खेलकुद

एसियन छनोटः मलेसियामाथि सानदार जित निकाल्दै नेपाल सेमिफाइनल प्रवेश

न्यूज २४ दैनिक

बिहीबार, जेठ २१, २०८३ १७:४५

एसियन छनोटः मलेसियामाथि सानदार जित निकाल्दै नेपाल सेमिफाइनल प्रवेश

काठमाडौं । एसियन गेम्स छनोटअन्तर्गतको खेलमा नेपालले मलेसियालाई १६७ रनले पराजित गरेको छ।

मलेसियालाई हराएसँगै नेपाल समूह एको विजेताको रूपमा सेमिफाइनल खेल्ने छ। एक खेल अगाडि नै मलेसियाले चीनलाई हराएपछि मलेसिया र नेपाल दुवै टिम एसियन गेम्समा छनोट भइसकेका थिए।

सिंगापुर नेसनल ग्राउन्डमा टस हारेर पहिला ब्याटिङ गरेको नेपालले निर्धारित २० ओभरमा ७ विकेट गुमाउँदै २७५ रन बनाएको थियो। नेपालले दिएको २७६ रनको विजयी लक्ष्य पछ्याएको मलेसियाले निर्धारित २० ओभरमा ९ विकेट गुमाउँदै १०८ रनमात्रै बनाउन सक्यो।

मलेसियाको लागि कप्तान साइद अजिजले सर्वाधिक ५४ रन बनाए। उनले ४५ बलमा ६ चौका र २ छक्का प्रहार गरे। ओपनर मोहम्मद हकिज एमनले १३ रन बनाउँदा सर्भिन मुनियान्दीले १८ रन बनाए। अन्य कुनै पनि ब्याटरले दोहोरो अंकमा रन बनाउन सकेनन्।

नेपालका लागि शेर मल्लले सर्वाधिक ३ विकेट लिए। करण केसी, सोमपाल कामी, सन्दीप लामिछाने, दिपेन्द्र सिंह ऐरी र कुशल मल्लले १-१ विकेट लिए।
त्यसअघि ब्याटिङ गरेको नेपालको लागि ओपनर ब्याटर कुशल भुर्तेलले सर्वाधिक १२६ रन बनाए। उनले ५४ बलमा १४ चौका र ८ छक्का प्रहार गरे। उनले लगातार २ खेलमा शतकीय पारी खलेका हुन्।

ओपनरद्वय कुशल र आसिफ शेखले पहिलो विकेटका लागि १३४ रनको शतकीय साझेदारी गरेका थिए। आसिफ शेखले २४ बलमा ५ चौका र ७ छक्कासहित ६८ रनको पारी खेले। सन्दीप जोराले १५, कप्तान दीपेन्द्र सिंह ऐरीले ३१ रन बनाउँदा लोकेश बमले १० रन बनाए। अन्य ब्याटरले भने दोहोरो अंकमा रन बनाउन सकेनन्।

मलेसियाका लागि बलिङतर्फ विरनदिप सिंहले सर्वाधिक ३ विकेट लिए। सइद अइज र विजय युनीले २-२ विकेट लिए। पहिलो खेलमा नेपालले चीनलाई २२१ रनले हराएको थियो।

प्रकाशित मिति: बिहीबार, जेठ २१, २०८३ १७:४५

प्रतिक्रिया दिनुहोस्