प्रदेश

विनाशकारी बाढीको ११ दिनदेखि फसेका दुई जनाको जीवितै उद्धार

न्यूज २४ दैनिक

शनिबार, भदौ २०, २०८३ १८:४३

विनाशकारी बाढीको ११ दिनदेखि फसेका दुई जनाको जीवितै उद्धार

काठमाडौं । त्रिशूली नदीमा आएको विनाशकारी बाढीका कारण ११ दिनदेखि फसेका दुई जनाको शनिबार जीवितै उद्धार गरिएको छ।

उद्धार गरिएकामध्ये एक जना २१६ मेगावाट क्षमताको माथिल्लो त्रिशूली–१ जलविद्युत् आयोजनामा कार्यरत चिनियाँ नागरिक रहेका छन्। आयोजनाको अडिट–४ सुरुङमा फसेका उनलाई नेपाली सेना र दक्षिण कोरियाको विपद् व्यवस्थापन विज्ञ टोलीको संयुक्त प्रयासमा जीवितै उद्धार गरिएको हो ।

यसैगरी, नुवाकोटको बेत्रावतीबाट चण्डिका श्रेष्ठ नामकी महिलाको पनि शनिबार सकुशल उद्धार गरिएको छ। त्रिशूली नदीको बाढीले घर पुरिएपछि उनी ११ दिनदेखि त्यहीँ फसेकी थिइन्।

उद्धार टोलीले श्रेष्ठलाई जीवितै फेला पारेर सुरक्षित स्थानमा ल्याएको हो। बाढी र पहिरोका कारण लामो समयदेखि सम्पर्कविहीन रहेका दुई जनालाई ११ दिनपछि जीवितै उद्धार गर्न सफल हुनुलाई विपद्को यो कठिन अवस्थामा महत्त्वपूर्ण र सकारात्मक उपलब्धिका रूपमा लिइएको छ।

उद्धार टोलीले त्रिशूली बाढीबाट प्रभावित तथा सम्पर्कविहीन व्यक्तिको खोजी तथा उद्धार कार्यलाई निरन्तरता दिइरहेको छ।

प्रकाशित मिति: शनिबार, भदौ २०, २०८३ १८:४३

प्रतिक्रिया दिनुहोस्