विश्वकप सामाजिक सञ्जालमा पनि

मेक्सिको (एपी)– फुटबलप्रेमी समर्थकहरू र पाँच पटकका विश्व च्याम्पियनको देश ब्राजिलमा यसपटक विश्वकपका सबै १०४ खेल हेर्न चाहने दर्शकहरूले मुख्य रूपमा एक प्रभावशाली डिजिटल सामग्री निर्माता (इन्फ्लुएन्सर) केन्द्रित स्ट्रिमिङ प्लेटफर्ममार्फत पाउनेछन् । अन्य देशहरूमा भने दर्शकहरूले पहिलो पटक युट्युब र टिकटकमा खेलका केही भाग प्रत्यक्ष प्रसारणमार्फत हेर्न पाउनेछन् ।
पहिलेझैं परम्परागत टेलिभिजन च्यानलहरूको विशेष एकाधिकार अब रहने छैन । यसपटक विश्वकप हेर्ने तरिका धेरै फरक हुनेछ । फिफाले नयाँ पुस्ताका समर्थकहरूलाई आकर्षित गर्ने प्रयास गरिरहेको छ । त्यसका लागि उसले डिजिटलमात्रै आधारित प्रसारण प्लेटफर्म भएका साझेदारहरूसँग अहिलेसम्मकै धेरै सम्झौता गरेको बताएको छ । यसबाट युवा दर्शकहरूले फुटबलको सबैभन्दा ठूलो प्रतियोगिता हेर्ने थप विकल्प पाउनेछन् ।
फिफाका अनुसार यी साझेदारीहरू खेल परिवर्तन गर्ने प्रकारका छन् । यसमा सामग्री निर्माता (क्रिएटर) हरूको दृष्टिकोणलाई महŒव दिइनेछ र विश्वभरका प्रयोगकर्ताको अनुभवलाई अझ आकर्षक बनाइनेछ । उद्देश्य भनेको दर्शकहरूको ध्यान खिचेर उनीहरूलाई खेलको स्वाद चखाउनु हो, जसले पछि उनीहरूलाई परम्परागत प्रसारण माध्यममा गएर पूरा खेल हेर्न प्रेरित गर्नेछ ।
अमेरिका, मेक्सिको र क्यानडाले संयुक्त रूपमा आयोजना गरेको यो वर्षको विश्वकप इतिहासकै सबैभन्दा ठूलो हुनेछ, जसमा ४८ टोली सहभागी छन् । प्रतियोगिता बिहीबार सुरु भएर जुलाई १९ सम्म चल्नेछ ।
ब्राजिल सामाजिक सञ्जाल र डिजिटल प्लेटफर्ममा अत्यन्त सक्रिय देशमध्ये एक हो । फिफाले यो कुरा चार वर्षअघि नै महसुस गरेको थियो । त्यसबेला लोकप्रिय स्ट्रिमर कासिमिरो मिगेल, जसलाई ‘काजे’ भनेर चिनिन्छ, युवापुस्ताका खेलप्रेमीलाई आफ्नो ट्विच च्यानलमार्फत आकर्षित गर्न सफल भएका थिए ।
२०२२ को कतार विश्वकपका लागि फिफाले उनी र उनको साझेदार कम्पनी लाइभमोडसँग सम्झौता गरी काजेटिभीको युट्युब च्यानलमार्फत २२ खेल प्रसारण गर्न अनुमति दिएको थियो । परम्परागत प्रसारणभन्दा बढी अनौपचारिक र संवादात्मक शैली, समर्थकहरूसँग प्रत्यक्ष अन्तरक्रिया तथा सामग्री निर्माताहरूलाई कमेन्टेटरको रूपमा सहभागी गराइएकाले यो प्रयोग अत्यन्त सफल मानियो । त्यसको परिणामस्वरूप यस वर्षको विश्वकपका लागि सम्झौता अझ विस्तार गरियो र काजेटिभी ब्राजिलमा सबै १०४ खेल प्रसारण अधिकार पाउने एकमात्र माध्यम बन्यो । दशकौंदेखि ब्राजिलमा फुटबल प्रसारणको प्रमुख नाम रहेको ग्लोबो नेटवर्कले भने ५५ खेल मात्र देखाउनेछ ।
फिफाले भनेको छ, ‘हामी सधैं आफ्ना प्रमुख प्रतियोगिताहरूको प्रसारणलाई अझ राम्रो बनाउने नयाँ उपाय खोजिरहेका हुन्छौं । काजेटिभीसँगको सम्झौता त्यसैको उदाहरण हो । यसले ब्राजिलका समर्थकलाई सबै १०४ खेल हेर्न अवसर दिनेछ र नयाँ दर्शक तथा समुदायसम्म पुग्न पनि मद्दत गर्नेछ ।’
ब्राजिलको लाइभमोड कम्पनी, जसअन्तर्गत काजेटिभी सञ्चालन हुन्छ, जसले गत महिना आफ्नो अन्तर्राष्ट्रिय प्रसारण शाखा सुरु गरेको घोषणा गरेको थियो । साथै, फुटबलका महान खेलाडी क्रिस्टियानो रोनाल्डो पनि कम्पनीका सेयरधनीमध्ये एक रहेको जानकारी दिएको थियो ।
