मेस्सीजस्तो कसरी बन्ने ?

लगातार सात विश्वकप खेलमा गोल गर्ने पहिलो खेलाडी बन्नका लागि प्रयास गर्न लियोनेल मेस्सीसँग धेरै समय थिएन ।
तर अर्जेन्टिनाका सुपरस्टारले दोस्रो हाफमा वैकल्पिक खेलाडीका रूपमा मैदान प्रवेश गरेपछि पनि त्यो उपलब्धि हासिल गरे ।
मेस्सीले लगातार सातौं विश्वकप खेलमा गोल गर्दै अर्जेन्टिनाले शनिबार राति समूह चरणको अन्तिम खेलमा जोर्डनलाई ३–१ ले पराजित गर्दा पुरुष विश्वकप इतिहासकै सर्वाधिक १९ गोल गर्ने आफ्नो कीर्तिमानलाई अझ विस्तार गरे ।
तीन दिनअघि ३९ वर्ष पुगेपछि खेलेको आफ्नो पहिलो खेलमा मेस्सीले ८०औं मिनेटमा फ्रिकिकमार्फत गोल गरे । पेनाल्टी क्षेत्रबाहिर ठीक अगाडि उनलाई लडाइएपछि प्राप्त फ्रिकिकमा उनले घाँसको सतहभन्दा अलिकति मात्र माथिबाट प्रहार गरेको बल जोर्डनका दुई रक्षकबीचबाट छिचोलिँदै गोलपोस्टको बायाँ कुनामा पुग्यो ।
यो उनको करियरको ७२औं फ्रिकिक गोल थियो, जसमा अर्जेन्टिनाका लागि गरेका १२ गोल पनि समावेश छन् । अब मेस्सीले २०२ अन्तर्राष्ट्रिय खेलमा १२३ गोल गरेका छन्, जुन पुरुष अन्तर्राष्ट्रिय फुटबलमा सर्वाधिक १४५ गोल गरेका क्रिस्टियानो रोनाल्डोपछि दोस्रो स्थानमा पर्छ ।
मेस्सी विश्वकपका लगातार छ खेलमा गोल गर्ने केवल तीन खेलाडीमध्ये एक थिए । अन्य दुई खेलाडी फ्रान्सका स्ट्राइकर जस्ट फन्टेन र ब्राजिलका महान् जाइरजिन्हो हुन् ।
‘तपाईंहरूले जे देखिरहनुभएको छ, मैले पनि त्यही देखिरहेको छु,’ प्रशिक्षक लियोनेल स्कालोनीले अनुवादकमार्फत भने, ‘हरेक पटक मानिसहरूले यसबारे सोध्दा यो अलि असहज अवस्था बन्छ, किनभने अब मैले के भन्ने भन्ने नै थाहा पाउन छाडेको छु ।’
मेस्सीले २०१४ को विश्वकपमा नाइजेरियाविरुद्ध पनि फ्रिकिकबाट गोल गरेका थिए । सन् १९६६ देखि उपलब्ध अभिलेखअनुसार विश्वकपमा दुई फ्रिकिक गोल गर्ने खेलाडीमध्ये उनी छैटौं खेलाडी बनेका छन् । यसअघि पेले, रिभेलिनो, तेओफिलो कुबिलास, बर्नार्ड जेनघिनी र डेभिड बेकह्यामले यो उपलब्धि हासिल गरेका थिए ।
‘उहाँका लागि म धेरै खुसी छु । उहाँ अहिले जुन लयमा हुनुहुन्छ, त्यसले हामीलाई पनि खुसी बनाएको छ,’ यस प्रतियोगितामा मेस्सीबाहेक अर्जेन्टिनाका लागि गोल गर्ने पहिलो खेलाडी बनेका जियोभानी लो सेल्सोले अनुवादित प्रतिक्रियामा भने । उनले १९औं मिनेटमा फ्रिकिकबाट गोल गरेका थिए, ‘साँचो कुरा के हो भने, उहाँलाई हरेक दिन देख्दा उत्साह थपिन्छ, प्रेरणा मिल्छ र त्यो भावना सबैमा फैलिन्छ । त्यसैले उहाँलाई यस्तो अवस्थामा देख्नु हाम्रो लागि निकै महŒवपूर्ण छ ।’
अर्जेन्टिनाले समूह ‘जे’ मा पहिलो स्थान यसअघि नै सुनिश्चित गरिसकेको र जोर्डन पनि नकआउट चरणबाट बाहिरिइसकेको भएकाले मेस्सी सुरुआती टोलीमा परेनन् ।
तर पनि एनएफएल टोली डलास काउबोइजको घरेलु मैदानमा उपस्थित ७०,६४९ दर्शक, जसको समर्थन प्रायः अर्जेन्टिनातर्फ थियो, मेस्सीलाई खेलिरहेको हेर्न आतुर थिए ।
दोस्रो हाफ सुरु हुनेबित्तिकै समर्थकहरूले मेस्सीको नाम जप्न थाले । उनी वार्मअपका लागि बेन्चबाट उठ्दा नै ठूलो ताली र हुटिङ सुनियो ।
६०औं मिनेटमा लाउटारो मार्टिनेजको स्थानमा मैदान प्रवेश गर्दा त्यो गर्जन अझ ठूलो भयो । मार्टिनेजले पहिलो हाफमा पेनाल्टीमार्फत गोल गरेका थिए ।
युरोपको उत्कृष्ट खेलाडीलाई प्रदान गरिने ८८ब्यालोन डी’ओर८८ आठ पटक जितिसकेका मेस्सीका असंख्य उपलब्धिमध्ये एउटा भने अझै अपूरो छ—विश्वकपको सर्वाधिक गोलकर्तालाई प्रदान गरिने ८८गोल्डेन बुट८८ । यो उनको छैटौं विश्वकप हो ।
यस प्रतियोगितामा अहिले मेस्सीको नाममा ६ गोल पुगेको छ । उनी किलियन एमबाप्पे, भिनिसियस जुनियर र एर्लिङ हालान्डभन्दा दुई गोलले अगाडि छन् ।
विश्वकपअघि इन्टर मियामीबाट खेल्दा मेस्सी सामान्य ह्यामस्ट्रिङ चोटसँग जुधिरहेका थिए, जसले प्रतियोगिताअघि उनको तयारीलाई केही प्रभावित बनाएको थियो ।
अर्जेन्टिनाले नकआउट चरणको यात्रा शुक्रबार दक्षिण फ्लोरिडामा सुरु गर्नेछ । ४८ टोली सहभागी यस विस्तारित विश्वकपमा यदि ‘ला अल्बिसेलेस्ते’ फाइनलसम्म पुग्यो भने जुलाई १९ सम्म १७ दिनभित्र पाँच खेल खेल्नुपर्नेछ ।
‘आज उनी ९० मिनेट नै खेल्न सक्थे,’ स्कालोनीले भने, ‘उनी आफ्ना टोलीका साथीहरूले पनि पर्याप्त समय मैदानमा बिताऊन् भन्ने चाहन्थे र आगामी खेलहरूलाई ध्यानमा राख्दै आफूलाई पनि बचत गर्न चाहन्थे । मानिसहरूले चर्चा गरिरहेका तथ्यांकबारे उनी त्यति धेरै सोच्दैनन् ।’