आन्दोलनबाट डरायो शेयर बजार

काठमाडौं, २ असोज - जेनजी आन्दोलनमा धनजनको ठूलो क्षतिबाट शेयर लगानीकर्ता डराएका छन् । यसको प्रत्यक्ष असर बिहीबार बजारमा देखिएको हो । आन्दोलनसँगै बन्द रहेर एक सातापछि खुलेको बजार लगातार तेस्रो नेगेटिभ सर्किट लागेर बन्द भएको हो । नेप्से परिसूचक १६०.३३ अंकले घटेर २५११.९१ विन्दुमा आएको छ । कारोबार खुलेको २ मिनेटमै नेगेटिभ सर्किट लागेर बजार २० मिनेटका लागि बन्द भएको थियो ।

११ः०२ बजे १०७.०४ अंकले घटेर बजार २५६५.२१ अंकमा आएको थियो । त्यसपछि ११ः२२ मा खुलेको बजारमा पहिरो रोकिएन । नेप्सेमा एक मिनेटमै दोस्रो नेगेटिभ सर्किट लाग्यो । दोस्रो नेगेटिभ सर्किट लागेपछि ४० मिनेटका लागि बन्द भएको नेप्से १२.०३ मा पुनः खुल्यो । तर तेस्रो मिनेटमै तेस्रो नेगेटिभ सर्किट लागेपछि बजार कारोबार बन्द भएको हो । बजारमा ६ मिनेटमा ७२ करोड ८७ लाख रुपैयाँको कारोबार भएको छ ।

२१७ कम्पनीको सेयर मूल्य ओरालो लाग्दा उन्नति सहकार्य लघुवित्त, नेपाल रिइन्स्योरेन्स, हिमालयन रिइन्स्योरेन्स, नेपाल माइक्रो इन्स्योरेन्स, ट्रेड टावर, सिन्धु विकास बैंक, सोल्टी होटल, आइजीआइ प्रुडेसिन्यल इन्स्योरेन्स, सिनर्जी पावर, क्रेस्ट माइक्रो लाइफ इन्स्योरेन्स, चन्द्रागिरि हिल्सलगायत डेढ दर्जन कम्पनीमा नेगेटिभ सर्किट
लागेको छ । नौ कम्पनीको शेयरमूल्य बढ्दा हिमस्टार ऊर्जाको शेयरमूल्य ९.९९ प्रतिशतले बढेको छ ।