टीभीएस अपाचे आरटीआर १६० ४भी मोडल नेपाली बजारमा

काठमाडौं । टिभीएस मोटर कम्पनीले नेपालमा आफ्नो नयाँ टीभीएस अपाचे आरटीआर १६० ४भी मोटरसाइकल सार्वजनिक गरेको छ । कम्पनीले यो मोडललाई १६० सीसी सेग्मेन्टकै सबैभन्दा शक्तिशाली मोटरसाइकलका रूपमा प्रस्तुत गर्दै यसमा पहिलो पटक प्रोजेक्टर हेडल्याम्प, यूएसडी सस्पेन्सन र ५ इन्चको टीएफटी डिस्प्ले क्लस्टरजस्ता अत्याधुनिक सुविधा समावेश गरिएको जनाएको छ । काठमाडौंको सतुंगलमा आयोजित कार्यक्रममा टीभीएसको आधिकारिक वितरक जगदम्बा मोटर्स प्रालिले नयाँ मोडल सार्वजनिक गरेको हो । कार्यक्रममा अटोमोबाइल क्षेत्रका विज्ञ, सञ्चारकर्मी, इन्फ्लुएन्सर तथा बाइक पारखीहरूको सहभागिता रहेको थियो । सहभागीहरूका लागि विशेष टेस्ट राइड तथा ट्र्याक राइडको समेत व्यवस्था गरिएको थियो । नयाँ अपाचे आरटीआर १६० ४भी मा १५९.७ सीसी क्षमताको इन्जिन जडान गरिएको छ । स्पोर्ट मोडमा यसले १७.५५ पीएस शक्ति उत्पादन गर्ने कम्पनीले जनाएको छ । साथै, अर्बन र रेन मोडमा १५.६४ पीएस शक्ति उपलब्ध हुनेछ । पाँच स्पिड गियरबक्स, १२ लिटर इन्धन ट्यांकी, डुअल च्यानल एबीएस तथा स्पोर्ट, अर्बन र रेन गरी तीनवटा राइडिङ मोड यसका प्रमुख विशेषता हुन् । मोटरसाइकलमा ३७ एमएम अपसाइड–डाउन फ्रन्ट फोर्क प्रयोग गरिएको छ । यसले नियन्त्रण र स्थिरता बढाउने कम्पनीको दाबी छ । यो मोटरसाइकलको एक्स–शोरूम मूल्य ४ लाख २९ हजार ९ सय रुपैयाँ निर्धारण गरिएको छ । कार्यक्रममा टीभीएस मोटर कम्पनीका इन्टरनेशनल बिजनेस प्रेसिडेन्ट पेम्यान कारगरले नेपाल कम्पनीका लागि रणनीतिक रूपमा महŒवपूर्ण बजार भएको उल्लेख गर्दै नयाँ टीभीएस अपाचे आरटीआर १६० ४भी ले रेसिङबाट प्रेरित प्रविधि, उच्च प्रदर्शन र आधुनिक फिचर्समार्फत यस सेग्मेन्टमा कम्पनीको उपस्थितिलाई थप मजबुत बनाउने बताए । जगदम्बा मोटर्सका प्रबन्ध निर्देशक शाहिल अग्रवालले नेपालका युवा राइडरबीच टीभीएस अपाचे ब्रान्डको लोकप्रियता निरन्तर बढिरहेको उल्लेख गर्दै नयाँ मोडलमा समावेश गरिएका प्रोजेक्टर हेडल्याम्प, यूएसडी सस्पेन्सन र टीएफटी क्लस्टरले राइडिङ अनुभवलाई थप उत्कृष्ट बनाउने विश्वास व्यक्त गरे । टीभीएस मोटर कम्पनीका प्रिमियम बिजनेस हेड विमल सुम्ब्लीले अपाचे ब्रान्डले विश्वका ६० भन्दा बढी देशमा ६५ लाखभन्दा बढी ग्राहकको विश्वास जितेको उल्लेख गर्दै नयाँ टीभीएस अपाचे आरटीआर १६० ४भी ले १६० सीसी सेग्मेन्टमा प्रदर्शन र प्रविधिको नयाँ मापदण्ड स्थापित गर्ने बताए । कम्पनीका अनुसार नयाँ मोटरसाइकल हाल नेपालका चयनित डिलरशिपमा उपलब्ध छ भने जुलाई २०२६ भित्र देशभर बिक्रीका लागि उपलब्ध गराइनेछ । यो मोटरसाइकल म्याट ब्ल्याक, रेसिङ रेड र मरिन ब्लु गरी तीन रङमा उपलब्ध हुनेछ ।