खेलकुद
फिफा विश्वकपः गोल्डेन बुट एमबाप्पेलाई , सर्वोत्कृष्ट खेलाडी स्पेनका रोड्री
सोमबार, साउन ४, २०८३ ०७:१७
काठमाडौं । फिफा विश्वकप २०२६ को फाइनलमा अर्जेन्टिनाका कप्तान लियोनल मेसी गोल गर्नबाट रोकिएपछि फ्रान्सका स्टार फरवार्ड किलियन एमबाप्पेले लगातार दोस्रो पटक विश्वकपको गोल्डेन बुट उपाधि जित्न सफल भएका छन् । यद्यपि टोली भने उपाधिविहीन रह्यो भने स्पेनले अर्जेन्टिनालाई अतिरिक्त समयमा पराजित गर्दै दोस्रो पटक विश्वकपको ट्रफी उचालेको छ ।
तेस्रो स्थानका लागि भएको खेलमा फ्रान्स इङ्गल्यान्डसँग ६–४ ले पराजित भए पनि एमबाप्पेले दुई गोल गर्दै प्रतियोगितामा आफ्नो कुल गोल संख्या १० पुर्याएका थिए । फाइनलमा मेसी गोल गर्न नसक्दा उनी गोलकर्ताको सूचीमा ८ गोलमै सीमित भए र एमबाप्पे शीर्ष स्थानमा यथावत् रहे ।
यससँगै एमबाप्पेले सन् २०२२ र २०२६ गरी लगातार दुई संस्करणमा विश्वकपको गोल्डेन बुट जित्ने इतिहास बनाएका छन् । विश्वकप इतिहासमा यस्तो उपलब्धि हासिल गर्ने उनी पहिलो खेलाडी बनेका हुन् ।
गोलकर्ताको सूचीमा मेसी ८ गोलसहित दोस्रो स्थानमा रहे भने नर्वेका अर्लिङ हालान्ड तथा इङ्गल्यान्डका जुड बेलिङ्घमले समान ७–७ गोल गरे । इङ्गल्यान्डका ह्यारी केन र फ्रान्सकै ओसमान डेम्बेलेले समान ६–६ गोल गर्दै प्रतियोगिता पूरा गरे ।
एमबाप्पेले प्रतियोगिताको सुरुआत सेनेगलविरुद्ध दुई गोल गर्दै गरेका थिए । त्यसपछि इराकविरुद्ध पनि दुई गोल गरे । नकआउट चरणमा स्विडेनविरुद्ध दुई गोल, पाराग्वेविरुद्ध पेनाल्टीमार्फत एक गोल तथा मोरक्कोविरुद्ध एक गोल गर्दै उनले आफ्नो गोल संख्या आठ पुर्याएका थिए ।
तेस्रो स्थानको खेलमा पहिलो हाफमै ४–० ले पछि परेको फ्रान्सका लागि पुनरागमनको प्रयास गर्ने क्रममा उनले थप दुई गोल गरे । यद्यपि फ्रान्स हार टार्न भने सफल भएन।
यसअघि कतारमा सम्पन्न सन् २०२२ को विश्वकप फाइनलमा अर्जेन्टिनाविरुद्ध ह्याट्रिक गर्दै एमबाप्पेले पहिलो पटक गोल्डेन बुट जितेका थिए । चार वर्षपछि पनि उनले आफ्नो गोल गर्ने क्षमता कायम राख्दै फेरि एकपटक व्यक्तिगत रूपमा विश्वकपको सबैभन्दा सफल स्ट्राइकरका रूपमा आफूलाई स्थापित गरेका छन् ।
स्पेनलाई उपाधिसँगै व्यक्तिगत अवार्डको वर्षा
विश्वकप फाइनलमा अर्जेन्टिनालाई अतिरिक्त समयमा १–० ले पराजित गर्दै स्पेनले आफ्नो इतिहासमा दोस्रो पटक विश्वकपको उपाधि जित्यो । स्पेनका लागि अतिरिक्त समयमा फेरान टोरेसले निर्णायक गोल गर्दै टोलीलाई ऐतिहासिक सफलता दिलाए ।
टिमको सामूहिक सफलतासँगै व्यक्तिगत अवार्डमा पनि स्पेनका खेलाडीहरूको वर्चस्व रह्यो ।
स्पेनका अनुभवी मिडफिल्डर रोड्रिले प्रतियोगिताकै उत्कृष्ट खेलाडी बन्दै गोल्डेन बल जिते। युवा डिफेन्डर पाउ कुबार्सी उत्कृष्ट युवा खेलाडी घोषित भए भने स्पेनका गोलकिपर उनाई सिमोनले प्रतियोगिताभर सात खेलमा केवल एक गोल मात्र बेहोर्दै गोल्डेन ग्लोभ्स अवार्ड आफ्नो नाममा पारे ।
यसरी टोलीगत रूपमा विश्वकपको उपाधि जितेको स्पेनले व्यक्तिगत विधाका अधिकांश प्रमुख सम्मान पनि आफ्नो पक्षमा पार्दै फिफा विश्वकप २०२६ मा पूर्ण प्रभुत्व स्थापित गरेको छ ।
प्रकाशित मिति: सोमबार, साउन ४, २०८३ ०७:१७
प्रतिक्रिया दिनुहोस्
थप खेलकुद
फिफा विश्वकपको उपाधि स्पेनलाई, अर्जेन्टिना पराजित
सोमबार, साउन ४, २०८३
फिफाका निर्णयदेखि भीएआरसम्म प्रश्नै–प्रश्न
सोमबार, साउन ४, २०८३-1784250448.webp)
विश्वकप ट्रफीको अविश्वसनीय इतिहास
शुक्रबार, साउन १, २०८३
भर्खरै
- सार्वजनिक विदा पुनरावलोकन गर्न कार्यदल गठन
- देशको आर्थिक विकासमा पुँजी बजारको महत्त्वपूर्ण भूमिका : प्रधानमन्त्री शाह
- नेप्सेमा उच्च अंकको वृद्धि, कारोबार रकम ५ अर्ब ५१ करोडमाथि
- साउनको पहिलो सोमबार, पशुपतिनाथमा बिहानैदेखि दर्शनार्थीको घुइँचो
- मनसुनी वायुको प्रभाव कायमै, केही स्थानमा मध्यमदेखि भारी वर्षाको सम्भावना
- फिफा विश्वकपः गोल्डेन बुट एमबाप्पेलाई , सर्वोत्कृष्ट खेलाडी स्पेनका रोड्री
- आर्थिक गतिविधि विस्तारमार्फत जीडीपी बढाउने मधेसको योजना
- झापाका किसानलाई रासायनिक मलको अभाव
साताको लोकप्रिय
-1784246696.jpg)
