अधिकांश वाणिज्य बैंकले स्थिर राखे ब्याजदर

काठमाडौं । अधिकांश वाणिज्य बैंकले असारका लागि ब्याजदर स्थिर राखेका छन् । सञ्चालनमा रहेका २० मध्ये १३ वाणिज्य बैंकले असारका व्यक्तिगत मुद्दती निक्षेपको पुरानै ब्याजदरलाई निरन्तरता दिएका हुन् । बैंकहरूले सार्वजनिक गरेको नयाँ ब्याजदरअनुसार जेठको तुलनामा असारमा ७ बैंकले व्यक्तिगत मुद्दती निक्षेपमा दिने अधिकतम ब्याजदर घटाएका छन् ।
असारका लागि एनएमबी बैंकले व्यक्तिगत मुद्दती निक्षेपमा ४.८ बाट ४.७५ प्रतिशत ब्याजदर कायम गरेको छ । त्यस्तै, हिमालयनले ४.२५ बाट ४ प्रतिशत, कुमारी बैंकले ३.९६ बाट ३.९१, लक्ष्मी सनराइजले ४.५ बाट ४, एनआईसी एसियाले ४.५ बाट ४, प्राइमले ४.१५ बाट ४ र स्ट्यान्डर्ड चार्टर्डले ४ बाट ३.९५ प्रतिशतमा झारेका छन् ।
बाँकी बैंकले जेठकै ब्याजदरलाई निरन्तरता दिएका छन् । हाल राष्ट्रिय वाणिज्य बैंकले ४.७५ तथा नबिल र प्रभु बैंकले समान ४.५५ प्रतिशत तोकेका छन् । ग्लोबल आईएमई, नेपाल इन्भेस्टमेन्ट मेगा, माछापुच्छ«े र सानिमा बैंकको समान ४.५ प्रतिशत छ । त्यस्तै कृषि विकासले ४.१५, सिटिजन्सले ४.१, एभरेस्टले ४.५, नेपाल एसबीआईले ४.२५, सिद्धार्थले ४.५ र नेपाल बैंकको पनि ब्याजदर स्थिर छ ।
बैंकिङ प्रणालीमा तरलता पर्याप्त रहनु, कर्जाको माग अपेक्षाअनुसार बढ्न नसक्नु तथा निक्षेप संकलनमा तीव्र प्रतिस्पर्धा कम हुँदै जाँदा बैंकहरूले निरन्तर ब्याजदर घटाउँदै लगेका हुन् । पछिल्ला महिनाहरूमा आधारदर (बेस रेट) घट्दै जाँदा बैंकहरूले निक्षेपको लागत कम गर्ने रणनीति अपनाइरहेका छन् ।
असार महिनाको ब्याजदर हेर्दा बैंकहरूबीचको अन्तर पनि निकै साँघुरिएको छ । सबैभन्दा बढी ब्याज दिने बैंकको दर ४.७५ प्रतिशत र सबैभन्दा कम ब्याज दिने बैंकको दर ३.९१ प्रतिशत रहेकाले अधिकतम र न्यूनतम ब्याजदरबीचको अन्तर ०.८४ प्रतिशत बिन्दुमा सीमित भएको छ । निक्षेपको ब्याजदर निरन्तर ओरालो लागिरहँदा बचतकर्ताको प्रतिफल भने खुम्चिँदै गएको छ ।