याडिया केनेस विद्युतीय मोटरसाइकल नेपाली बजारमा सार्वजनिक

काठमाडौ । विश्वकै नम्बर–१ इलेक्ट्रिक दुईपाङ्ग्रे ब्रान्ड याडियाले आफ्नो बहुप्रतिक्षित मोडेल याडिया केनेस नेपालमा आधिकारिक रूपमा सार्वजनिक गरेको छ । नेपालका लागि आधिकारिक वितरक कुजु नेपाल प्रालिले विशेष कार्यक्रम आयोजना गरी केनेसलाई नेपाली बजारमा प्रस्तुत गरेको हो । कार्यक्रममार्फत सार्वजनिक गरिएको केनेसले परम्परागत इलेक्ट्रिक दुईपाङ्ग्रे सवारीभन्दा फरक, उच्च प्रदर्शन, गति, रोमाञ्चक राइडिङ अनुभव तथा आकर्षक भविष्य–उन्मुख डिजाइन सहितको नयाँ अनुभव प्रस्तुत गरेको कम्पनीले जनाएको छ । दैनिक आवतजावतका लागि मात्र केन्द्रित नभई, आधुनिक प्रविधि, शक्तिशाली प्रदर्शन र प्रिमियम राइडिङ अनुभव खोज्ने राइडरहरूलाई लक्षित गर्दै यो मोटरसाइकल विकास गरिएको छ । याडिया केनेसमा ११ किलोवाट क्षमताको उच्च–प्रदर्शनयुक्त मिड–ड्राइभ मोटर जडान गरिएको छ । यो मोटरले ३०० एनएम टर्क उत्पादन गर्छ । यसले तीव्र एक्सेलेरेसन र उत्कृष्ट सडक प्रदर्शन सुनिश्चित गर्ने कम्पनीको दाबी छ । केनेसले ५० किलोमिटर प्रतिघण्टाको गति केवल ३ सेकेन्डमा हासिल गर्न सक्छ भने यसको अधिकतम गति १०० किलोमिटर प्रतिघण्टा रहेको छ । यी विशेषताले यसलाई नेपालकै शक्तिशाली र उच्च–प्रदर्शनयुक्त इलेक्ट्रिक मोटरसाइकलमध्ये एक बनाएको कम्पनीको दाबी छ । नेपालको विविध भौगोलिक अवस्था र उकालो–ओरालो सडकलाई ध्यानमा राखेर डिजाइन गरिएको केनेसले २० डिग्रीसम्मको चढाइ सहजै पार गर्न सक्ने क्षमता राख्छ । जसले कठिन सडकमा पनि स्थिर र भरपर्दो राइडिङ अनुभव प्रदान गर्ने कम्पनीले जनाएको छ । यो मोटरसाइकलमा ४.६ किलोवाट–घण्टा क्षमताको ब्याट्री प्रयोग गरिएको छ । यो ब्याट्रीलाई ४० भन्दा बढी सुरक्षा सुविधासहितको स्मार्ट ब्याट्री व्यवस्थापन प्रणालीले सुरक्षित बनाएको छ । यो प्रणालीले ब्याट्रीको सुरक्षा, तापक्रम नियन्त्रण, दीर्घकालीन टिकाउपन तथा समग्र कार्यक्षमता सुनिश्चित गर्दै भरपर्दो र सहज राइडिङ अनुभव प्रदान गर्छ । अन्तर्राष्ट्रिय स्तरमा प्रतिष्ठित रेड डट डिजाइन अवार्ड प्राप्त गरिसकेको याडिया केनेसले कम्पनीको उत्कृष्ट डिजाइन र आधुनिक विद्युतीय प्रविधिप्रतिको प्रतिबद्धता झल्काउने बताइएको छ । नेपालमा याडिया केनेसको अधिकतम खुद्रा मूल्य ६ लाख ६० हजार रुपैयाँ तोकिएको छ । उत्कृष्ट प्रदर्शन, नवीन प्रविधि र प्रिमियम राइडिङ अनुभव खोज्ने ग्राहकका लागि यो एक आकर्षक विकल्प बन्ने कम्पनीले जनाएको छ । याडिया लगातार नौ वर्षदेखि विश्वकै नम्बर–१ इलेक्ट्रिक दुईपाङ्ग्रे ब्रान्ड रहँदै आएको छ । यो ब्रान्ड १५० भन्दा बढी देशमा सक्रिय रहँदै करोडौँ प्रयोगकर्ताको विश्वास जित्दै आएको छ । याडियाले नेपालमा पनि आफ्नो प्रिमियम ईभी बजारमा उपस्थिति थप सुदृढ बनाउने लक्ष्य राखेको छ।