६ महिनामा ९ गैंडाको मृत्यु

चितवन । चितवन राष्ट्रिय निकुञ्ज र आसपासका क्षेत्रमा साउनयता नौ वटा गैंडा मरेका छन् । निकुञ्ज क्षेत्र र मध्यवर्ती सामुदायिक वन क्षेत्र एवं आसपासमा गैंडा मरेको निकुञ्जका सूचना अधिकारी अविनास थापा मगरले जनाए । उनका अनुसार साउनयता पाँच वटा भाले र तीन वटा पोथी गैंडा मरेका हुन् । एउटाको लिंग पहिचान हुन सकेको थिएन । मरेका गैडामध्ये एउटा विद्युतीय करेन्टका कारण हो भने अन्य सबैको प्राकृतिक कारणले मृत्यु भएको हो ।

पछिल्लो पटक पुस २२ गते कुमरोज मध्यवर्ती सामुदायिक वनमा अन्दाजी ३५ वर्षको भाले गैंडा मृत भेटिएको थियो । ‘सो गैंडा जुधेर मरेको अनुमान गरिएको छ । गैंडाको खाग, खुर सुरक्षित अवस्थामा थियो,’ उनले भने । हरेक वर्ष विभिन्न कारणले गैंडा मर्ने गर्छन् । प्राकृतिक कारण बाहेक विद्युतीय करेन्ट, एक आपसमा जुध्दा, दलदलमा फस्दा पनि गैंडा मर्ने गरेका छन् । पछिल्लो गणनाअनुसार निकुञ्जमा ६९४ वटा गैंडा रहेका छन् ।