साफ यू–२० च्याम्पियनशिपको आयो तालिका

माल्दिभ्समा आयोजना हुने साफ यू–२० च्याम्पियनशिप फुटबलमा नेपालले पहिलो खेल भुटानसँग खेल्ने भएको छ ।

आयोजक दक्षिण एसियाली फुटबल महासंघले सार्वजनिक गरेको खेल तालिकाअनुसार मार्च २३ देखि अप्रिल ४ सम्म हुने प्रतियोगितामा सहभागी टोलीलाई दुई समूहमा विभाजना गरिएको छ । जसमा नेपाल समूह ‘ए’ मा परेको छ ।

उक्त समूहमा आयोजक माल्दिभ्ससँगै भुटान र श्रीलंका छन् । प्रतियोगिताको समूह ‘बी’मा साबिक विजेता भारत, बंगलादेश र पाकिस्तान छन् । नेपालले आफ्नो उद्घाटन खेलमा भुटानको सामना गर्नेछ भने दोस्रो खेल मार्च २५ मा श्रीलंकासँग खेल्नेछ । समूह चरणको नेपालको अन्तिम खेल २७ मार्चमा माल्दिभ्ससँग हुनेछ ।

सिंगल राउन्ड रोविन लिगपछि प्रत्येक समूहबाट शीर्ष दुई टोलीले सेमिफाइनलमा स्थान बनाउनेछन् । उक्त च्यापियनशिपको लागि अखिल नेपाल फुटबल संघ (एन्फा)ले पहिलो चरणमा ८० खेलाडी छनोट गरेको छ ।