संशयबीच देउवा बिहीबार आइपुग्दै

काठमाडौं । पूर्व प्रधानमन्त्री एवम् कांग्रेसका पूर्व सभापति शेरबहादुर देउवा स्वदेश फर्कने भएका छन्  । आगामी बिहीबार दिउँसो काठमाडौं आइपुग्ने भएका हुन् । फागुन २१ को निर्वाचनअघि स्वाथ्योपचारको फलोअपका लागि भन्दै सिंगापुर गएर उतैबाट हङकङ पुगेका थिए ।
यसअघि आगामी मंगलबार बेलुकी ९ः४५ बजे काठमाडौं आइपुग्ने तय भएको उनको आगमन तालिका संशोधन भएको हो । लगातार दबाब दिँदा पनि सभापति गगन थापाले पार्टी केन्द्रीय समितिमा समायोजनका लागि माग अस्वीकार गरेको भन्दै देउवा पक्षधरले संस्थापनसँग असन्तुष्टको राष्ट्रिय भेला बोलाएको छ । काठमाडौंमा आगामी शुक्रबार हुने भेलाको संयोजक डा. शशांक कोइराला छन् । भेलालाई देउवाले सम्बोधन गर्ने संयोजक डा. कोइरालाले बताए । 
जेनजी आन्दोलनको मौकामा देउवा निवासमा पसेको भीडले भदौ २४ मा शेरबहादुर र आरजु देउवामाथि आक्रमणमा गरेको थियो । उक्त घटनामा दुवै घाइते भएका थिए । केही साता काठमाडौंमा उपचार गराएका देउवा दम्पती थप उपचारका लागि सिंगापुर गएका थिए । पहिलोपटक गएर फर्किए पनि दोस्रोपटक फलोअपका लागि भन्दै गत फागुन १३ मा सिंगापुरका लागि उडेका देउवा फर्किएका छैनन् । शेरबहादुर सिंगापुर जाँदा आरजु भारतमा थिइन । यनी पनि उतैबाट सिंगापुर पुगेकी थिइन । त्यहाँबाट हङकङ पुगेका देउवा दम्पतीमा शेरबहादुर करिब पाँच महिनापछि स्वदेश फर्कन लागेका हुन् ।
यसबीच सरकारले दुवैलाई पक्राउ गर्न इन्टरपोलबाट प्रक्रिया अघि बढाएको थियो । तर, राजनीतिक प्रतिशोधका कारण गर्न खोजिएको पक्राउमा नेपाल सरकारले मनासिब कारण पेस गर्न नसक्दा इन्टरपोलले रेड कर्नर नोटिस जारी गर्न मानेन । 
फागुन २१ को प्रतिनिधिसभा निर्वाचनमा पार्टीले अनपेक्षित पराजय भोग्नु प¥यो । टिकट पाएर उठेका पार्टीका अधिकांश नेताहरु पराजित भए । केन्द्रीय कार्य समिति सबै सोत्तर बन्यो । 
देउवा पक्षधर भए पनि नयाँ नेतृत्वबाट टिकट पाएका नेताहरुले पराजयको दोष सभापति थापालाई दिइरहेका छन् । विशेष महाधिवेशनबाट आएको कार्यसमितिलाई सुरुमा निर्वाचन आयोगमै दिएको चुनौती सर्वोच्च अदालतबाट सदर भएसँगै मत्थर थियो । अब उक्त निर्णयमाथि पुनरावेदनको माग सर्वोच्च अदालतले मानेर पुनः सुनुवाइ गर्ने भएपछि देउवा पक्ष हौसिएको छ । त्यही मेसोमा भेलाको आयोजना गरेका नेताहरु देउवाको स्वदेश फिर्ती टुंगो लाग्दा भव्य स्वागतको तयारीमा छन् । 
