भोटेकोशी बाढीः गोसाइँकुण्ड तीर्थयात्रा गएका ३३ यात्रु सम्पर्कविहीन

गोरखा । गोरखाको पालुङटार नगरपालिकाकाबाट रसुवाको गोसाइँकुण्ड तीर्थ यात्रामा गएकाहरू सम्पर्कविहीन भएका छन् । पालुङ्टार नगरपालिका- ५ ठाँटीपोखरीबाट गोसाइकुण्ड यात्रामा गएका यात्रुहरू बुधबार बिहानदेखि सम्पर्कविहीन भएको पालिकाकी उपप्रमुख बन्दना पाण्डेले बताइन् ।

बुधबार बिहान भोटेकोशीको बाढीको घटना लगत्तैदेखि उनीहरूको अवस्था अज्ञात रहेको उपप्रमुख पाण्डेले जानकारी दिइन् । ‘यहाँबाट दुईवटा माइक्रो र एउटा बसमा यात्रुहरू गोसाइकुण्डतर्फ गएका थिए’,उनले भनिन्,‘हाल दुईवटा माइक्रो बसका यात्रुहरू सुरक्षित अवस्थामा रहेको जानकारी प्राप्त भएको छ । एउटा बसको यात्रुहरूको अवस्था भने अज्ञात छ । केही समयअघि बसका चारजनाले आफूहरू हामफालेर सुरक्षित रहेको जानकारी गराएका थिए । अहिले उनीहरू पनि सम्पर्कमा छैनन् ।’

नगरपालिकाले बसका यात्रुहरूको अवस्थाबारे सोधखोज गरिरहेको र विभिन्न निकायसँग आवश्यक समन्वय गरिरहेको उपप्रमुख पाण्डेको भनाइ छ । पालुङ्टारबाट तीर्थ गर्न गोसाइँकुण्ड गएका ३३ जना यात्रुहरू सम्पर्कमा नरहेकोबारे आफूले पनि जानकारी पाएको प्रमुख जिल्ला अधिकारी तुलसी श्रेष्ठले बताए ।

‘३८ जना सवार रहेको बसबाट पाँचजना हाम्फालेर बचेको बाँकीको अवस्था अज्ञात छ’,प्रजिअ श्रेष्ठले भने,‘हामीले यही अनुसार गृहमन्त्रालय र नुवाकोटसँग समन्वय गरेर सोधखोज गरिरहेका छौँ ।'

बुधबार बिहान ९ बजे तिब्बती क्षेत्रबाट भोटेकोशीमा आएको बाढीले रसुवा, नुवाकोट, धादिङ, गोरखा र चितवन आसपासको क्षेत्रमा ठूलो क्षति पुर्‍याएको छ ।