करेन्ट नुडल्सको उत्पादन प्लान्टमा सोलार

कपिलवस्तु – नेपालको नुडल्स र स्न्याक्स उद्योगको अग्रणी कम्पनी यशोदा फुड्सले हरित ऊर्जा प्रवद्र्धनमा नयाँ अध्याय थप्दै आफ्नो चन्द्रौटा, कपिलवस्तुस्थित उत्पादन प्लान्टमा ८६५ केडब्ल्यूपी सौर्य पीभी रूफ–टप प्रणाली जडान गरेको छ । २३ नोभेम्बर २०२५ देखि यो प्रणालीले स्वच्छ र हरित सौर्य ऊर्जा मार्फत बिजुली उत्पादन गर्न सुरु गरेको हो । यससँगै यशोदा फुड्स नेपालमा सौर्य ऊर्जा आधारित नुडल्स उत्पादन गर्ने पहिलो उद्योग बनेको छ ।

यशोदा फुड्सले आफ्नो कारखानामा सौर्य ऊर्जा प्रयोग गर्ने ‘नेपालकै पहिलो ग्रिन नुडल्स म्यानुफ्याक्चरिंग फेसिलिटी’ को उपमा पनि प्राप्त गरेको छ । यस सौर्य प्रणालीको जडानसँगै, कम्पनीले कपिलवस्तु औद्योगिक करिडोरमा छानामाथि सौर्य ऊर्जा प्रयोग गर्ने पहिलो उद्योग बन्ने उपलब्धि हासिल गरेको छ । यस परियोजनाबाट औद्योगिक आवश्यकता पूर्ति गर्न ८० प्रतिशत बिजुली बचत हुने अनुमान गरिएको छ भने विद्युत खर्च ६५ प्रतिशतले घट्नेछ । यस परियोजनाले कार्बन उत्सर्जनमा उल्लेखनीय कमी ल्याउने अपेक्षा गरिएको छ ।

परियोजनालाई नेपालका प्रमुख स्मार्ट सौर्य समाधान प्रदायक प्राइम रिन्यूएबल्स प्रालिले निर्माण गरेको हो । परियोजनाको वित्तीय सहयोग एनएमबी बैंक लिमिटेडले उपलब्ध गराएको थियो, भने जर्मन ग्रान्ट डीकेटीआई परियोजना अन्तर्गत वैकल्पिक ऊर्जा प्रवद्र्धन केन्द्र (एईपीसी)ले व्याज अनुदान सहित सहयोग प्रदान गरेको हो ।

सौर्य प्रणालीको उद्घाटन समारोहमा बोल्दै यशोदा फुड्सका ग्लोबल एक्जिक्युटिभ डाइरेक्टर जीपी साहले भने, ‘हामीलाई गर्व छ कि हामी नेपालकै पहिलो सौर्य प्रणालीसँग चलिरहेको नुडल्स प्लान्टको निर्माणमा अग्रसर भएको छौं । एईपीसीका कार्यक्रम प्रमुख सन्तोष राईले भने, ‘यस प्रकारका पहलहरूले नेपाली उद्योगलाई हरित ऊर्जा अपनाउन प्रेरित गर्नेछन् र नेपालका अन्य उद्योगहरूलाई पनि सौर्य ऊर्जा प्रयोग गर्न प्रोत्साहित गर्नेछन् ।’

प्राइम रिन्यूएबल्सका अध्यक्ष आशिष गर्गले भने, ‘यस परियोजनामा उच्च कार्यक्षमताका बाइफेसियल सोलार प्यानल र एआई सक्षम स्मार्ट इनभर्टरको प्रयोग गरिएका छन् । यसलाई सफलतापूर्वक पूरा गर्न पाउँदा हामी अत्यन्त खुसी छौं ।’