८० लाख डलर मागेकी थिइन्, पाइन् ४ लाख

अमेरिकी अभिनेत्री ब्लेक लाइभलीले अभिनेता तथा निर्देशक जस्टिन बाल्डोनीविरुद्ध कानुनी लडाइँमा खर्च भएको भन्दै मागेको ८० लाख डलरमध्ये ४ लाख डलरभन्दा केही बढी रकम मात्र पाउने भएकी छन् । ‘इट एन्ड्स विथ अस’ चलचित्रको निर्माणसँग जोडिएको विवादमा दुवै पक्षबीच भएको मुद्दा टुंगिएपछि म्यानहट्टनस्थित संघीय अदालतका न्यायाधीश लुइस जे. लिमानले बुधबार यस्तो फैसला गरेका हुन् ।

लाइभलीका वकिलले बाल्डोनी र उनको निर्माण कम्पनी वेफेयर स्टुडियोज एलएलसीले उनीविरुद्ध प्रतिदाबी दायर गरेपछि त्यसको प्रतिरक्षामा ८० लाख डलर खर्च भएको दाबी गरेका थिए । तर न्यायाधीश लिमानले क्यालिफोर्नियाको यौन दुव्र्यवहार तथा भेदभावबाट पीडितलाई प्रतिशोधात्मक मुद्दाबाट संरक्षण गर्ने कानुनको सीमाका कारण लाइभलीले मागेको सम्पूर्ण रकम पाउन नसक्ने बताए ।
फैसलाअनुसार लाइभलीले वकिलको पारिश्रमिकबापत ३ लाख ६३ हजार २४५ डलर र अन्य कानुनी खर्चबापत ४४ हजार २०६ डलर गरी कुल ४ लाख ७ हजार ४५१ डलर पाउनेछिन् ।
दुवै पक्षका वकिलले फैसलालाई आफ्नै पक्षको विजयका रूपमा व्याख्या गरेका छन् । बाल्डोनीका वकिल ब्रायन फ्रिडम्यानले यसलाई ‘महŒवपूर्ण विजय’ भन्दै लाइभलीले मागेको रकमको ५ प्रतिशतभन्दा पनि कम पाउने बताए । उता लाइभलीका वकिल एस्रा हडसन र माइकल गोटलिबले भने फैसला ‘ऐतिहासिक’ भएको दाबी गरेका छन् । उनीहरूका अनुसार उक्त क्यालिफोर्निया कानुनअन्तर्गत पहिलोपटक कानुनी खर्चबापत रकम प्रदान गरिएको हो ।
लाइभलीले आफ्नो मुद्दामा छायांकनका क्रममा बाल्डोनीले उनको रूपरंगबारे अनुचित टिप्पणी गरेको, प्रेमदृश्य छायांकन गर्दा शारीरिक सीमाको उल्लंघन गरेको र आफूले असहमति जनाउँदा पनि बच्चा जन्माउने दृश्यमा नग्न हुन दबाब दिएको आरोप लगाएकी थिइन् । बाल्डोनीले भने सबै आरोप अस्वीकार गर्दै ती विषय सामान्य चलचित्र निर्माण प्रक्रियाकै हिस्सा भएको बताएका थिए ।
बाल्डोनी र उनको कम्पनीले पनि लाइभली तथा उनका पति रायन रेनल्ड्सविरुद्ध मानहानि, गोपनीयता उल्लंघनलगायतका आरोपमा प्रतिमुद्दा दायर गरेका थिए । सन् २०२५ जुनमा अदालतले उक्त प्रतिमुद्दा खारेज गरेको थियो । पछि दुवै पक्षले चलचित्रको निर्धारित सुनुवाइ हुनुभन्दा दुई साताअघि मे महिनाको सुरुवातमा विवाद समाधान गरेका थिए । कोलिन हुबरको चर्चित उपन्यासमा आधारित ‘इट एन्ड्स विथ अस’ सन् २०२४ अगस्टमा प्रदर्शनमा आएको थियो । घरेलु हिंसामा आधारित चलचित्रले अपेक्षाभन्दा राम्रो व्यापार गरे पनि त्यसले हिंसालाई महिमामण्डन गरेको भन्दै आलोचना भएको थियो । लाइभली र बाल्डोनीबीचको विवादले चलचित्रको मूल विषयभन्दा बढी चर्चा पाएको थियो ।