कृष्णभीरले टुटायो उपत्यकाको सडक सम्पर्क

चितवन ।  पृथ्वी राजमार्गअन्तर्गत धादिङको कृष्णभीरमा आइतबार सडक भासिएपछि उपत्यकाको सवारी आवागमन प्रभावित भएको छ । झण्डै दशकपछि पुनः कृष्णभीरको बाटोले दुःख दिएको हो । भत्किाएको सडक धराप भएपछि उक्त रुटबाट सवारी आवागमन बन्द भएको छ । 
भत्किएको ठाउँ अध्ययनका लागि सडक विभागले विज्ञ टोली पठाएको छ । सडक चिरिएर भासिँदै त्रिशूलीमा खसेपछि कसरी तत्काल मर्मत गर्ने बारेमा अध्ययन गर्न विभागले टोली पठाएको हो ।
नौबिसे मुग्लिन सडक आयोजनाको पश्चिम खण्ड मुग्लिन–मलेखुका रेजिडेन्ट इन्जिनियर प्रभुराज पाण्डेका अनुसार सडक सहजै मर्मत गर्न मिल्ने अवस्था छैन । विसं २०५६ मा पहिरो झरेको ठाउँमा सडक भासिएर चर्किएको हो । त्रिशूली नदीमा आएको बाढीले तलबाट कटान हुँदा सडक भासिएको उनले बताए । 
त्रिशूली नदीमा शनिबारभन्दा तीन मिटर पानीको सतह बढेको छ । पानीको सतह घटेपछि जगबाटै पर्खाल लगाएर माथिसम्म सडक ल्याउने वा कसरी मर्मत गर्ने भन्ने बारेमा विज्ञ टोली आएपछि मात्र भन्न सकिने उनी बताउँछन् ।
सो ठाउँमा भित्तो काटेर सडक चौडा गर्न कठिन भएको उनको भनाइ छ । सो ठाउँमा २० मिटर लम्बाइको सडक आधाभन्दा बढी भासिएको छ । ६० मिटर अग्लो सडक भासिएको हो । सडकको कुनाबाटै चिरिएकाले मर्मत कठिन भएको हो । अहिले तत्कालै तल गएर हेर्न सक्ने अवस्था नभएकाले कति भाग तलबाट खोलिएको छ भन्न नसकिएको पाण्डे बताउँछन् ।
सडक विभागका महानिर्देशक डा. विजय जैसीका अनुसार सडक भासिएको ठाउँको अध्ययन गर्न काठमाडौंबाट विज्ञ टोली कृष्णभीरतर्फ गएको र अध्ययनपछि मात्र कसरी मर्मत गर्ने भन्ने बारेमा यकिन भन्न सकिने उनको भनाइ छ । तत्कालका लागि वैकल्पिक सडक प्रयोग गर्नुको विकल्प नरहेको उनले जानकारी दिए । 
अन्य वैकल्पिक सडक सञ्चालनमा रहेकाले सोही सडक प्रयोग गर्न उनको आग्रह छ । विज्ञ टोलीको अध्ययनपछि एकतर्फी वा दुईतर्फी सडक कसरी खोल्न सकिन्छ त्यसबारेमा भन्न सकिने उनको भनाइ छ । यो सडक राजधानी प्रवेश र बाहिरिने मुख्य सडक हो । 
यो सडक हुँदै दैनिक १४ हजार हाराहारी सवारीसाधन आवतजावत गर्दछन् । यसअघि विसं २०५६ मा सो सडकमा पहिरो खसेर धेरै दुःख दिएको थियो । तत्कालीन अवस्थामा तलबाटै उकासेर सडक मर्मत गरिएको थियो । भित्तो पट्टी पहिरो रोकथामका काम गरेर रोकिएको थियो । गतवर्ष सोही ठाउँमा सडक केही भासिएपछि मर्मत भइरहेको थियो । मर्मतकै क्रममा पुनः फेर्दैसम्म सडक भासिएको र चिरिएको हो । (रासस)