साइकलयात्री महोत्तरीमा

विश्व शान्ति र समृद्ध नेपालको नारासाथ साइकल यात्रा थालेका यात्री मंगलबार महोत्तरीको बर्दिबास पुगेका छन् । मेचीबाट महाकालीसम्मको यात्रा गत आइतबारबाट थालेका सातजना साइकलयात्री तेस्रो दिन बर्दिबास आइपुगेका हुन् ।          

विश्व शान्ति र भातृत्व, स्वास्थ्य सचेतना र समृद्ध नेपालको कामनासहत यात्रा गरेको टोलीका अगुवा कीर्तिपुरका ४० वर्षीय कवि महर्जनले बताए । वर्ल्डसाइकल टुर क्याम्पियन नेपाल संस्थामा आबद्ध यात्रीले आसन्न प्रतिनिधिसभा निर्वाचनबाट मुलुकले राजनीतिक स्थायित्व र समृद्धिको बाटोमा अघि बढोस् भन्ने बाटोमा भेटिएका आम सर्वसाधारणको धारणा पाइएको बताएका छन् । आफूहरू आबद्ध संस्थाको १०औं वर्षगाँठको अवसर पारेर यसपालि नेपाल यात्रा थालिएको महर्जनको भनाइ छ । यात्रामा महर्जनसँगै ६ जना ललितपुरका छन् । टोलीमा रवीन्द्र बज्राचार्य, सरिता महर्जन, विकास शाक्य, निरु बज्राचार्य, भरत शाक्य र मञ्जु शाक्यको सहभागिता छ । पूर्वपश्चिम राजमार्ग आसपासका पर्यटकीय स्थलको अवलोकन गर्दै १५ दिनभित्र महाकाली पुग्ने लक्ष्य छ ।