विश्वकप दाबीप्रति प्रधानमन्त्री आक्रोशित

मोरक्कोका प्रधानमन्त्री अजिज अखानुशले २०३० को विश्वकप फुटबलको फाइनल खेल मोरक्कोको कासाब्लान्कामा हुने दाबी गरेका देशका प्रमुख फुटबल अधिकारीको आलोचना गरेका छन् । विश्व फुटबलको सर्वोच्च निकाय फिफाले फाइनल कहाँ हुने भन्ने निर्णय नगर्दै राष्ट्रिय फुटबल संघका अध्यक्षले यस्तो घोषणा गरेको भन्दै प्रधानमन्त्री अखानुशले आपत्ति जनाएका हुन् ।

मोरक्कोको रोयल मोरक्कन फुटबल फेडेरेसनका अध्यक्ष फौजी लेक्जाले एउटा राजनीतिक दलको कार्यक्रममा बोल्दै बेन्स्लिमाने प्रान्तले २०३० विश्वकपको फाइनल आयोजना गर्ने “सम्मान” पाउने बताएका थिए ।

तर, २०३० को विश्वकपको फाइनल कुन देशमा आयोजना गर्ने भन्ने निर्णय फिफाले अहिलेसम्म गरेको छैन । सन् २०३० को विश्वकप स्पेन, पोर्चुगल र मोरक्कोले संयुक्त रूपमा आयोजना गर्दैछन् । फिफाका प्रवक्ताले फाइनल आयोजनाबारे उचित समयमा निर्णय गरिने बताएका छन् ।

यस विषयमा प्रधानमन्त्री अखानुशले निर्वाचनअघि आयोजित एक सभामा लेक्जाको भनाइप्रति असन्तुष्टि जनाउँदै भने, “हाम्रा साझेदार स्पेन र पोर्चुगलसँग यस विषयमा छलफल नै नगरी मोरक्कोमा विश्वकपको ठूलो फाइनल आयोजना गर्ने प्रस्ताव नगर्नुहोस् । यसमा केही सम्मान हुनुपर्छ, दाजुभाइहरू ।”

उनले निर्वाचनमा मतदातालाई आकर्षित गर्न यस्ता विषयलाई चुनावी वाचाका रूपमा प्रयोग नगर्न पनि चेतावनी दिए । “हामीमाथिबाट निर्णय खोस्ने गरी चुनावी वाचा गर्न बन्द गर्नुहोस् । यी अत्यन्तै महत्वपूर्ण विषय हुन् । फाइनल कहाँ आयोजना गर्ने भन्ने निर्णय ठूलो विषय हो,” उनले भने ।

फौजी लेक्जाको उक्त भनाइबारे रोयल मोरक्कन फुटबल फेडेरेसनसँग प्रतिक्रिया मागिए पनि संघले जवाफ दिएन ।

यसैबीच, २०३० विश्वकपका लागि मोरक्कोले प्रस्ताव गरेको १ लाख १५ हजार दर्शक क्षमताको रंगशाला निर्माणको काम मे महिनासम्म करिब ३० प्रतिशत पूरा भएको थियो । परियोजनामा संलग्न अधिकारीहरूले रंगशाला निर्माण सन् २०२७ को अन्त्यसम्ममा पूरा गर्ने लक्ष्य राखेका छन् । यसअघि २०२६ को विश्वकपको फाइनल अमेरिकाको न्यु जर्सीमा आयोजना गर्ने निर्णय सन् २०२२ को जुलाईमा भएको थियो । तर फिफाले यसको औपचारिक घोषणा सन् २०२४ को फेब्रुअरीमा मात्र गरेको थियो ।