विश्वलाई चकित पार्दै केप भर्डे नकआउटमा

ह्युस्टन (एपी) – सानो अफ्रिकी टापु राष्ट्र केप भर्डेले विश्वकप फुटबलमा इतिहास रचेको छ । सीमित स्रोत र करिब ५ लाखभन्दा केही बढी जनसंख्या भएको यो देशले आफ्नो पहिलो विश्वकप सहभागितामै नकआउट चरणमा स्थान बनाउँदै विश्वलाई चकित पारेको छ ।
४० वर्षीय गोलरक्षक भोजिन्हाको उत्कृष्ट प्रदर्शन र टोलीको अदम्य संघर्षले केप भर्डेलाई यो अविश्वसनीय सफलतासम्म पु¥याएको हो । समूह चरणको अन्तिम खेलमा साउदी अरेबियासँग गोलरहित बराबरी खेलेपछि केप भर्डे लगातार तीन बराबरीसहित अर्को चरणमा पुगेको हो । ‘हामी साना छौं,’ भोजिन्हाले भने, ‘तर हाम्रो हृदय ठूलो छ र हामी लडाकु हौं ।’
विश्वकपको सबैभन्दा ठूलो फुटबल मञ्चमा पहिलोपटक उत्रिएको केप भर्डेले यसअघि सन् २०१० को विश्व च्याम्पियन स्पेनलाई ०–० को बराबरीमा रोकेको थियो भने उरुग्वेविरुद्ध पछि परेको अवस्थाबाट फर्किंदै २–२ को बराबरी खेलेको थियो ।
‘टोली निकै उत्साहित थियो । हामीले यो कुरा पूरै विश्वलाई देखाउन चाहेका थियौं,’ केप भर्डेका प्रशिक्षक बुबिस्टाले आफ्नो देशको झन्डा ओढ्दै भने, ‘हामी यहाँसम्म आइपुगेकोमा गर्व गर्छौं । हामी सानो देश हौं, तर आफूले चाहेको लक्ष्य हासिल गर्न संघर्ष गर्ने क्षमता छ भन्ने देखाएका छौं ।’
केप भर्डेले समूहमा ३ अंक जोड्दै दोस्रो स्थान हासिल ग¥यो । स्पेन समूह विजेता बन्यो । स्पेनले उरुग्वेलाई पराजित गर्दै शीर्ष स्थान सुरक्षित गरेको थियो ।
अब केप भर्डेले जुलाई ३ मा मियामीमा साविक विश्वकप विजेता अर्जेन्टिनासँग खेल्नेछ । विश्वकपजस्ता ठूला प्रतियोगितामा समूह चरणका सबै खेल बराबरी खेल्दै अघि बढ्नु सहज हुँदैन । यसअघि सन् १९५८ मा वेल्स, १९९० मा आयरल्यान्ड र नेदरल्यान्ड्स तथा १९९८ मा चिलीले तीनवटै समूह खेल बराबरी गरेका थिए । तर सन् २०१० को विश्वकपमा न्युजिल्यान्डले पनि तीन बराबरी खेलेर पनि नकआउट चरण पुग्न सकेको थिएन । खेलअघि प्रशिक्षक बुबिस्टाले भनेका थिए, ‘सपना देख्ने अधिकार सबैलाई छ र असम्भव भन्ने केही हुँदैन ।’ केप भर्डेका खेलाडीहरूले उनको भनाइलाई मैदानमै प्रमाणित गरिदिए ।
समुद्री टापुहरूको यो सानो राष्ट्रले ठूलो सपना पूरा गरिरहँदा समर्थकहरूले पनि भावनात्मक क्षण बाँडे । एक महिला समर्थकले अनुहारमा देशको झन्डा रंगाउँदै बोकेको प्लेकार्डमा लेखिएको थियो – ‘साना टापु, ठूला सपना ।’
