समृद्धि स्कूललाई डीएभी अन्तरकलेज फुटसलको उपाधि

काठमाडौं । डीएभी कलेजको आयोजनामा सम्पन्न सातौं डीएभी अन्तरकलेज फुटसल प्रतियोगिताको उपाधि समृद्धि स्कूलले हात पारेको छ । तीन दिनसम्म सञ्चालन भएको प्रतियोगितामा ४० वटा कलेजलाई पछि पार्दै समृद्धि स्कूलले उपाधिसहित नगद पुरस्कार, ट्रफी र प्रमाणपत्र जित्न सफल भएको हो ।              

खेलकुदका माध्यमबाट विद्यार्थीमा अनुशासनको विकास तथा प्रतिभाशाली फुटबल खेलाडी उत्पादन गर्ने उद्देश्यले आयोजना गरिएको उक्त प्रतियोगिता माघ १६ गतदेखि डीएभी कलेजको आफ्नै फुटसल मैदानमा भव्यरूपमा शुभारम्भ गरिएको थियो । प्रतियोगिताको उद्घाटन केडिया फाउन्डेसनका अध्यक्ष अनिल केडिया, हिसान केन्द्रका वरिष्ठ उपाध्यक्ष डा. स्वागत श्रेष्ठ तथा डीएभी कलेजका प्रिन्सिपल तथा हिसान केन्द्रीय सदस्य सुमन बस्नेतले संयुक्तरूपमा गरेका थिए ।                

उद्घाटन समारोहमा शिव शक्ति एडु मार्ट प्रालिका संस्थापक महेश गिरहिया तथा सुमेरु सिटी हस्पिटलका प्रतिनिधिहरूको समेत उपस्थिति रहेको थियो । फाइनल खेलमा उत्कृष्ट प्रदर्शन गर्दै विजेता बनेको समृद्धि स्कूलले नगद ३ लाख रुपैयाँ, ट्रफी र प्रमाणपत्र प्राप्त गरेको छ । प्रतियोगितामा हेराल्ड कलेज उपविजेता बनेको छ । उपविजेता बनेको हेराल्ड कलेज ले २ लाख रुपैयाँ नगद पुरस्कार, ट्रफी र प्रमाणपत्र प्राप्त गरेको छ ।                    

त्यस्तै, व्यक्तिगत विधातर्फ समृद्धि स्कूलका कप्तान बोगटी उत्कृष्ट खेलाडी घोषित भए भने हेराल्ड कलेजका निराजन मगर उत्कृष्ट गोलरक्षक र एआइटीएम कलेजका सुशन बलामी उच्च गोलकर्ता घोषित भए । उनीहरूलाई जनही १५ हजार रुपैयाँ, व्यक्तिगत ट्रफी तथा प्रमाणपत्र प्रदान गरिएको छ ।पुरस्कार वितरण समारोहमा केडिया फाउन्डेसनका अध्यक्ष अनिल केडिया, कलेजका प्रिन्सिपल सुमन बस्नेत तथा शिव शक्ति एडु मार्ट प्रालिका संस्थापक महेश गिरहियाले विजेता तथा उपविजेता टिमलाई संयुक्तरूपमा पुरस्कार प्रदान गरेका थिए ।                

कलेजका प्रिन्सिपल बस्नेतले उक्त प्रतियोगिता प्लस टु तहकै सबैभन्दा ठूलो धनराशि पुरस्कार भएको दाबी गर्दै आगामी दिनमा यसलाई अझ व्यवस्थित र व्यापक बनाउँदै लैजाने प्रतिबद्धता जनाए ।