बैंकहरूले घटाए ब्याजदर

काठमाडौं, ३१ भदौ - वाणिज्य बैंक्हरूले निक्षेपको ब्याजदर थप घटाएका छन् । प्रणालीमा अधिक तरलताको सामना गरिरहेका बैंकहरूले निक्षेप निरुत्साहित गर्न ब्याजदर घटाउने नीति लिएका हुन् ।

सञ्चालनमा रहेका २० मध्ये ९ वटा वाणिज्य बैंकले ब्याजदर घटाएका छन भने ९ वटाले स्थिर राखेका छन् । दुई वटाले बढाएका छन् । ब्याजदर बढाउनेमा लक्ष्मी सनराइज बैंक र स्टान्डर्ड चार्टर्ड बैंक छन् । सिटिजन्स बैंक इन्टरनेसनल, सानिमा, एभरेष्ट, एसबिआई, एनआईसी एशिया, कुमारी, प्राइम कमर्सियल, कृषि विकास र नेपाल बैंकले ब्याजदर घटाएका हुन् । 

सानिमा, प्राइम र एभरेष्ट बैंकले सबैभन्दा धेरै ०.५० प्रतिशत विन्दुले ब्याजदर घटाएका छन् । त्यसपछि नेपाल एसबीआईले ०.२७ प्रतिशत विन्दु, सिटिजन्स र एनआइसी एशियाले ०.२५ प्रतिशत विन्दु, कुमारीले ०.२० प्रतिशत विन्दु, नेपाल बैंक र कृषि विकासले ०.१५ प्रतिशत विन्दुले ब्याजदर घटाएका हुन् ।

भदौ महिनामा वाणिज्य बैंकहरूले व्यक्तिगत मुद्दती निक्षेपमा तोकेको अधिकतम ब्याजदरको औसत दर ५.५७७ प्रतिशत विन्दु थियो । असोजमा यस्तो औसत ब्याजदर घटेर ५.४६३५ प्रतिशत विन्दुमा झरेको छ । भदौमा भन्दा असोजमा व्याजदर ०.११ प्रतिशत विन्दुले घटेको हो ।

असोज महिनामा व्यक्तिगत मुद्दती निक्षेपमा कुमारी बैंकले सबैभन्दा कम ब्याजदर ५.०१ प्रतिशत तोकेको छ । यस्तै एनआईसी एशिया, माछापुच्छ्रे, ग्लोबल आइएमई, एनएमबि र हिमालयन बैंकले सबैभन्दा धेरै ६ प्रतिशत ब्याज दिने भएका छन् ।

संस्थापक मुद्दती निक्षेपको अधिकतम औसत ब्याजदर पनि घटेको छ । यसमा ७ वाणिज्य बैंकहरूले ब्याजदर घटाएका छन् भने १३ बैंकहरूले भदौकै ब्याजदरलाई निरन्तरता दिएका छन् ।