यु–१९ राष्ट्रिय महिला क्रिकेटमा छाइन् सना

सुर्खेत वीरेन्द्रनगरमा यही १९ गतेदेखि जारी १९ वर्ष मुनिका महिला टी–२० राष्ट्रिय क्रिकेट प्रतियोगिताअन्तर्गत आज कोशी प्रदेशका टीका शाह र प्रिन्सा रानामगरको अर्धशतकीय पारी मधेसकी सना परविनले छायाँमा पारिदिएकी छन् ।
    प्रतियोगितामा आफ्नो पहिलो खेल खेल्न कालुङचोक मैदानमा उत्रिएको मधेसले कोशीलाई पराजित गरी जीतको सुरुआत ग–यो । उक्त खेलको पहिलो जीतमा सना एक्लै हावी हुँदा कोशीको पहिलो हारसँगै टीका र प्रिन्साको अर्धशतकसमेत ओझेलमा प–यो ।
    १६ ओभरको तेस्रो बलमा खेल जित्न जम्मा दुई रन चाहिएको बेला ४८ रनमा खेल्दै गरेकी उनले सात चौका प्रहार गर्दै फिनिसरका रूपमा अर्धशतकीय पारीसँगै खेल समापन गरिन् । सनाले नटआउट एक सय छ को स्ट्राइक रेटमा ४९ बलमा ५२ रनको उत्कृष्ट पारी खेल्दै आफ्नो टोलीलाई जित दिलाइन् ।
    अर्को छेउबाट उत्तिकै जिम्मेवारी र संयमतताका साथ सनासँग साझेदारी गरेकी साक्षी यादवले ४६ रनको स्कोरमा खेल्दै गर्दा सिंगल रन लिएर सनाका लागि अर्धशतकीय पारी खेल्ने मौका जुराइन् । 
    एलिशा यादव र शिवानी साह शून्यमै बाहिरिएपछि सनासँग साझेदारी गर्न क्रिजमा उत्रिएकी साक्षीले एक सय १५ को स्ट्राइक रेटमा आठ चौकासहित ४० बलमा ४६ रनको योगदान दिइन् । मधेसका दुवै विकेट शुभेक्षा लिम्बूले आफ्नो नाममा लेखाइन् ।
    यसअघि टस जितेर पहिला ब्याटिङ गरेको कोशीले निर्धारित २० ओभरमा तीन विकेट गुमाएर एक सय २२ रन बनायो । ओपनिङ गर्न आएकी पूर्णिमा राजवंशी खाता नखोलेर फर्किएपछि उनीसँगै ओपनिङमा आएकी टीका शाहले ५१ रन जोडिन् भने तेस्रो क्रममा ब्याटिङमा आएकी प्रिन्सा राना मगरले नटआउट ५५ रन जोड्दै उत्कृष्ट साझेदारी गरिन् ।
अविजित प्रिन्साले ६८ बलमा नौ चौकासहित प्रतियोगिताको पहिलो अर्धशतकीय पारीको रेकर्ड बनाउँदा टीकाले भने ३६ बलमा ११ चौकासहित दोस्रो अर्धशतक पूरा गरिन् । वीरेन्द्रनगर रङ्गशालामा भएको चौथो खेलमा गण्डकीसँग लुम्बिनी पाँच विकेटले पराजित भयो । टस जितेर गण्डकी विरुद्ध पहिला ब्याटिङ गरेको लुम्बिनीले १८.३ ओभरमा अलआउट हुनुअघि १३ अतिरिक्त रनसहित जम्मा ६३ रन बनाउन सफल भयो ।
लुम्बिनीका लागि अञ्जली पाठकले १३ र योजना थापाले १२ रनबाहेक अरु कुनै ब्याटरले दोहोरो आँकडा छुन सकेनन् । लुम्बिनीलाई सस्तैमा समेट्ने क्रममा गण्डकीका कुशुम गोदार र प्लयेर अफ द म्याच बनेकी रचना चौधरीले आठ–आठ रन खर्चिएर समान तीन–तीन विकेट लिए भने रञ्जना साउदको नाममा दुई विकेट हात पर्यो । 
लुम्बिनीबाट पाएको ६३ रनको झिनो लक्ष्य गण्डकीले १२ दशमलव चार बलमा पाँच विकेट गुमाउँदै पूरा ग–यो । पहिलो खेलमा बागमतीलाई सात विकेटले हराउँदै दुई अङ्क जोडेको गण्डकीका लागि अङ्क तालिकामा दोहोरो अङ्क दिलाउने क्रममा ज्योत्सिनीका मरासिनी र दीपिका सापकोटाले समान १६÷१६ रन बनाएर लगातार दोस्रो जित दिलाए । लुम्बिनीका  लागि आशना चौधरी र आयुषा भुसालले समान दुई–दुई र विमिता मगरले एक विकेट हात पारेका थिए ।