछन् । दिनमा अत्यावश्यक ठाउँमा मर्मत हुन्छ, तर मुख्य काम रातमै अघि बढाइने उनले बताए । स्वचालित रूपमा सञ्चालन हुने एम्बुलेन्समा ५० डिग्रीसम्म तापक्रममा इमल्सन तताउने, स्प्रे गर्ने, खाल्डो काट्ने, हावा–पानीले सफा गर्नेजस्ता सम्पूर्ण उपकरण समावेश छन् ।

सडक मर्मतलाई अझ प्रभावकारी बनाउन डिभिजनले सञ्चालनमा ल्याएको मोबाइल एपबाट मर्मत आवश्यक स्थानको विवरण संकलन गरिन्छ । तर हाल सर्वसाधारणले एपमार्फत फोटो पठाएर सूचना दिन नसक्ने र डिभिजनका २४ घण्टा खटिने कर्मचारी टोलीले नै खाल्डो पहिचान गर्ने फुयाँलले जानकारी दिए । एम्बुलेन्ससँगै तालिमप्राप्त प्राविधिक टोली खाल्डो देखिने स्थानमा पुगेर छिटोछरितो रूपमा मर्मत गर्न सक्नेछ । भीडभाड वा आकस्मिक अवस्थामासमेत यो प्रविधिले तत्काल सडक संरचना सुधार गर्न मद्दत गर्ने मन्त्रालयको विश्वास छ । काठमाडौंलाई ‘नमूना परियोजना’ मानेर सुरु गरिएको पोटहोल–फ्री अभियान सफल भएमा अन्य सडक डिभिजनहरूमा पनि यस अवधारणा विस्तार गर्ने योजना छ । तस्बिर : नेपाल फोटो लाइब्रेरी