कांग्रेस इतर समूहको भेलाः देउवाकै नेतृत्वमा १५ औँ महाधिवेशन गर्ने निर्णय

काठमाडौं । नेपाली कांग्रेसको संस्थापन इतर समूहले राजधानीमा भएको राष्ट्रिय भेलाबाट प्रस्तुत ५ प्रतिवेदन परिमार्जनसहित पारित गरेको छ । गत शुक्रबारबाट काठमाडौंमा जारी राष्ट्रिय भेलामा शनिबार ५ प्रतिवेदनहरू प्रस्तुत भएका थिए ।

भेलामा पूर्वउपसभापति विमलेन्द्र निधिले प्रस्तुत गरेको राजनीतिक प्रस्ताव, पूर्वकोषाध्यक्ष उमाकान्त चौधरीले पेस गरेको साङ्गठनिक प्रस्ताव,एनपी साउदले पेस गरेको समसामयिक नीति र विषयसम्बन्धी प्रस्ताव,डा.प्रकाशशरण महतले प्रस्तुत गरेको नेपालको आर्थिक नीतिसम्बन्धी प्रस्ताव र नेता रमेश लेखकले कानुन तथा विधानसम्बन्धी प्रस्ताव परिमार्जनसहित पारित भएका हुन् ।

शनिबार प्रस्तुत भएका प्रस्तावमाथि राष्ट्रिय भेलामा सहभागी भएका विभिन्न विषय र प्रदेशका आधारमा समूह विभाजन गरी छलफल गरिएको थियो । समूहका नेताले ती प्रस्तावमा के के विषय परिमार्जन गर्नुपर्छ भन्ने धारणा राखेका थिए ।

भेलामा बेल्दै पूर्वउपसभापति विमलेन्द्र निधिले नेपाली कांग्रेसको १५औँ महाधिवेशन शेरबहादुर देउवाकै नेतृत्वमा सम्पन्न गर्ने प्रस्ताव राखेको बताए । त्यस्तै,१५औं महाधिवेशनसम्म पार्टीका नियमित कामकारबाही देउवाको निर्देशनमा राष्ट्रिय भेलाका संयोजकले संयोजन गर्दै जाने निधिले बताए।

त्यसतै नेता डा.प्रकाशशरण महतले पार्टीको आगामी आर्थिक मार्गचित्र स्पष्ट पार्दै प्रजातान्त्रिक समाजवादको जगमा उभिएर मुलुकको आर्थिक रूपान्तरण गर्नुपर्ने बताए। महतले किसानले समयमा मल नपाउने,उत्पादनको उचित मूल्य नपाउने र प्रविधिको अभाव खेप्नुपर्ने अवस्थाको अन्त्य गर्दै किसानका समस्यालाई कांग्रेसले आफ्नो मुख्य एजेण्डा बनाउनुपर्नेमा जोड दिए। संविधानमा रहेका कतिपय विरोधाभासका बाबजुद कांग्रेसले आफ्नो मौलिक सिद्धान्त प्रजातान्त्रिक समाजवादलाई नछाड्ने स्पष्ट पारे।

त्यस्तै कार्याक्रमलाई सम्बोधन गर्दै नेता कृष्ण प्रसाद सिटौलाले निर्वाचन आयोगले गरेको निर्णयलाई सर्वोच्च अदालतले बदर गर्नेछ भन्नेमा आफूहरू विश्वस्त रहेको बताए। उनले १४ औँ महाधिवेशनबाट निर्वाचित कार्यसमिति पुर्नबहाली हुने विश्वास व्यक्त गरे। नेता सिटौलाले संकटबाट गुज्रिरहेको देशलाई समाधान दिने जिम्मेवारी कांग्रेसको काँधमा रहेको उल्लेख गर्दै यो जिम्मेवारी पूरा गर्नका लागि बृहत एकताको खाँचो रहेको स्पष्ट पारे।

नेपाली कांग्रेसको देउवा पक्षले आयोजना गरेको राष्ट्रिय भेलाले १५ औं महाधिवेशन तयारीको जिम्मा पूर्वमहामन्त्री डा.शशांक कोइरालालाई दिएको छ।