रूसी सैन्य भर्ती गर्ने नयाँ योजना छैनः पुटिन

रूसी राष्ट्रपति भ्लादिमिर पुटिनले युक्रेन युद्धका लागि थप सैनिक परिचालन गर्ने तत्काल कुनै योजना नरहेको बताएका छन् । नयाँ सैन्य परिचालनको चर्चा युक्रेनले फैलाएको ‘हल्ला’ भएको दाबी गर्दै उनले त्यसको उद्देश्य आगामी संसदीय निर्वाचनलाई प्रभावित पार्नु रहेको बताए ।
रुसको सुदूरपूर्वी सहर भ्लादिभोस्तोकमा बिहीबार आयोजित ‘इस्टर्न इकोनोमिक फोरम’को पूर्ण सत्रमा बोल्दै पुटिनले भने, ‘आज त्यस्तो कुनै परिस्थिति छैन, जसले परिचालन आवश्यक बनाओस् ।’ उनका अनुसार रूसी सेनामा आवश्यक संख्यामा सैनिक स्वेच्छाले भर्ती भइरहेका छन् र रक्षा मन्त्रालयसँग सम्झौता गरेर युद्धमा सहभागी भइरहेका छन् ।
पुटिनले नयाँ परिचालनको सम्भावनासम्बन्धी चर्चालाई आगामी सेप्टेम्बर १८ देखि २० सम्म हुने रुसी संसद्को तल्लो सदन ‘स्टेट डुमा’को निर्वाचनसँग पनि जोडे । ‘यो निर्वाचनअघि शत्रुले परिणाम प्रभावित पार्न चलाएको सूचना अभियान हो,’ उनले भने ।
रूसले सन् २०२२ मा युक्रेनमाथि पूर्णस्तरको आक्रमण सुरु गरेको केही महिनापछि ठूलो सैन्य क्षति बेहोरेपछि पुटिनले ‘आंशिक परिचालन’ घोषणा गरेका थिए । त्यसबेला करिब तीन लाख जगेडा सैनिकलाई सेनामा बोलाइएको थियो । निर्णय रूसभित्र अत्यन्त अलोकप्रिय बनेपछि सैन्य उमेरका ठूलो संख्याका पुरुष देश छाडेर भागेका थिए । त्यसयता क्रेमलिनले पटक–पटक नयाँ ठूलो परिचालनको योजना नरहेको बताउँदै आएको छ ।
पछिल्ला केही सातायता भने रूसमा फेरि ठूलो संख्यामा सैनिक परिचालन हुनसक्ने चर्चा बढेको थियो। पुटिनले गत मंगलबार पनि त्यस्तो सम्भावनालाई अस्वीकार गर्दै त्यसलाई ‘बकवास’ र सूचना आक्रमण भनेका थिए ।

युक्रेनी राष्ट्रपति भोलोदिमिर जेलेन्स्कीले भने यसअघि रूसले शरद ऋतुमा नयाँ परिचालनको तयारी गरिरहेको सूचना आफूहरूले पाएको दाबी गरेका थिए । जुलाईमा उनले ‘शरदमा नयाँ परिचालनको लहर’ ल्याउने तयारीमा मस्को रहेको बताएका थिए । रूसले भने उक्त दाबी अस्वीकार गर्दै आएको छ ।
रूसी नेतृत्वले नयाँ परिचालन आवश्यक नपर्ने दाबी गरिरहँदा युद्ध भने चौथो वर्ष पार गरिसकेको छ । दुवै पक्षले ठूलो जनधनको क्षति बेहोरेका छन् । युक्रेनले पछिल्लो समय ड्रोन आक्रमणलाई तीव्र बनाउँदा रूसी सैन्य तथा ऊर्जा पूर्वाधारमा दबाब बढेको छ । यस गर्मीयाममा मात्र रूसी क्षेत्रमा दशौं हजार युक्रेनी ड्रोन खसालिएको रूसको दाबी छ । ड्रोन आक्रमणले तेल प्रशोधन केन्द्र, गोदाम र विमानस्थलसम्म प्रभावित पारेको छ ।
यसैबीच, रूसले सैनिक संख्या बढाउन अनिवार्य परिचालनको सट्टा स्वयंसेवी भर्तीलाई निरन्तरता दिएको छ । रूसी अधिकारीहरूका अनुसार यस वर्षको पहिलो ६ महिनामा करिब दुई लाख जनाले सेनामा सेवा गर्ने सम्झौता गरेका छन् । क्रेमलिनले यही प्रक्रियाबाट युद्धका लागि आवश्यक जनशक्ति जुटिरहेको दाबी गर्दै आएको छ ।
तर पुटिनको पछिल्लो आश्वासनका बाबजुद नयाँ परिचालनको सम्भावनाबारे बहस पूर्णतः अन्त्य भएको छैन । युद्धको अवस्था, सैनिक क्षति र घरेलु राजनीतिक परिस्थितिअनुसार भविष्यमा क्रेमलिनले आफ्नो नीति परिवर्तन गर्नसक्ने विश्लेषणहरू भइरहेका छन् । अहिलेका लागि भने पुटिनले स्पष्ट सन्देश दिएका छन्, रूसमा थप सैन्य परिचालनको कुनै तत्काल योजना छैन । (एजेन्सीहरु)