‘अरूलाई थर्कमान बनाउन मलाई गिरफ्तार गरियो’

काठमाडौं । पूर्व प्रधानमन्त्री एवम् नेकपा एमालेका अध्यक्ष केपी शर्मा ओलीले नयाँ सरकार बनेकै दिन आफूलाई गिरफ्तार गरेर सरकारले अन्य सर्वसाधरणलाई पनि थर्कमान गराएको आरोप लगाएका छन् । शनिबार नगरकोटमा आयोजित पार्टी कार्यक्रममा अध्यक्ष ओलीले सरकारलाई बारुलाको संज्ञा दिँदै आफू नडराउने बताए । 
‘मैले यस्ता बारुला मात्रै होइन, कति अरिंगाल खाएको छु । यी बारुलासँग म डराउँछ भन्ने कुरा उनीहरूलाई पनि लाग्दैन । तर अरूलाई तर्साउनका लागि केपी ओलीलाई समातेर थुनियो भने अरूको के हुन्छ  भनेर थर्कमान बनाउन खोजियो । यी बारुलाहरूले एक ठाउँमा यसो चिल्लान्, त्यो केही पनि हुँदैन, एकछिन दुख्ने हो । यी बारुलासँग डराएर देश सधैं यिनीहरूका जिम्मा लगाउन सकिँदैन,’ ओलीले भने । उनले प्रतिगमनबाट देश फर्काउनु र अपहरित लोकतन्त्र फिर्ता ल्याउनु अहिलेको आवश्यकता रहेको बताए ।