सेबोन अध्यक्ष भट्टले लिए पद तथा गोपनीयताको शपथ

काठमाडौं । नेपाल धितोपत्र बोर्ड (सेबोन) का नवनियुक्त अध्यक्ष गोपालप्रसाद भट्टले पद तथा गोपनीयताको शपथ ग्रहण गरेका छन् । अर्थ मन्त्रालयमा सोमबार आयोजित कार्यक्रममा अर्थमन्त्री  स्वर्णिम वाग्लेले भट्टलाई शपथ गराएका हुन् । शपथसँगै भट्टले बोर्डको नेतृत्व औपचारिक रूपमा सम्हालेका छन् । गत असार ५ गते बसेको मन्त्रिपरिषद् बैठकले डा. भट्टलाई सेबोनको अध्यक्षमा नियुक्त गर्ने निर्णय गरेको थियो । लामो समय नेतृत्वविहीन रहेको बोर्डले नयाँ अध्यक्ष पाएसँगै पुँजी बजार सुधार, नियामकीय प्रभावकारिता र लगानीकर्ताको विश्वास अभिवृद्धिका कामले गति लिने लगानीकर्ताको अपेक्षा बढेको छ ।
लगानीकर्ताको हित र पुँजी बजार सुधारमा काम गर्न सेबोन अध्यक्षलाई अर्थमन्त्रीको निर्देशन
अर्थमन्त्री स्वर्णिम वाग्लेले पुँजी बजारका लगानीकर्ताको लगानीको सुरक्षा र हितलाई सर्वोच्च प्राथमिकतामा राखेर निष्पक्ष, पारदर्शी र इमानदारीपूर्वक काम गर्न नेपाल धितोपत्र बोर्ड (सेबोन) का नवनियुक्त अध्यक्ष गोपालप्रसाद  भट्टलाई निर्देशन दिए । सेबोन अध्यक्ष घट्टको पद तथा गोपनियताको सपथ ग्रहणका लागि आयोजना गरिएको कार्यक्रमलाई सम्बोधन गर्दै अर्थमन्त्री वाग्लेले कुनै पनि प्रकारका लोभ, प्रलोभन, दबाब वा प्रभावमा नपरी कानुन र सुशासनको आधारमा जिम्मेवारी निर्वाह गर्न आग्रह गरेका हुन् । उनले पुँजी बजारमा विश्वास कायम गर्नु अहिलेको प्रमुख चुनौती भएको उल्लेख गर्दै नियामक निकायका रूपमा सेबोनले बजारलाई थप व्यवस्थित, पारदर्शी र विश्वसनीय बनाउन सक्रिय भूमिका खेल्नुपर्ने बताए । बजारमा अनावश्यक हल्ला, अफवाह र चलखेलका कारण विशेषगरी साना लगानीकर्ता प्रभावित हुने गरेको उल्लेख गर्दै त्यस्ता गतिविधि नियन्त्रण गर्न अध्यक्ष भट्टले प्रभावकारी कदम चाल्नुपर्नेमा उनले जोड दिए । अर्थमन्त्री वाग्लेले पुँजी बजार सुधारलाई परिणाममुखी ढंगले अघि बढाउन स्पष्ट कार्ययोजना तयार गर्न पनि निर्देशन दिए । उनले दैनिक, साप्ताहिक, मासिक, ६ महिनाको तथा एक वर्षको कार्ययोजना तयार गरी मन्त्रालयमा पेश गर्न आग्रह गर्दै तय गरिएका योजना समयसीमा तोकेर कार्यान्वयन गर्नुपर्ने बताए । ‘कुनै पनि लोभ र प्रभावमा नपरी पुँजी बजारका लगानीकर्ताको लगानीको सुरक्षा गर्नुहोस् । सरकारले आवश्यक सबै सहयोग गर्छ। पुँजी परिचालनमार्फत आर्थिक वृद्धिलाई गति दिने वातावरण निर्माणमा विशेष ध्यान दिनुहोस्,’ अर्थमन्त्री वाग्लेले भने । उनले धेरै बोल्नेभन्दा पनि कामबाट परिणाम देखाउनुपर्नेमा जोड दिँदै पुँजी बजार सुधारका प्रतिबद्धता व्यवहारमा उतार्न आग्रह गरे । मन्त्रालयबाट बोर्डको नियमित काममा कुनै हस्तक्षेप नहुने स्पष्ट पार्दै उनले बजारको अवस्था, सुधारका प्रगति र आगामी योजनाबारे प्रत्येक हप्ता आफूलाई जानकारी गराउन पनि अध्यक्ष भट्टलाई निर्देशन दिए । अर्थमन्त्री वाग्लेले पुँजी बजारलाई अर्थतन्त्रको महत्त्वपूर्ण आधारका रूपमा विकास गर्न नियामक निकाय सक्षम, जवाफदेही र व्यावसायिक हुनुपर्ने उल्लेख गर्दै लगानीकर्ताको विश्वास जित्न सकिएमा बजारमार्फत उत्पादनशील क्षेत्रमा पुँजी परिचालन बढ्ने र त्यसले समग्र आर्थिक वृद्धिमा योगदान पुग्ने विश्वास व्यक्त गरे । शपथ ग्रहणपछि नवनियुक्त अध्यक्ष भट्टले सरकारको नीति तथा अर्थमन्त्रीले दिएको मार्गदर्शनअनुसार पुँजी बजारको विकास, सुशासन र लगानीकर्ताको हितलाई केन्द्रमा राखेर काम गर्ने प्रतिबद्धता जनाए । उनले आफ्नो ज्ञान, अनुभव र व्यावसायिक दक्षतालाई पूर्ण रूपमा पुँजी बजार सुधार र लगानीकर्ताको विश्वास अभिवृद्धिमा केन्द्रित गर्ने बताए । उनले विगतमा पुँजी बजार सुधारका लागि विभिन्न अध्ययन समिति तथा कार्यदलले दिएका सुझाव र सिफारिसलाई चरणबद्ध रूपमा कार्यान्वयन गर्दै बजारलाई थप पारदर्शी, प्रतिस्पर्धी र विश्वसनीय बनाउने लक्ष्यका साथ काम गर्ने उल्लेख गरे। साथै, सरकारको आर्थिक वृद्धि, पुँजी परिचालन र निजी क्षेत्रको विकासलाई सहयोग पुग्ने गरी सेबोनको नियामकीय भूमिकालाई अझ प्रभावकारी बनाइने उनको भनाइ थियो । अध्यक्ष भट्टले बजारका सबै सरोकारवालासँग सहकार्य गर्दै नीतिगत सुधार, प्रविधिमैत्री नियमन र लगानीकर्तामैत्री वातावरण निर्माणलाई प्राथमिकतामा राखेर अघि बढ्ने प्रतिबद्धतासमेत व्यक्त गरे ।