केप भर्डेको सफल यात्रामा सबैभन्दा ठूलो भूमिका गोलरक्षक भोजिन्हाको रह्यो । उनको उत्कृष्ट प्रदर्शनले उनलाई विश्वभर चर्चित बनाएको छ । उनले सामाजिक सञ्जाल इन्स्टाग्राममा लाखौं नयाँ समर्थक पनि पाएका छन् ।
साउदी अरेबियाविरुद्धको खेलमा उनले पहिलो हाफको इन्जुरी समयमा मोहम्मद कान्नोको हेडर उत्कृष्ट बचाउ गर्दै गोल हुन दिएनन् । ६६औं मिनेटमा मोहम्मद अबु अल–शामातको प्रहार पनि उनले शानदार ढंगले रोके । खेलको ९२औं मिनेटमा अब्दुल्लाह अल–हमदानको बल रोक्दै उनले फेरि टोलीलाई बचाए ।
‘हाम्रो राष्ट्रिय टोलीमा धेरै क्षमता छ,’ भोजिन्हाले भने, ‘धेरैलाई लाग्न सक्छ केप भर्डेका खेलाडी पर्याप्त राम्रो छैनन् । तर हामी यहाँ हाम्रो क्षमता देखाउन आएका हौं । हामी ठूला प्रतियोगिता र ठूला लिगमा खेल्न सक्छौं भन्ने प्रमाणित गर्न आएका हौं ।’
स्टेडियममा उपस्थित केही समर्थकहरूले आफ्नो शरीरमा भोजिन्हाको नाम लेखेर उनलाई समर्थन गरिरहेका थिए । ६८ हजार २७८ दर्शकमध्ये उनकी आमा आना कान्डिडा एभोराले पनि छोराको खेल प्रत्यक्ष हेरिरहेकी थिइन् । हातमा सानो केप भर्डेको झन्डा बोकेर उनी विशेष अतिथि कक्षबाट खेल हेरिरहेकी थिइन् । स्पेनविरुद्धको ऐतिहासिक खेलमा भिसा समस्याका कारण उपस्थित हुन नसकेकी उनी योपटक भने छोराको प्रदर्शन हेर्न पुगेकी थिइन् ।
खेलमा केप भर्डेले पनि गोल गर्ने केही अवसर पाएको थियो । ५०औं मिनेटमा केभिन पिनाको टाढाबाट प्रहार गरिएको बल क्रसबारमाथिबाट बाहिरियो । ७४औं मिनेटमा लारोस डुआर्टेको प्रहार साउदी गोलरक्षक मोहम्मद अल–ओवैसले बचाए । अन्तिम समयमा नुनो दा कोस्टाको प्रहार पनि लक्ष्यभन्दा बाहिर गयो ।
तर गोल गर्न नसके पनि केप भर्डेका लागि बराबरी पर्याप्त थियो । खेल सकिएको केही समयपछि स्पेनले उरुग्वेमाथि जित हात पारेपछि केप भर्डेका खेलाडी र समर्थकहरूले मैदानमै खुसी मनाए । धेरै खेलाडी र समर्थक भावुक हुँदै आँसु झारिरहेका थिए ।
आफ्नो टोलीलाई नयाँ उचाइमा पु¥याएका प्रशिक्षक बुबिस्टालाई सोधियो – यस्तो सफलता विश्वकपअघि कल्पना गर्नुभएको थियो ?
उनले जवाफ दिए, ‘मैले सधैं भनेको छु, ढिलोचाँडो केप भर्डे यस्तो मञ्चमा पुग्नेछ । पक्कै पनि यस्तो भविष्यवाणी गर्न कठिन थियो, तर मलाई विश्वास थियो ।’
यता साउदी अरेबिया भने समूह चरणबाटै बाहिरिएको छ । उसले तीन खेलबाट २ अंक मात्र जोड्न सक्यो । साउदी प्रशिक्षक जर्जियोस डोनिसले भने, ‘हामी खेल सिर्जना गर्ने, नियन्त्रण गर्ने र अवसर बनाउने कुरामा कमजोर रह्यौं । यस्तो प्रदर्शनले खेल जित्न सकिँदैन ।’