लाइभमोडको पोर्चुगलस्थित च्यानलले विश्वकप अवधिभर प्रत्येक दिन एउटा खेल प्रसारण गर्नेछ । यसमा पोर्चुगलका सबै खेल र फाइनल खेल पनि समावेश हुनेछन् । ४१ वर्षीय रोनाल्डोले राष्ट्रिय टोलीबाट आफ्नो छैटौं विश्वकप खेल्दै छन् ।
लाइभमोडका सहसंस्थापक सर्जियो लोपेसका अनुसार केही दर्शकहरू सुरुदेखि नै डिजिटल माध्यमसँग जोडिएका हुन्छन् । डिजिटल प्लेटफर्मले त्यस्ता नयाँ दर्शकलाई ठूला खेल प्रतियोगितासँग जोड्न मद्दत गर्छ । उनका अनुसार यस्ता दर्शक प्रायः युवा हुन्छन् र उनीहरू केवल खेल हेर्न मात्र चाहँदैनन्, बरु प्रत्यक्ष रूपमा कुराकानीमा सहभागी हुन, प्रतिक्रिया दिन र समुदायको हिस्सा भएको महसुस गर्न चाहन्छन् ।
यसैबीच, फिफाले यस वर्ष टिकटकलाई विश्वकपसम्बन्धी भिडियो सामग्रीका लागि आफ्नो पहिलो प्राथमिक साझेदार प्लेटफर्म बनाएको छ । यसबाट सामग्री निर्माताहरूले विशेष सामग्रीमा पहुँच पाउनेछन् । विश्वकप प्रसारण अधिकार भएका संस्थाहरूले टिकटकमा बनाइएको विशेष केन्द्रमार्फत खेलका केही भाग प्रत्यक्ष देखाउन सक्नेछन् ।
मार्चमा फिफाले युट्युबसँग पनि सम्झौता ग¥यो, जसअनुसार प्रसारण अधिकार भएका संस्थाहरूले खेलका केही दृश्य प्रत्यक्ष रूपमा युट्युबमा देखाउन पाउनेछन् । उनीहरूलाई प्रत्येक खेलको पहिलो १० मिनेटसम्म प्रसारण गर्ने अनुमति दिइनेछ ।
युट्युबकी मनोरञ्जन तथा खेलकुद मार्केटिङ उपाध्यक्ष एन्जेला कोर्टिनले भनिन्, ‘विश्वभरका खेलप्रेमीहरू खेल सुरु हुनुअघि, खेल भइरहेका बेला र खेल सकिएपछि पनि युट्युबमा आउँछन् । त्यसैले फिफासँगको हाम्रो साझेदारी विशेष छ । सामग्री निर्माता समुदायको व्यापक पहुँच, फिफाका प्रसारण साझेदारलाई थप उत्कृष्ट सामग्री युट्युबमा राख्ने अवसर तथा जुलाईमा न्यूयोर्कमा हुने युट्युब फिफा क्रिएटर कपमार्फत हामी आगामी पुस्ताका फुटबल समर्थक तयार गरिरहेका छौं ।’
यी नयाँ सम्झौताहरूका कारण फिफाले २०२६ को विश्वकपले डिजिटल तथा स्ट्रिमिङ दर्शक संख्याका सबै रेकर्ड तोड्ने अपेक्षा गरेको छ ।
२०२२ को कतार विश्वकपमा कुल ५ अर्ब दर्शकको सहभागिता (इन्गेजमेन्ट) भएको फिफाले जनाएको थियो । त्यसमध्ये २ अर्ब ७० करोड डिजिटल तथा स्ट्रिमिङ सेवाबाट र २ अर्ब ९० करोडले परम्परागत टेलिभिजनबाट हेरेका थिए । अर्जेन्टिनाले जितेको फाइनल खेल करिब १ अर्ब ५० करोड मानिसले हेरेका थिए, जसमध्ये २३ करोड ७० लाख दर्शकले केवल डिजिटल माध्यमबाट मात्र हेरेका थिए ।
अमेरिकामा २०२६ विश्वकपको प्रसारण अधिकार फक्ससँग छ । फिफाले त्यहाँ कुनै विशेष डिजिटल प्लेटफर्मलाई अलग सम्झौता दिएको छैन । तर फक्सले आफ्ना एपमार्फत सबै खेल प्रत्यक्ष र मागअनुसार हेर्न सकिने व्यवस्था गर्नेछ ।
यसैबीच, विश्वकै ठूलो स्ट्रिमिङ सेवा नेटफ्लिक्सले २०२७ र २०३१ को महिला विश्वकपको अमेरिकी प्रसारण अधिकार प्राप्त गरिसकेको छ । यो फिफाले कुनै ठूलो प्रतियोगिताका लागि स्ट्रिमिङ सेवासँग गरेको सबैभन्दा महŒवपूर्ण सम्झौतामध्ये एक मानिन्छ ।
लाइभमोडका सहसंस्थापक लोपेसका अनुसार खेलकुदले अब सबै प्रकारका स्क्रिनमा उपस्थित भएर सबै प्रकारका दर्शकसँग जोडिनुपर्छ । उनका अनुसार नयाँ पुस्ताका दर्शकले वास्तविकता, अन्तरक्रिया र खेल पछ्याउने फरक अनुभव खोज्छन् ।