विमानस्थलमा देउवालाई स्वागत गर्न ठूलो संख्यामा नेता–कार्यकर्ता उपस्थित गराउने तयारी रहेकाले रातिको समयलाई यताबाट संशोधन गर्न आग्रह गरिएको थियो । त्यसैअनुसार उनको टिकट सारिएको हो । कांग्रेस नेता डा. प्रकाशशरण महत नेपाल फर्कँदा स्वागतका लागि विमानस्थल पुग्न कार्यकर्ताहरुलाई अपील समेत गरिसकेका छन् । ‘पहिला २६ गते राति ९ बजेर ४५ मिनेटको थियो । सबैले दिउँसो आउनुपर्छ भनेपछि संशोधन भयो,’ नेता महतले भने, ‘अब २८ गते बैंकक हुँदै थाई एयरलाइन्सबाट दिउँसो १२ बजेर २५ मिनेटमा ल्याण्ड गर्ने तालिका छ । हामी १२ बजेभन्दा अगाडि नै एयरपोर्ट पुग्छौं ।’
तत्कालीन कांग्रेस प्रचार विभाग प्रमुख मीन विश्वकर्माले देउवा साउन २८ दिउँसो नेपाल आउने निश्चित भएको बताए । देउवा लामो समयपछि नेपाल फर्कन लागेकाले उनको स्वागतका लागि ठूलो संख्यामा नेता–कार्यकर्ता विमानस्थलमा उपस्थित गराउने इतरपक्षको तयारी छ । स्वागतका लागि उपयुक्त समय मिलाउनकै लागि यसअघि तय भएको २६ साउन राति ९ः४५ बजेको उडानको टिकट संशोधन गरिएको छ । 
जेनजी आन्दोलनका क्रममा आक्रमणमा घाइते तत्कालीन परराष्ट्रमन्त्री  आरजु राणा देउवा भने हङकङमै रहने बताइएको छ । 
कांग्रेस पूर्वमहामन्त्री एवम् इतरपक्षले आयोजना गरेको राष्ट्रिय भेलाका संयोजक डा. शशांक कोइरालाले देउवालाई विमानस्थलमा पक्राउ गर्न खोजिए कांग्रेसले प्रतिवाद गर्ने बताएका छन् । उनले इतरसमूहको कार्यालय चुनदेवीमा शनिबार आयोजित पत्रकार सम्मेलनमा देउवाले राष्ट्रिय भेलालाई सम्बोधन गर्ने भन्दै धरपकड भए प्रतिरोध गर्ने चेतावनी दिएका छन् । 
केही समयअघि देउवाविरुद्ध सरकारले रेडकर्नर नोटिस जारी गर्न प्रयास गरेको थियो । तर इन्टरपोलले त्यसलाई अस्वीकार गरेको थियो । गत चैत अन्तिम साता बालेन शाह नेतृत्वको सरकार बनेपछि देउवा दम्पतीविरुद्ध सम्पत्ति शुद्धीकरणको छानबिनमा पक्राउ पुर्जी जारी भएको थियो । गैरकानुनी सम्पत्ति आर्जनको अनुसन्धानको सिलसिलामा सम्पत्ति शुद्धीकरण अनुसन्धान विभागले उनीहरुविरुद्ध जिल्ला अदालत काठमाडौंबाट पक्राउ पुर्जी लिएको थियो । उक्त पुर्जीविरुद्ध सर्वोच्च अदालतले पूर्वप्रधानमन्त्री देउवा र उनकी पत्नी आरजुलाई पक्राउ नगर्न अन्तरिम आदेश जारी गरेको थियो । 
यता, देउवा स्वदेश फर्किने तयारीमा रहेका बेला उनीविरुद्ध कुनै कानुनी मुद्दा वा पक्राउ पुर्जी रहे नरहेको विषयमा अनुसन्धान भइरहेको प्रहरी प्रधान कार्यालयले जनाएको छ । शुक्रबार प्रहरी प्रधान कार्यालयमा आयोजित पत्रकार सम्मेलनमा प्रहरी प्रवक्ता अविनारायण काफ्लेले देउवाविरुद्ध मुद्दा वा पक्राउ पुर्जी रहे–नरहेको विषयमा रेकर्ड हेरिरहेको बताएका हुन् । देउवा स्वदेश फर्किएपछि उनलाई पक्राउ गर्ने वा अनुसन्धानको दायरामा ल्याउने कुनै आधार छ कि छैन भन्ने सञ्चारकर्मीको प्रश्नमा उनले भने– ‘हामी यसबारे रेकर्डहरू हेर्दैछौँ । के छ, हेरेर आवश्यकताअनुसार कारबाही प्रक्रिया अघि बढाउँछौं ।’