सात वर्षको छोरालाई एक्लै छाडेपछि ...

हिमाली र पहाडी क्षेत्रको आरोहणमा जानेहरूले आफ्ना सन्तानको ध्यान पु¥याउने विषयमा गम्भीर हुनुपर्छ÷पर्दैन ? गत बिहीबारको एउटा घटनापछि जापानभरी अभिभावकत्वको जिम्मेवारीबारे व्यापक बहस भइरहेको छ । यो घटना प्रसिद्ध फुजी पर्वत चढ्ने क्रममा सात वर्षीय छोरालाई करिब २,५०० मिटरको उचाइमा एक्लै छाडेर बाबु जेठो छोरासँगै माथि लागेपछिको हो ।  ती बालकलाई पछि पर्वतको विश्रामस्थलका कर्मचारीले फेला पारेर प्रहरीलाई खबर गरेपछि उद्धार गरिएको थियो । प्रहरीले बाबुलाई कडा चेतावनी दिएर छोरा जिम्मा लगाएको छ । 
प्रहरी र जापानी सञ्चारमाध्यमका अनुसार नागोया निवासी ४८ वर्षीय बाबु आफ्ना दुई छोरासहित माउन्ट फुजी आरोहणमा निस्किएका थिए । कान्छो छोरा सात वर्षका थिए भने जेठो छोरा माध्यमिक तहमा अध्ययनरत थिए । उनीहरू फुजीको शिजुओका प्रान्ततर्फको फुजिनोमिया मार्ग हुँदै बिहानै आरोहणमा लागेका थिए ।
फुजी पर्वतको छैटौं विश्रामस्थलतर्फ पुग्दा सानो छोराले आफू थाकेको बताए, अघि बढ्न नसक्ने अवस्थामा पुगे । त्यतिबेलासम्म उनका दाजु केही माथि पुगिसकेका थिए । बाबुले कान्छोलाई ‘त्यहीँ बस्न भने’ र आफू जेठो छोरातर्फ अघि बढे । ती बालकलाई करिब आठ घण्टा त्यहीँ पर्खन भनिएको असाही टेलिभिजनको समाचारमा जनाइएको छ ।
त्यो ठाउँ समुद्री सतहबाट करिब २,५०० मिटर उचाइमा थियो । सामान्य अवस्थामै पनि फुजीको यो क्षेत्रमा मौसम चाँडै बदलिन सक्छ । प्रतिकूल मौसमबाट सुरक्षित हुन बालकसँग पर्याप्त साधन थिएनन् । पर्वतको विश्रामस्थलका कर्मचारीका अनुसार उनीसँग केही खानेकुरा र पेय पदार्थ मात्र थियो, पैसा भने थिएन । बालक एक्लै बेन्चमा बसिरहेको अवस्थामा कर्मचारीले देखेका थिए ।

गत बिहीबार बिहान करिब ७ः३० बजे पर्वतको छैटौं विश्रामस्थलबाट प्रहरीलाई ‘एउटा बच्चा एक्लै छ’ भन्दै खबर गरियो । त्यसपछि प्रहरीले बालकलाई नियन्त्रणमा लिएर सुरक्षित स्थानमा पु¥यायो । बालकलाई फेला पारेपछि प्रहरी र पर्वतका कर्मचारीले बाबुको खोजी थाले । त्यतिबेला बाबु आठौं विश्रामस्थलतर्फ पुगिसकेका थिए । प्रहरीले सम्पर्क गरेपछि उनी फर्किए र छोरा जिम्मा लिए । जापानी सञ्चारमाध्यमका अनुसार बालक भेटिएको करिब पाँच घण्टापछि परिवारसँग पुनर्मिलन भएको थियो ।
प्रहरीले बाबुलाई बालकलाई एक्लै छाड्नु गम्भीर लापरबाही भएको भन्दै कडा रूपमा सम्झायो । स्थानीय प्रहरीको भनाइ उद्धृत गर्दै एएफपीले बाबुले आफ्नो निर्णयप्रति माफी माग्दै आफूबाट लापरबाही भएको स्वीकार गरेको जनाएको छ । शिजुओका प्रहरीले समूहमा पर्वतारोहण गर्दा सबैभन्दा कमजोर वा कम सक्षम सदस्यको गतिअनुसार अघि बढ्न र समूहका सदस्यलाई छुट्टिन नदिन आग्रह गरेको छ ।
यस घटनाले आरोहणमा अभिभावकीय जिम्मेवारीको प्रश्न पनि उठाएको छ । सात वर्षको बालकलाई २,५०० मिटरभन्दा माथिको उचाइमा, त्यो पनि एक्लै छाड्नु सामान्य ‘थाकेर विश्राम’को विषय मात्र नभएको अधिकारीहरूको चेतावनीबाट स्पष्ट हुन्छ ।
घटनापछि बालक सुरक्षित रूपमा बाबुको जिम्मा लगाइए पनि जापानी प्रहरीले यो घटनालाई अन्य आरोहीका लागि पनि चेतावनीका रूपमा लिएको छ । फुजी जापानको सर्वोच्च पर्वत हो र आरोहणका क्रममा उचाइ, मौसम तथा थकानले जोखिम बढाउन सक्ने भएकाले समूहका सबै सदस्यलाई सँगै राख्नु र कमजोर सदस्यलाई छाडेर अघि नबढ्नु नै सुरक्षित उपाय हुने अधिकारीहरूको भनाइ छ । (एजेन्सीहरू)