एम्बाप्पेविरुद्ध यामाल र मेस्सीविरुद्ध केनको खेल सर्वाधिक चासोमा

यो विश्वकपको सेमिफाइनल खेल इतिहासमै सम्झन लायक हुनेछ ।
चार अघिल्ला च्याम्पियन र विश्वका उत्कृष्ट चार टोली । शीर्ष छ गोलकर्तामध्ये पाँच, एक सर्वकालीन महान् खेलाडी फुटबल इतिहासकै सबैभन्दा कडा प्रतिस्पर्धी टोलीहरू ।
अर्जेन्टिना, स्पेन, फ्रान्स र इंग्ल्यान्ड फिफा वरीयताको शीर्ष चार टोलीका रूपमा यस प्रतियोगितामा प्रवेश गरेका थिए र अब फेरि विश्व च्याम्पियन बन्न दुई जितको दूरीमा छन् । यी सेमिफाइनल खेलहरूमा कसले जित्छ भनेर अनुमान लगाउन धेरै गाह्रो छ । मंगलबार टेक्ससको आर्लिङटनमा फ्रान्सले स्पेनसँग खेल्नेछ भने बुधबार एटलान्टामा इंग्ल्यान्डले अर्जेन्टिनाको सामना गर्नेछ ।
सन् १९९० पछि पहिलो पटक विश्वकपको अन्तिम चारमा सबै अघिल्ला विजेताहरू मात्र पुगेका हुन् । त्यतिबेला इंग्ल्यान्ड र अर्जेन्टिना पनि पुगेका थिए, तर उनीहरूबीच खेल भने भएको थिएन । त्यतिबेला पनि अहिले जस्तै अर्जेन्टिना साविक विजेता थियो । सन् १९८६ को फाइनलमा मेक्सिकोमा पश्चिम जर्मनीलाई हराएको अर्जेन्टिना सन् १९९० को फाइनलमा भने पश्चिम जर्मनीसँगै पराजित भएको थियो ।
यदि फ्रान्स र अर्जेन्टिना दुवै फाइनलमा पुगे भने यस वर्ष पनि सन् २०२२ कै फाइनल दोहोरिने सम्भावना छ ।
इंग्ल्यान्ड विरुद्ध अर्जेन्टिनाः एक कडा प्रतिस्पर्धा
फुटबल मैदानभन्दा बाहिर पनि यी दुई देशबीच गहिरो दुश्मनी छ, जुन विशेषगरी सन् १९८२ को फकल्यान्ड टापुको द्वन्द्वसँग जोडिएको छ । यो खेल जित्न अर्जेन्टिनाले इंग्ल्यान्डको कठिन चुनौती पार गर्नैपर्छ ।
विश्वकपको मञ्चमा यी दुई टोलीबीच मैदानभित्र पनि धेरै पटक तनाव भएको छ । सन् १९६६ को क्वाटरफाइनलमा तत्कालीन अर्जेन्टिनी कप्तान एन्टोनियो र्याटिनलाई (जसको शनिबार निधन भएको खबर आएको थियो) रातो कार्ड दिइएको थियो । उक्त खेलमा इंग्ल्यान्ड १–० ले विजयी भएको थियो र इंग्लिस म्यानेजर अल्फ राम्सेले आफ्ना खेलाडीहरूलाई विपक्षीसँग जर्सी साट्नबाट रोकेका थिए ।
त्यसको २० वर्षपछि, सन् १९८६ को क्वाटरफाइनलमा डिएगो म्याराडोनाको चर्चित ‘ह्यान्ड अफ गड’ गोलको मद्दतले अर्जेन्टिनाले इंग्ल्यान्डलाई २–१ ले हरायो र पछि उपाधि नै जित्यो ।
सन् १९९८ मा अर्जेन्टिनाका मिडफिल्डर डिएगो सिमोनेलाई लात्ती हानेको आरोपमा डेभिड बेकहमलाई रातो कार्ड दिइएको थियो । सामान्य छोएको भरमा सिमोनेले गरेको नाटकका कारण बेलायती मिडियाले उनको चर्को आलोचना गरेका थिए । उक्त राउन्ड अफ १६ को खेल अर्जेन्टिनाले पेनाल्टीमा जितेको थियो ।
चार वर्षपछि बेकहमले त्यसको बदला लिए । उनले पेनाल्टीमा गोल गर्दा इंग्ल्यान्ड १–० ले विजयी भयो, जसको कारण अर्जेन्टिना समूह चरणबाटै बाहिरिन पुग्यो ।
फ्रान्सविरुद्ध स्पेनः फ्रान्सलाई बदला लिने छिटो मौका
