जर्मनीलाई स्तब्ध पार्दै पाराग्वे क्वार्टरफाइनलमा

विश्वकप फुटबलको नकआउट चरणमा पाराग्वेले शक्तिशाली जर्मनीलाई पेनाल्टी सुटआउटमा पराजित गर्दै प्रतियोगिताको सबैभन्दा ठूलो उलटफेरमध्ये एक रचेको छ । रोमाञ्चक खेलपछि प्राप्त यो जितलाई पाराग्वेको फुटबल इतिहासकै अविस्मरणीय उपलब्धिमध्ये एकका रूपमा हेरिएको छ ।
निर्धारित समय र अतिरिक्त समयमा जर्मनीका स्टार खेलाडीहरूको लगातार आक्रमणका बीच पाराग्वेका गोलरक्षक ओल्र्यान्डो गिल र सेन्टर ब्याक जोश कनाल नायक बने । प्रतियोगिता सुरु हुनुअघि पहिलो रोजाइमा समेत नरहेका यी दुई खेलाडीले विश्वस्तरीय आक्रमणलाई बारम्बार विफल पार्दै टोलीलाई खेलमा टिकाइराखे ।
निर्णायक पेनाल्टी सुटआउटमा गोलरक्षक गिलले उत्कृष्ट बचाउ गरे भने क्यानालेले विजयी पेनाल्टी गोल गर्दै पाराग्वेलाई ऐतिहासिक जित दिलाए । खेलपछि बोस्टनस्थित रंगशालामा उपस्थित पाराग्वेका समर्थक र सञ्चारकर्मीहरू भावुक बनेका थिए । यससँगै पाराग्वेले क्वार्टरफाइनलमा स्थान सुरक्षित गरेको छ, जहाँ उसले फ्रान्स र स्विडेनबीचको विजेतासँग प्रतिस्पर्धा गर्नेछ ।
उता उपाधिको बलियो दाबेदार मानिएको फ्रान्सले आज स्विडेनसँग खेल्दै अन्तिम आठमा स्थान बनाउने प्रयास गर्नेछ । फ्रान्सको आक्रमणपंक्ति प्रभावशाली देखिए पनि पछिल्लो खेलमा रक्षापंक्तिले केही कमजोरी देखाएको विश्लेषण गरिएको छ । प्रशिक्षक डिडेर डिस्च्याम्पले डिफेन्डर विलियम सलिबा फिट भएर टोलीमा फर्किने अपेक्षा गरेका छन् ।
यसैबीच विश्वकपको नयाँ नकआउट चरणले प्रतियोगितालाई थप रोमाञ्चक बनाएको छ । अन्तिम ३२ को चरणमा क्यानडाले दक्षिण अफ्रिकालाई इन्जुरी समयमा पराजित गरेको थियो भने ब्राजिलले पनि अन्तिम क्षणमा जित निकालेको थियो । जर्मनीविरुद्ध पाराग्वेको ऐतिहासिक जित र नेदरल्यान्ड्स तथा मोरक्कोबीचको पेनाल्टी सुटआउटले प्रतियोगिताको रोमाञ्चलाई अझ उचाइमा पु¥याएको छ ।
विश्लेषकहरूका अनुसार समूह चरणको जटिल समीकरणभन्दा नकआउट चरणको ’हार वा जित’ प्रणालीले विश्वकपलाई अझ आकर्षक बनाएको छ र अबका खेलहरूमा यस्तै रोमाञ्च जारी रहने अपेक्षा गरिएको छ ।