फ्रान्स क्वार्टरफाइनलमा, पाराग्वेको कडा चुनौती पार

सुपरस्टार किलियन एमबाप्पेको दोस्रो हाफमा पेनाल्टीमार्फत गरेको निर्णायक गोलको मद्दतले फ्रान्सले पाराग्वेलाई १–० ले पराजित गर्दै विश्वकप फुटबलको क्वार्टरफाइनलमा स्थान सुरक्षित गरेको छ । अब फ्रान्सले अन्तिम आठमा मोरक्कोसँग प्रतिस्पर्धा गर्नेछ ।
अत्यधिक गर्मीका बीच भएको खेलमा पाराग्वेले सुरुदेखि नै रक्षात्मक रणनीति अपनाउँदै फ्रान्सका आक्रमणकारी खेलाडीलाई खुला अवसर सिर्जना गर्न दिएन । पहिलो हाफभर दुवै टोलीले निकै कम अवसर बनाएका थिए भने खेल पटक–पटक फाउल, खेल रोकावट र खेलाडीबीचको भनाभनले प्रभावित बन्यो ।
फ्रान्सका प्रशिक्षक डिडिएर डेसचाम्प्सले टोलीको आक्रामक संयोजनमा ठूलो परिवर्तन नगरी आफ्ना खेलाडीलाई पाराग्वेको कडा रक्षात्मक शैली तोड्ने जिम्मा दिए । तर पहिलो हाफमा एमबाप्पे, उस्मान डेम्बेले, माइकल ओलिसे र ब्राड्ली बार्कोलाको आक्रमण प्रभावहीन रह्यो ।
खेलको ६०औं मिनेटपछि डेसचाम्प्सले डेसिरे डुएलाई मैदानमा उतारेपछि फ्रान्सको आक्रमणमा गति आयो । ७०औं मिनेटमा डुएमाथि पेनाल्टी क्षेत्रमा डिएगो गोमेजले फाउल गरेपछि भिडियो सहायक रेफ्री (भीएआर) को समीक्षापश्चात् फ्रान्सले पेनाल्टी पायो । त्यसलाई एमबाप्पेले सहज रूपमा गोलमा परिणत गर्दै टोलीलाई अग्रता दिलाए, जुन अन्ततः विजयी गोल बन्यो ।
यो गोलसँगै एमबाप्पेले प्रतियोगितामा आफ्नो गोल संख्या सात पु¥याउँदै गोल्डेन बुट दौडमा अर्जेन्टिनाका लियोनेल मेसीसँग बराबरी गरेका छन् । साथै उनी र मेसी विश्वकपका दुई फरक संस्करणमा सात वा सोभन्दा बढी गोल गर्ने दुर्लभ कीर्तिमान बनाउने खेलाडी पनि बने ।
पाराग्वेले जर्मनीलाई हराएर अन्तिम १६ मा पुगेको आत्मविश्वासलाई निरन्तरता दिने प्रयास गरेको थियो । समय खेर फाल्ने, खेलको लय बिगार्ने र कडा ट्याकलमार्फत फ्रान्सलाई दबाबमा राख्ने रणनीतिले करिब ७० मिनेटसम्म सफलता पनि दिलायो । तर एउटै गल्ती महँगो साबित भयो ।
डेसचाम्प्सले आफ्ना खेलाडीले उत्तेजनामा नफसी धैर्यतापूर्वक खेल्नु नै जितको मुख्य कारण भएको बताए । एमबाप्पेले पनि फ्रान्स आकर्षक आक्रमण मात्र होइन, कठिन परिस्थितिमा संघर्ष गरेर नतिजा निकाल्न सक्ने टोली भएको प्रमाणित गरेको प्रतिक्रिया दिए ।
सन् १९९८ को विश्वकपमा पनि फ्रान्सले अन्तिम १६ मा पाराग्वेलाई कठिन संघर्षपछि पराजित गर्दै उपाधियात्रा अघि बढाएको थियो । यसपटकको कठिन जितले पनि फ्रान्सलाई मानसिक रूपमा अझ बलियो बनाएको र उपाधि यात्रामा महŒवपूर्ण मोड साबित हुन सक्ने विश्लेषण गरिएको छ ।