युरोपेली च्याम्पियनसिप (युरोकप) मा भिडेको ठीक दुई वर्षपछि फ्रान्स र स्पेन फेरि अर्को ठूलो प्रतियोगिताको सेमिफाइनलमा भिड्दैछन् ।
त्यतिबेला स्पेन २–१ ले विजयी भएको थियो, जसमा तत्कालीन १६ वर्षीय लामिन यामालले गोल गरेका थिए । स्पेनले फाइनलमा इंग्ल्यान्डलाई हराएर युरोकपको उपाधि जितेको थियो ।
उक्त प्रतियोगितामा नाक भाँच्चिएका कारण किलियन एम्बाप्पेले सोचेजस्तो प्रदर्शन गर्न सकेका थिएनन् भने माइकल ओलिसे र डेसिरे डुए जस्ता उदीयमान स्टारहरूले आफ्नो पहिचान बनाइसकेका थिएनन् ।
दुई वर्षपछि, फ्रान्सलाई यस विश्वकपको सबैभन्दा उत्कृष्ट टोली मानिएको छ । उत्कृष्ट आक्रामक खेलाडीहरू र सर्वाधिक गोलकर्ताको सूचीमा रहेका एम्बाप्पेसहितको यो टोली फ्रान्सको राष्ट्रिय दिवस ’बास्टिल डे’ को अवसरमा सेमिफाइनल खेल्दैछ ।
यसको ठीक उल्टो, स्पेनले प्रतियोगितामा आउनुअघि यामाल र अर्का विंगर निको विलियम्सको चोटको सामना गर्नुपरेको थियो । पछिल्ला दुई खेलमा पोर्चुगल र बेल्जियमलाई हराउन स्पेनले वैकल्पिक खेलाडी मिकेल मेरिनोले ढिलो गरी गरेका गोलहरूमा भर पर्नुपरेको थियो ।
विश्वकप वा युरोकपमा यी दुई राष्ट्र धेरै पटक भिडेका छन् । सन् १९८४ को युरोकप फाइनलमा फ्रान्सले स्पेनलाई हराएको थियो ।
गोल्डेन बुटको दौड
विश्वका धेरै उत्कृष्ट गोलकर्ताहरू राम्रो लयमा देखिएकाले प्रतियोगिता भित्रै यो दौड पनि निकै रोमाञ्चक बनेको छ ।
एर्लिङ हालाण्ड यो दौडबाट बाहिरिएका हुन सक्छन्, तर शीर्ष छ गोलकर्तामध्ये पाँच जना अझै प्रतियोगितामा छन् र अन्य खेलाडीहरूले पनि गोल्डेन बुटको दौडमा आफूलाई उभ्याउन सक्छन् ।
आठ–आठ गोलसहित एम्बाप्पे र लियोनेल मेस्सी सबैभन्दा अगाडि छन् । हालाण्डको सात गोल छ, तर क्वाटरफाइनलमा नर्वे इंग्ल्यान्डसँग हारेर बाहिरिएकाले उनले गोल थप्न सक्दैनन् ।
जुड बेलिंगहम र ह्यारी केनको छ–छ गोल छ भने ओसमान डेम्बेलेको पाँच गोल छ ।
मिकेल ओयारजाबालको चार गोल छ, त्यसैले यदि स्पेनले सेमिफाइनलमा फ्रान्सलाई हरायो भने उनले पनि चुनौती दिन सक्छन् ।
यसका साथै विश्वकपको इतिहासमै सर्वाधिक गोलकर्ता बन्ने प्रतिस्पर्धा पनि छ, जसमा मेस्सीको २१ गोल छ भने एम्बाप्पेको २० गोल छ ।
महान् मेस्सी
धेरैले उनलाई सर्वकालीन महान् खेलाडी मानिसकेका छन् र ३९ वर्षको उमेरमा उनको सम्भवतः यो अन्तिम विश्वकपको प्रदर्शनले त्यसलाई अझ बलियो बनाएको छ । मेस्सीले इंग्ल्यान्डविरुद्ध खेल्न लागेको यो पहिलो पटक हुनेछ ।
यदि मेस्सीले अर्जेन्टिनालाई उपाधि दिलाउन सके भने, आफ्नो देशका लागि दुईवटा विश्वकप जितेर उनले महान् म्याराडोनालाई उछिन्नेछन् ।
साथै, अर्जेन्टिना सन् १९५८ र १९६२ मा ब्राजिलपछि लगातार दुई पटक विश्वकप जित्ने पहिलो टोली बन्नेछ ।
फुटबलका महान खेलाडी पेले ती ब्राजिलियन टोलीका हिस्सा थिए र उनले सन् १९७० मा तेस्रो विश्वकप पनि जितेका थिए ।