आशा, दबाब र इतिहासको भारी बोझ

विश्व फुटबलको सबैभन्दा सफल राष्ट्र ब्राजिल फेरि एकपटक विश्वकपको छैटौं उपाधि जित्ने लक्ष्यसहित मैदानमा उत्रिएको छ । पाँच पटकको विश्वविजेता ब्राजिलले सन् २००२ पछि विश्वकप जित्न सकेको छैन । त्यसयता २००६ मा फ्रान्स, २०१० मा नेदरल्यान्ड्स, २०१४ मा जर्मनी, २०१८ मा बेल्जियम र २०२२ मा क्रोएसियासँग पराजित हुँदै ब्राजिल क्वार्टरफाइनलभन्दा अघि बढ्न असफल रह्यो । त्यसैले नयाँ पुस्ताका ब्राजिली समर्थकले आफ्नै आँखाले विश्वकप जितेको टोली देख्न पाएका छैनन् ।
यसपटक टोलीको मुख्य आशा स्टार फरवार्ड भिनिसियस जुनियरमाथि छ । तर देशभित्र विश्वकप जित्ने विश्वास विगतकै सबैभन्दा कम देखिएको छ । डाटाफोल्हाको अप्रिल २०२६ को सर्वेक्षणअनुसार केवल २९ प्रतिशत ब्राजिलीले मात्र टोली विश्वकप जित्ने विश्वास गरेका छन् भने ४६ प्रतिशतले टोली क्वार्टरफाइनल पनि पार गर्न नसक्ने अनुमान गरेका छन् ।
यस निराशाको कारण पनि स्पष्ट छ । विश्वकप छनोट अभियान ब्राजिलको इतिहासकै कमजोरमध्ये एक रह्यो । टोली दक्षिण अमेरिकी छनोटमा पाँचौं स्थानमा सीमित भयो र शीर्ष स्थानको अर्जेन्टिनाभन्दा १० अंकले पछि रह्यो । छनोटकै क्रममा अर्जेन्टिनासँग ४–१ को लज्जास्पद हार बेहोरेपछि कप्तान मार्किन्होसले सार्वजनिक रूपमा समर्थकसँग माफी माग्नुपरेको थियो । त्यसपछि प्रशिक्षक डोरिभाल जुनियर बर्खास्त भए र अनुभवी कार्लो एन्सेलोटीलाई टोलीको जिम्मेवारी दिइयो । त्यही अवधिमा ब्राजिल फुटबल महासंघ (सीबीएफ) का तत्कालीन अध्यक्ष एडनाल्डो रोड्रिग्सलाई निर्वाचनमा कागजात कीर्ते गरेको आरोपमा अदालतले पदमुक्त गर्ने आदेश दिएको घटनाले पनि टोलीलाई अस्थिर बनायो ।
ब्राजिली फुटबलमाथि सबैभन्दा ठूलो मानसिक बोझ भने अझै पनि सन् २०१४ को विश्वकपमा जर्मनीसँग घरेलु मैदानमा बेहोरेको ७–१ को हार हो । ‘मिनेरासो’ नामले चिनिने त्यो हारलाई ब्राजिलको खेल इतिहासकै सबैभन्दा पीडादायी क्षण मानिन्छ । दक्षिण अमेरिकी फुटबल विश्लेषक टिम विकरीका अनुसार ब्राजिलमा अहिले कुनै पनि अत्यन्त अपमानजनक हारलाई ‘७–१’ भनेर तुलना गरिन्छ । उनका अनुसार यो घाउ मेट्ने सबैभन्दा प्रभावकारी उपाय फेरि विश्वकप जित्नु हो ।
ब्राजिलले पछिल्ला पाँच विश्वकपमा युरोपेली टोलीविरुद्ध नकआउट चरणमा जित निकाल्न सकेको छैन । फ्रान्स, नेदरल्यान्ड्स, जर्मनी, बेल्जियम र क्रोएसियाले क्रमशः ब्राजिलको यात्रा रोके । यसपटक समूह ‘सी’ को विजेता बनेमा ब्राजिलले क्वार्टरफाइनलमा इंग्ल्यान्डसँग खेल्नुपर्ने सम्भावना छ । तर धेरै समर्थकका लागि केवल युरोपेली टोलीलाई हराउनु पर्याप्त हुनेछैन, उनीहरू छैटौं उपाधि नै चाहन्छन् ।
ब्राजिलको विश्व फुटबलमा स्थापित प्रतिष्ठाको आधार १९७० को ऐतिहासिक टोली हो । पेलेको नेतृत्वमा मेक्सिको विश्वकप जितेको त्यो टोलीलाई विश्व फुटबलकै उत्कृष्ट टोलीमध्ये एक मानिन्छ । त्यसअघि १९५८ मा पेले, १९६२ मा गारिन्चा, १९९४ मा रोमारियो र २००२ मा रोनाल्डोले ब्राजिललाई विश्वविजेता बनाएका थिए । यही गौरवशाली इतिहासका कारण पछिल्ला पुस्तामाथि पनि आकर्षक शैलीमा खेल्दै उपाधि जित्ने ठूलो दबाब रहँदै आएको छ ।
यसपटक त्यो जिम्मेवारी भिनिसियस जुनियरको काँधमा छ । रियल म्याड्रिडका स्टार उनले समूह चरणका तीनै खेलमा गोल गर्दै उत्कृष्ट प्रदर्शन गरेका छन् । २००२ पछि समूहका सबै खेलमा गोल गर्ने पहिलो ब्राजिली खेलाडी बनेका उनी दुईपटकका च्याम्पियन्स लिग विजेता, २०२४ का फिफा उत्कृष्ट पुरुष खेलाडी तथा बालोन डी’ओर उपविजेता पनि हुन् । सन् २००२ का विश्वकप विजेता कप्तान काफुले यो विश्वकप भिनिसियस चम्किने समय भएको बताएका छन् । स्वयं भिनिसियसले पनि ब्राजिललाई फेरि विश्व फुटबलको शिखरमा पु¥याउने जिम्मेवारी आफूले गर्वका साथ स्वीकार गरेको बताएका छन् ।
अर्कोतर्फ ३४ वर्षीय नेयमारको पुनरागमन पनि चर्चाको विषय बनेको छ । चोटका कारण उनले अक्टोबर २०२३ पछि राष्ट्रिय टोलीबाट खेलेका थिएनन् । त्यसपछि पनि एन्सेलोटीले उनलाई अन्तिम २६ सदस्यीय टोलीमा समावेश गरे । ब्राजिलका सर्वाधिक गोलकर्ता नेयमारलाई सन् २००२ का नायक रोनाल्डोले अनुभवका हिसाबले टोलीका लागि अझै महŒवपूर्ण खेलाडी मानेका छन् ।
ब्राजिलले विश्वकपको पहिलो खेलमा मोरक्कोसँग १–१ को बराबरी खेलेको छ । अब जापानविरुद्धको खेल निर्णायक बन्नेछ । जापानले अक्टोबर २०२५ मा मैत्रीपूर्ण खेलमा ब्राजिललाई ३–२ ले हराएको थियो । यसपटकको विजेताले अन्तिम १६ मा आइभरी कोस्ट वा एर्लिङ हालान्डको नर्वेसँग खेल्ने अवसर पाउनेछ । ब्राजिलका लागि यो केवल अर्को खेल मात्र होइन, २४ वर्षदेखि अधुरो रहेको छैटौं विश्वकप उपाधितर्फको महŒवपूर्ण कदम पनि हो ।