अब पालो महिला विश्वकपको

हालै सम्पन्न पुरुष विश्वकपमा स्पेन च्याम्पियन बनेपछि अब फुटबलको ध्यान अर्को वर्ष ब्राजिलमा हुने महिला विश्वकपतर्फ मोडिएको छ । तीन वर्षअघि सम्पन्न महिला विश्वकपमा पनि स्पेनले उपाधि जितेको थियो । सिड्नीमा भएको सन् २०२३ को फाइनलमा स्पेनले इंग्ल्यान्डलाई १–० ले पराजित गर्दै पहिलो पटक महिला विश्वकप जितेको थियो ।
हाल विश्व वरीयताको पहिलो स्थानमा रहेको स्पेनको टोलीमा बालोन डी’ओर विजेता आइताना बोनमाती र अलेक्सिया पुटेलाससँगै युवा स्टार साल्मा पारालुएलो जस्ता प्रतिभाशाली खेलाडी छन् । पुरुष विश्वकपको फाइनलपछि दिएको टेलिभिजन अन्तर्वार्तामा स्पेनका स्टार मिडफिल्डर रोड्रीले बोनमातीको खुलेर प्रशंसा गर्दै भने, ‘म उनको स्तरसम्म पुग्न सक्छु कि भनेर प्रयास गरिरहेको छु ।’
सन् २०२३ को महिला विश्वकप अमेरिकाका लागि भने सुखद रहेन । चारपटकको विश्व च्याम्पियन अमेरिका अन्तिम १६ मा स्विडेनसँग पराजित हुँदै प्रतियोगिताबाट बाहिरिएको थियो । त्यसका बाबजुद अमेरिका हाल विश्व वरीयताको दोस्रो स्थानमा छ । अमेरिकाले आगामी अक्टोबरमा स्पेनसँग दुई मैत्रीपूर्ण खेल खेल्नेछ । ती खेलहरू नोभेम्बरको अन्त्यदेखि टेक्सासमा सुरु हुने कन्काकाफ विश्वकप छनोटको तयारीका रूपमा हेरिएका छन् । अमेरिकी मिडफिल्डर लिली योहान्नेसले स्पेन उत्कृष्ट टोली भएको भन्दै उनीहरूविरुद्ध खेल्नु आफूहरूको लागि महŒवपूर्ण तयारी हुने बताइन् । उनले च्याम्पियन्स लिगमा स्पेनका धेरै खेलाडीविरुद्ध खेलिसकेको र उनीहरूको स्तरबारे राम्रोसँग जानकार रहेको पनि उल्लेख गरिन् ।
ब्राजिलतर्फको यात्रा
महिला विश्वकप छनोट प्रक्रिया तीव्र रूपमा अघि बढिरहेको छ । आयोजक ब्राजिलसहित हालसम्म १४ टोलीले विश्वकपमा स्थान सुरक्षित गरिसकेका छन् । आयोजकका रूपमा स्वतः छनोट भएको ब्राजिलले भने अहिलेसम्म महिला विश्वकपको उपाधि जित्न सकेको छैन ।
ब्राजिल महिला विश्वकपकी लिगेसी तथा सरोकारवाला मामिला कार्यकारी निर्देशक तथा पूर्व डिफेन्डर एलिन पेल्लेग्रिनोले पुरुष र महिलाबीचका अवसरहरू पहिले समान नभए पनि अवस्था परिवर्तन हुँदै गएको बताइन् । उनका अनुसार यो विश्वकपले महिला फुटबललाई नयाँ उचाइमा पु¥याउने ठूलो सम्भावना बोकेको छ । फिफा, ब्राजिल सरकार र आयोजक सहरहरूले रंगशाला भरिभराउ बनाउन र प्रतियोगिता सफलतापूर्वक सञ्चालन गर्न व्यापक तयारी गरिरहेका छन् ।
ब्राजिलका लागि सबैभन्दा ठूलो चासो भने अनुभवी कप्तान मार्टाको भविष्य हो । राष्ट्रिय टोलीकी सर्वाधिक १२२ गोल गर्ने मार्टाले पेरिस ओलम्पिकको स्वर्ण पदक खेलमा अमेरिकासँग १–० ले पराजित भएपछि अन्तर्राष्ट्रिय फुटबलबाट संन्यास लिएकी थिइन् । तर त्यसको अर्को वर्ष कोपा अमेरिका फेमेनिनाका लागि टोलीमा फर्किएकी थिइन् । विश्वकप सुरु हुँदा उनी ४१ वर्षकी हुनेछिन् ।
गत जुनमा अमेरिकाले ब्राजिल भ्रमण गरी दुई मैत्रीपूर्ण खेल खेलेको थियो । पहिलो खेलमा साओ पाउलोमा २–१ ले पराजित भएको अमेरिका दोस्रो खेलमा फोर्टालेजामा १–० ले विजयी भएको थियो । अमेरिकी प्रशिक्षक एम्मा हेजले प्रतिकूल वातावरणमा खेल्दा आउने चुनौती स्वीकार गर्न सिक्नुपर्ने बताएकी थिइन् ।
हालसम्म छनोट भएका टोली
हालसम्म अस्ट्रेलिया, फिलिपिन्स, जापान, उत्तर कोरिया, चीन, दक्षिण कोरिया, अर्जेन्टिना, कोलम्बिया, न्युजिल्यान्ड, जर्मनी, फ्रान्स, स्पेन र डेनमार्कसहित १४ राष्ट्रले महिला विश्वकपमा स्थान सुरक्षित गरिसकेका छन् । सन् २००३ र २०११ को विश्व च्याम्पियन जर्मनी हाल विश्व वरीयताको तेस्रो स्थानमा छ ।
ब्राजिलले यसअघि सन् २०१४ मा पुरुष विश्वकप र २०१६ मा ओलम्पिक आयोजना गरिसकेको छ । अर्को वर्ष महिला विश्वकपका खेलहरू हुने आठवटै सहर—रियो दि जेनेरियो, साओ पाउलो, बेलो होरिजोन्टे, ब्रासिलिया, फोर्टालेजा, पोर्टो आलेग्रे, रेसीफे र साल्भाडोर—ले २०१४ को पुरुष विश्वकपका खेल पनि आयोजना गरेका थिए ।
अर्को वर्षको महिला विश्वकप ३२ टोलीको ढाँचामा हुने अन्तिम संस्करण हुनेछ । त्यसपछि पुरुष विश्वकपझैं प्रतियोगिता ४८ टोलीमा विस्तार गरिनेछ । सन् २०३१ को महिला विश्वकप अमेरिका, मेक्सिको, कोस्टारिका र जमैकाले संयुक्त रूपमा आयोजना गर्ने अपेक्षा गरिएको छ भने यसको औपचारिक घोषणा आगामी नोभेम्बरमा हुने सम्भावना छ ।