पानीजहाज आगलागीमा ७६ जनाको मृत्यु

फिलिपिन्स (एपी) – फिलिपिन्समा यात्रुवाहक पानीजहाजमा भीषण आगलागी हुँदा कम्तीमा ७६ जनाको मृत्यु भएको छ । घटनामा १३ जना अझै बेपत्ता छन् । जहाजमा रहेका ४३ जनाको भने उद्धार गरिएको छ ।
बुधबार राति दक्षिणपश्चिमी पालावान प्रान्तको कोरोननजिकै जहाजमा आगलागी भएको थियो । आगो निकै तीव्र गतिमा फैलिएपछि यात्रुहरूबीच भागदौड मच्चिएको थियो ।
उद्धार गरिएका अर्नुल्फो नोक्की भिल्लानुएभाले आगोबाट बच्न झ्यालबाट हामफालेको बताएका छन् । आगो फैलिन थालेपछि आफू भुइँमा लडेको र ढाड जलेको उनले बताए । लाइफ ज्याकेट लिन खोजे पनि मानिसहरूले कुल्चिएपछि लिन नसकेको उनको भनाइ छ ।
‘मानिसहरू आत्तिएका थिए । त्यसैले लाइफ ज्याकेट लिन सकिनँ,’ उनले स्थानीय सञ्चारमाध्यमलाई बताएका छन् ।
आगलागीपछि उद्धारकर्मीलाई जहाजभित्र पस्न कठिन भएको थियो । अत्यधिक गर्मी र धुवाँका कारण खोजी प्रभावित भएको थियो । शनिबारसम्म जहाजबाट थप शव निकालिएपछि मृतकको संख्या बढेको  हो । राजधानी मनिलाबाट कोरोनतर्फ जाँदै गरेको जहाज गन्तव्यनजिकै आगलागीमा परेको थियो । घटनास्थल कोरोननजिकैको टुर्डा गाउँबाट करिब ७.४ किलोमिटर टाढा समुद्रमा पर्छ । आगलागीको कारण भने खुलेको छैन ।
३३३ जना क्षमताको जहाजमा चालकदलका १७ सहित १३३ जना सवार थिए । 
जहाज सञ्चालक कम्पनीका अनुसार उद्धार गरिएका दुई जना चिलीका पर्यटक छन् । उनीहरू घाइते अवस्थामा कोरोनको अस्पतालमा उपचाररत छन् ।
बेपत्ता छोरीको खोजीमा रहेकी लिरा डाकोले उद्धार केन्द्रमा भावुक हुँदै पीडा सुनाइन् । जहाजभित्र भेटिएका शव चिन्न कठिन भएको भन्दै उनले छोरीको शव भेटिए पनि अन्तिम संस्कार गर्न पाउने आशा व्यक्त गरिन् ।
फिलिपिन्समा टापुहरूबीच आवतजावतका लागि पानीजहाज व्यापक रूपमा प्रयोग हुन्छन् । तर खराब मौसम, कमजोर मर्मतसम्भार, क्षमताभन्दा बढी यात्रु र सुरक्षा नियमको कमजोर कार्यान्वयनका कारण समुद्री दुर्घटना हुने गरेका छन् ।
सन् १९८७ मा डोना पाज नामक यात्रुवाहक जहाज इन्धन बोकेको ट्यांकरसँग ठोक्किएर डुब्दा चार हजार तीन सय जनाभन्दा बढीको मृत्यु भएको थियो ।