क्यानडाको ऐतिहासिक फड्को, पहिलो पटक विश्वकप क्वार्टरफाइनलमा

विश्वकपको नकआउट चरण पहिलो पटक खेलेका दुई टोलीबीचको प्रतिस्पर्धा अन्तिमसम्म अत्यन्त तनावपूर्ण रह्यो । निर्धारित ९० मिनेटमा गोल हुन नसकेपछि खेल अतिरिक्त समयमा पुग्ने संकेत देखिएको थियो । तर दोस्रो हाफको इन्जुरी समयको दोस्रो मिनेटमा स्टेफन युस्टाकियोले निर्णायक गोल गर्दै क्यानडालाई दक्षिण अफ्रिकामाथि १–० को ऐतिहासिक जित दिलाए ।
‘मसँग भएको सबै शक्ति लगाएर प्रहार गरेको थिएँ,’ युस्टाकियोले भने । गोलसँगै लस एन्जलसस्थित सोफाइ स्टेडियमदेखि देशभर आयोजित सामूहिक अवलोकन कार्यक्रमसम्म क्यानडाका समर्थकहरू खुसीले उफ्रिए । क्यानडाका राइट ब्याक एलिस्टेयर जोनस्टनले भने, ‘समग्रमा यो लगभग पूर्ण नकआउट प्रदर्शन थियो ।’
जाडोमा आइस हकीले प्रभुत्व जमाउने क्यानडामा अहिले भने पुरुष राष्ट्रिय फुटबल टोलीले गर्मीयाम आफ्नै बनाएको छ ।
यसअघि क्यानडाको पुरुष फुटबल टोलीको सबैभन्दा ठूलो उपलब्धि १९८५ र २००० मा कन्काकाफ गोल्ड कप जित्नु थियो । महिला टोलीले भने टोकियो २०२० ओलम्पिकमा स्वर्ण पदक जितेको थियो ।
जोनस्टनले भने, ‘क्यानडेली खेलकुद इतिहासमा यो त्यस्तो क्षण हो, जहाँ त्यो बेला आफू कहाँ थिएँ भन्ने मानिसहरूले जीवनभर सम्झिनेछन् । हामी केवल क्यानडाली फुटबल होइन, समग्र क्यानडाली खेलकुदको इतिहास लेखिरहेका छौं ।’
खेल अतिरिक्त समयमा जाने जस्तो देखिएको अवस्थामा जोनस्टनको पास क्लियर हुँदा बल पेनाल्टी क्षेत्रबाहिर युस्टाकियोसम्म पुग्यो । उनले उत्कृष्ट प्रहार गर्दै बललाई पोस्टको कुनामा छिराए ।
‘त्यो जादुमय क्षण थियो । स्टेफ दौडिएको देख्दा हामी सबै उनको पछि दौडियौं । यस्तो क्षण जीवनभर बिर्सन सकिँदैन,’ जोनस्टनले भने ।
लस एन्जलसको एमएलएस क्लब एलएएफसीबाट खेलिसकेका २९ वर्षीय युस्टाकियो त्यस दिन सहरका नायक बने । क्यानडामा जन्मिएका उनले युवाअवस्थामा आफ्ना स्वर्गीय आमाबुबाको जन्मभूमि पोर्चुगलबाट खेलेका थिए ।
उनले लगातार दुई वर्ष ठूलो व्यक्तिगत पीडा पनि भोगे । सन् २०२३ मा उनकी आमाको मस्तिष्क क्यान्सरबाट निधन भयो भने २०२४ मा बुबाको हृदयाघातका कारण मृत्यु भयो । उनी अहिले पनि आफ्ना भाइ माउरोसँग नजिक छन्, जो पूर्व खेलाडी तथा क्यानडियन प्रिमियर लिगका प्रशिक्षक हुन् ।
मुख्य प्रशिक्षक जेसी मार्शले भने, ‘यति उत्कृष्ट समूहमा पनि स्टेफजति यो क्षणको हकदार अर्को व्यक्ति सायदै होला । उनका आमाबुबाले कतैबाट यो दृश्य हेरिरहेका होलान् भन्ने विश्वास छ ।’
सन् २०१९ मा युस्टाकियोले क्यानडाको राष्ट्रिय टोलीबाट खेल्ने निर्णय गरेका थिए ।
‘आज हामीले स्वदेशका सबैलाई गर्व गराउन सकेका छौं । म अत्यन्तै खुसी छु,’ उनले भने । तर उनले टोलीलाई अझै लक्ष्य पूरा नभएको पनि सम्झाए । ‘काम सकिएको भन्न मिल्दैन । हामी विनम्र रहनुपर्छ, राम्रोसँग पुनः तयारी गर्नुपर्छ । छ दिनपछि अझै कठिन प्रतिद्वन्द्वी हाम्रो प्रतीक्षामा छ ।’
अब क्यानडाले जुलाई ४ मा ह्युस्टनमा नेदरल्यान्ड्स वा मोरक्कोमध्ये एकसँग क्वार्टरफाइनल खेल्नेछ । जोनस्टनले भने, ‘अब हामी साँचिकै बलियो टोलीसँग भिड्ने अवसर पाउँदैछौं, जसलाई लिएर हामी सबै उत्साहित छौं ।’
युस्टाकियोले भने खेलको अन्त्यतिर घडी नै नदेखेकाले कति समय बाँकी थियो भन्ने थाहा नभएको बताए ।
‘हामीले गोल गर्न नसकेकोमा केही निराशा थियो । खेल यसै लम्बिरहे उनीहरूले गोल गर्लान् भन्ने लागिरहेको थियो । तर प्रशिक्षक जेसीले सबैलाई शान्त रहन र लगातार प्रयास गरिरहन निर्देशन दिइरहनुभएको थियो,’ उनले भने ।
७५औं मिनेटमा टोलीका स्टार खेलाडी अल्फोन्सो डेभिस मैदान प्रवेश गरेपछि क्यानडाले थप ऊर्जा पाएको थियो । उनी मे महिनामा बायर्न म्युनिखका लागि खेल्दा च्याम्पियन्स लिगको सेमिफाइनलमा ह्यामस्ट्रिङमा चोट बोकेपछि पहिलो पटक विश्वकपमा मैदान उत्रिएका हुन् ।
डेभिस अनुपस्थित रहेका समूह चरणका खेलहरूमा युस्टाकियोले कप्तानी सम्हालेका थिए ।
‘हामी विशेष समूह हौं । हामी आफूलाई दाजुभाइजस्तै ठान्छौं । जब एकअर्काका लागि लड्छौं र खेल्छौं, यस्तै विशेष उपलब्धि सम्भव हुन्छ,’ युस्टाकियोले भने ।