बिक्री दबाबले नेप्से दोहोरो अंकले घट्यो, ४ अर्ब ४१ करोड रुपैयाँको कारोबार

काठमाडौं । नेपाल स्टक एक्सचेन्ज (नेप्से) परिसूचक बुधबार १४.४५ अंकले घट्दै २,६६०.०२ विन्दुमा आइपुगेको छ । अघिल्लो कारोबार दिनको तुलनामा बजार ०.५४ प्रतिशतले ओरालो लाग्दा अधिकांश कम्पनीको सेयर मूल्यमा गिरावट आएको हो । कारोबार अवधिभर दिनभर १ करोड ७ लाख ७७ हजार ५८२ कित्ता सेयर ७२ हजार ९१७ पटक किनबेच भएको छ । बुधबार नेप्सेमा सूचिकृत कुल ३३८ कम्पनीको सेयर कारोबार भएको नेप्सेले जनाएको छ । कारोबार भएका कम्पनीमध्ये ६४ वटाको सेयर मूल्य बढ्दा २०० वटा कम्पनीको सेयर मूल्य घटेको छ । १० कम्पनीको मूल्य स्थिर रहेको छ । बढ्नेभन्दा घट्ने कम्पनीको संख्या धेरै हुँदा बजारमा दिभर बिक्रीकर्ता हावी भए । बुधबार ४ अर्ब ४१ करोड ८६ लाख रुपैयाँभन्दा बढीको कारोबार भएको छ । बुधबारको कारोबारमा केही कम्पनीले भने आकर्षक प्रतिफल दिएका छन् । सबैभन्दा बढी मूल्य वृद्धि गर्ने कम्पनीमा तक्सार पिखुवा खोला हाइड्रोपावर लिमिटेड र याम्बालिङ हाइड्रोपावर लिमिटेड रहेका छन् । यी दुवै कम्पनीको सेयरमा सकारात्मक सर्किट लाग्दा मूल्य १५ प्रतिशतले बढेर प्रतिकित्ता ४५६.५० रुपैयाँ पुगेको छ । त्यसैगरी, भुजुङ हाइड्रोपावर लिमिटेडको सेयर मूल्य १४.६९ प्रतिशतले बढेर ९४३ रुपैयाँ पुगेको छ । सीवाईसी नेपाल लघुवित्त वित्तीय संस्था लिमिटेडको सेयर ९.९० प्रतिशतले बढेर १ हजार ६०६.८० रुपैयाँ पुगेको । सपोर्ट माइक्रोफाइनान्स वित्तीय संस्था लिमिटेडको सेयर मूल्य ५.८९ प्रतिशतले वृद्धि भई १ हजार ९५९ रुपैयाँ कायम भएको छ ।
कारोबार रकमका आधारमा भने आँखु खोला जलविद्युत् कम्पनी लिमिटेड अग्रस्थानमा रह्यो । कम्पनीले बुधबार २९ करोड ६२ लाख ३३ हजार रुपैयाँभन्दा बढीको कारोबार गरेको छ । कम्पनीको अन्तिम सेयर मूल्य ३७१.५० रुपैयाँ कायम भएको छ ।
यस्तै, सोपान फर्मास्युटिकल्स लिमिटेडको १७ करोड २२ लाख ७१ हजार रुपैयाँ बराबरको कारोबार भएको छ । कम्पनीको अन्तिम सेयर मूल्य ९८८.४०  रुपैयाँ छ । यस्तै, युनाइटेड मोदी हाइड्रोपावर लिमिटेडको ११ करोड ८२ लाख रुपैयाँभन्दा बढीको कारोबार भएको छ भने सप्तकोशी डेभलपमेन्ट बैंक लिमिटेडको ११ करोड ४ लाख रुपैयाँ र साहस ऊर्जा लिमिटेडको ११ करोड रुपैयाँभन्दा बढीको कारोबार भएको छ । कारोबार रकमको आधारमा ऊर्जा, उत्पादनमूलक उद्योग तथा वित्तीय क्षेत्रका कम्पनीहरूमा लगानीकर्ताको आकर्षण देखिएको छ । बजारमा उच्च कारोबार भए पनि परिसूचक घट्नुले लगानीकर्ताले नाफा सुरक्षित गर्ने रणनीति अपनाएको संकेत गरेको विश्लेषकहरू बताउँछन् । पछिल्ला केही सातादेखि बजारमा आएको सुधारपछि केही लगानीकर्ताले नाफा बुक गर्न थालेका कारण बजारमा बिक्री दबाब बढेको हुन सक्ने अनुमान गरिएको छ । बुधबारको कारोबारपछि नेप्सेको कुल बजार पूँजीकरण ४५ खर्ब ५२ अर्ब ६७ करोड रुपैयाँभन्दा बढी कायम भएको छ । त्यस्तै, फ्लोट बजार पूँजीकरण १५ खर्ब ३२ अर्ब ८९ करोड रुपैयाँ छ । यसले नेपालको पुँजी बजारको आकार विस्तार हुँदै गएको देखाए पनि लगानीकर्ताको मनोविज्ञान अझै स्थिर हुन नसकेको देखाएको छ । विश्लेषकहरूका अनुसार बैंकिङ प्रणालीमा रहेको तरलता, ब्याजदरको अवस्था, आगामी त्रैमासिक वित्तीय विवरण तथा समग्र आर्थिक गतिविधिको प्रभावले आगामी दिनमा बजारको दिशा तय गर्नेछ । उच्च कारोबार रकम कायम रहनु सकारात्मक पक्ष भए पनि सूचक निरन्तर घटिरहनुले लगानीकर्तालाई अझै सतर्क रहनुपर्ने अवस्था रहेको उनीहरूको भनाइ छ । बजारमा सक्रियता कायम रहे पनि बुधबारको कारोबारले खरिदकर्ताभन्दा बिक्रीकर्ता बलियो देखिएको स्पष्ट संकेत दिएको छ । केही कम्पनीमा देखिएको उल्लेख्य मूल्य वृद्धि र ४ अर्ब रुपैयाँभन्दा बढीको कारोबारले बजारप्रति लगानीकर्ताको चासो अझै कायम रहेको देखाएको छ ।