क्यान्सर अस्पतालमा प्रदेश सरकारको ठूलो प्रतिबद्धता, भौतिक संरचनामा लगानी गर्न तयार

नेपालगन्ज । लुम्बिनी प्रदेश सरकारका भौतिक पूर्वाधारमन्त्री रत्न खत्रीले बहुवर्षीय योजनाअन्तर्गत ‘सुशील कोइराला प्रखर क्यान्सर अस्पताल’मा भौतिक संरचना निर्माणमा प्रदेश सरकार सकारात्मक रहेको बताएका छन् ।
बाँकेको खजुरास्थित क्यान्सर अस्पतालको आज स्थलगत अनुगमन गर्दै मन्त्री खत्रीले अस्पतालबाट माग भएमा आवश्यकताअनुसार बहुवर्षीय योजनाअन्तर्गत भौतिक संरचना निर्माणमा प्रदेश सरकारले लगानी गर्ने प्रतिबद्धता व्यक्त गरेका छन् । उनले बाँकेमा प्रदेश सरकारअन्तर्गत कुनै स्वास्थ्य संस्था नभएको उल्लेख गर्दै अस्पताल प्रशासनलाई प्रस्तावना लिएर प्रदेश राजधानी आउन आग्रह गरेका छन् ।
यसअघिका अस्पतालका अधिकारीहरुले प्रदेश सरकारबाट कुनै पहलकदमी नगरेका कारण खजुरा क्यान्सर अस्पतालमा प्रदेश सरकारको उपस्थिति नदेखिएको उनको भनाइ थियो । मन्त्री खत्रीले क्यान्सर अस्पताल सङ्घीय सरकारअन्तर्गत भए पनि अस्पतालले सबैभन्दा बढी लुम्बिनी प्रदेशकै नागरिकलाई सेवा दिइरहेको बताउँदै प्रदेश सरकार अस्पतालमा सहकार्य गर्न तयार रहेको स्पष्ट पारेका छन् ।
अस्पताल परिसरमा स्वागत गर्दै खजुरा क्यान्सर अस्पतालका कार्यकारी निर्देशक डा. नीरज भट्टराईले निकै थोरै जनशक्तिबाट अस्पतालले उत्कृष्ट सेवा दिँदै आएको जानकारी दिएका छन् । उनले सङ्घीय सरकारको पूर्ण स्वामित्वको अस्पताल भए पनि अस्पतालले स्वीकृत दरबन्दी पाउन नसकेको उल्लेख गर्दै सीमित स्रोतसाधनबाट अधिक कार्यसम्पादन हुँदै आएको बताएका छन् । उनले चार हजार ६०० बिरामीलाई सेवा दिएर सुरु भएको अस्पतालले हाल ४० हजार बढी क्यान्सरका बिरामीलाई सेवा दिइरहेको उल्लेख गरेका छन् । थप जनशक्ति र उपकरण प्राप्त हुने क्रममा रहेको जनाउँदै अस्पताललाई पूर्ण सेवा दिन भौतिक संरचनाको कमी रहेको कार्यकारी निर्देशक डा. भट्टराईको भनाइ छ ।
कार्यकारी निर्देशक डा. भट्टराईले लुम्बिनीसहित कर्णाली र सुदूरपश्चिम प्रदेशका क्यान्सरका बिरामीको प्रमुख उपचारस्थल बनेको अस्पतालमा प्रदेश सरकारको उपस्थिति आवश्यक रहेको औँल्याएका छन् । देशैभरमा लुम्बिनी प्रदेश सरकारले क्यान्सरका बिरामीलाई सबैभन्दा बढी उपचार खर्च उपलब्ध गराएकोमा आभार प्रकट गर्दै उनले अस्पतालमा आवश्यक भौतिक पूर्वाधार निर्माणमा पनि प्रदेश सरकारको सहयोगको अपेक्षा गरेका छन् ।
मन्त्री खत्रीले अस्पतालका विभिन्न कक्षहरुको स्थलगत अनुगमन गर्दै नागरिकलाई गुनासोरहित सेवा प्रदान गर्न अस्पतालका स्वास्थ्यकर्मी र कर्मचारीहरुलाई आग्रह गरेका छन् ।
यसैबीच, बाँके र बर्दियामा क्रियाशील यातायात व्यवसायीले क्यान्सर रोगका बिरामीलाई निःशुल्क यातायात सेवा दिने भएका छन् । सुशील कोइराला प्रखर क्यान्सर अस्पतालको आह्वानमा भएको यातायात व्यवसायी र अस्पताल प्रशासनबीच भएको बैठकमा यातायात व्यवसायीहरुले क्यान्सरका बिरामीका लागि निःशुल्क यातायात सेवा दिने प्रतिबद्धता व्यक्त गरेका हुन् ।
बैठकले नेपालगन्जबाट खजुरा हुँदै गुलरिया, राजापुरसहित सुदूरपश्चिम चल्ने सवारीसाधन अनिवार्य खजुरा क्यान्सर गेट हुँदै सञ्चालन गर्ने निर्णय गरेको छ । क्यान्सरको उपचारका लागि अस्पताल आउने बिरामीको सहजताका लागि खजुरा रुट भएर चल्ने मझौला र साना सवारीसाधन क्यान्सर गेटसम्म पुगेर सञ्चालन गर्ने निर्णय भएको नेपाल यातायात व्यवसायी राष्ट्रिय महासङ्घका केन्द्रीय सचिव टङ्क बस्यालले जानकारी दिएका छन् ।