१२१ मेगावाट विद्युत राष्ट्रिय प्रसारण प्रणालीबाट बिच्छेद

काठमाडौँ । रसुवागढी र माथिल्लो माई जलविद्युत् केन्द्रको उत्पादन बन्द हुँदा १२१ मेगावाट विद्युत राष्ट्रिय प्रसारण प्रणालीबाट बिच्छेद भएको छ । पुनर्निर्माण तथा मर्मतसम्भारको कामका लागि १११ मेगावाट क्षमताको रसुवागढी र १० मेगावाट क्षमताको माथिल्लो माई जलविद्युत केन्द्रको उत्पादन बन्द गरिँदा यति विद्युत अस्थायी रूपमा प्रसारण प्रणालीबाट बिच्छेद भएको हो । 
रसुवागढी हाइड्रोपावर कम्पनीले प्रवर्धन गरेको रसुवाको गोसाइँकुण्ड गाउँपालिका–टिमुरेस्थित रसुवागढी जलविद्युत् केन्द्र वर्षायाम सुरु हुनुअघि पुनर्निर्माण तथा मर्मतका लागि बन्द गरिएको छ । यो जलविद्युत केन्द्रको उत्पादन २२ दिनसम्म बन्द गरेर मर्मतसम्भार तथा पुनर्निर्माणको काम गर्न लागिएको कम्पनीले जनाएको छ । कम्पनीका अनुसार नेपाल विद्युत् प्राधिकरणले असार १३ सम्म विद्युत उत्पादन बन्द गरेर मर्मतसम्भारको काम गर्न जलविद्युत केन्द्रलाई स्वीकृति दिएको छ । 
गत वर्ष असार २४ गते आएको ठूलो हिमबाढीका कारण जलविद्युत केन्द्रको भौतिक संरचना तथा विद्युतीय उपकरणमा व्यापक क्षति पुग्दा पनि विद्युत उत्पादन लामो समयसम्म बन्द हुन पुगेको थियो ।  चरणबद्ध रूपमा पुनःस्थापना तथा पुनर्निर्माणका काम सम्पन्न गरी अहिले जलविदुत केन्द्रका तीनवटै युनिटबाट उत्पादन सुरु गराइएको थियो ।
यो वर्षको वर्षायाममा पनि कुनै अवरोधबिना पूर्ण क्षमतामा विद्युत उत्पादन सुनिश्चित गर्न एवं बाँकी रहेका संरचनागत तथा प्राविधिक काम सम्पन्न गर्न अहिले उत्पादन रोकेर काम सुरु गरिएको कम्पनीले जनाएको छ । कम्पनीका अनुसार उत्पादन बन्द रहने अवधिमा बाढीबाट प्रभावित संरचनाको पुनर्निर्माण, सुरक्षात्मक पूर्वाधार सुदृढीकरण तथा उपकरणहरूको मर्मत तथा प्रतिस्थापनका काम गरिनेछन् । 
यस्तै, इलामस्थित यता पञ्चकन्या माई हाइड्रोपावर लिमिटेडद्वारा सञ्चालित ९.९८ मेगावाटको माथिल्लो माई जलविद्युत् केन्द्रको उत्पादन पनि प्राविधिक समस्याका कारण बन्द भएको छ । कम्पनीका अनुसार आयोजनाको सुरुङ प्रणालीमा रहेको ‘एक्सपान्सन जोइन्ट’बाट अत्यधिक पानी चुहिएपछि मर्मत सम्भारका लागि विद्युत उत्पादन बन्द गरिएको हो । 
अहिले जलविद्युत केन्द्रको सुरुङ पूर्णरूपमा खाली गराएर समस्याग्रस्त संरचनाको मर्मतसम्भारको काम अगाडि बढाइएको छ । पञ्चकन्या माई हाइड्रोपावरका अपरेसन म्यानेजर भोलानाथ उपाध्यायका अनुसार अहिले जलविद्युत केन्द्रको मर्मत कार्य जारी रहेको र समस्या समाधान भएलगत्तै उत्पादन पुनः सुरु गरिने छ । 
नियमित वर्षा भइरहेकाले यी जलविद्युत केन्द्रको १२१ मेगावाट विद्युत प्रसारण प्रणालीबाट बिच्छेद भए पनि विद्युत आपूर्ति व्यवस्थापनमा कुनै समस्या नभएको नेपाल विद्युत प्राधिकरणले जनाएको छ । रसुवागढी विद्युत प्राधिकरण तथा चिलिमे जलविद्युत कम्पनीअन्तर्गतको सहायक कम्पनीले प्रवर्धन गरेको जलविद्युत केन्द्र हो भने माथिल्लो माई निजी प्रवर्धकले प्रवर्धन गरेको जलविद्युत केन्द्र हो ।