‘लगानीको वातावरण बिग्रन दिनुहुँदैन’

काठमाडौं (संवाददाता) - नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानीको वातावरण बिग्रन नदिने बताएका छन् । उनले त्यसका लागि सबै सरोकारवालाहरूलाई गम्भीर हुन पनि आग्रह गरेका छन् ।

जेनजी आन्दोलनको क्रममा निजी उद्योग व्यवसायमा भएको तोडफोड र आगजनीबाट नेपालमा लगानी गर्न जोखिम रहेको सन्देश गइरहेको उल्लेख गर्दै त्यसो हुन नदिन आफूहरू सजग रहेको ढकालले बताएका हुन् । 

आगजनी तथा तोडफोड भएको बहुराष्ट्रिय कम्पनी एनसेल, चौधरी ग्रुपको सिजी पार्क र चन्द्रागिरि हिल्सको निरीक्षण गर्दै उनले यस्ता घटनाले लगानीको वातावरण बिग्रने अवस्था आएको भन्दै सरोकारवाला सबैलाई गम्भीर हुन आग्रह गरेका हुन् ।

उनले जेएनजी समूको आन्दोलनका क्रममा भएको घुसपैठबाट देशैभरि निजी क्षेत्रका ठूला, मझौला तथा साना उद्योगहरू तथा व्यीक्तको निजी सम्पत्तिमाथि भएको आगजनी र तोडफोड भएको र यसले दैनिक उत्पादन र रोजगारीमा असर परेको बताए ।

नेपालमा विदेशी तथा स्वदेशी लगानी आकर्षित गर्नका लागि यस्ता घटनाहरूले दीर्घकालीन असर पार्ने अध्यक्ष ढकालले बताए । ‘नेपालमा लगानीको वातावरण बिग्रिने अवस्था आएको छ । यस्ता घटनाहरूले देशको आर्थिक विकासमा गम्भीर असर पार्छ । सरकार, राजनीतिक दलहरू र सरोकारवालाहरूलाई लगानीमैत्री वातावरण कायम गर्न आग्रह गर्दछु’, ढकालले भने ।

उनले नेपालका वैदेशिक लगानी भित्र्याउन तथा आन्तरिक लगानी प्रर्वद्धन गर्न महासंघले निरन्तर पहल गरे पनि यस्ता घटनाले राष्ट्रिय तथा अन्तर्राष्ट्रिय दुवै क्षेत्रमा नकारात्मक सन्देश जाने धारणा राखे ।

नेपालको अर्थतन्त्रमा ८१ प्रतिशत र रोजगारीमा निजी क्षेत्रले ८६ प्रतिशत भन्दा बढी योगदान दिएको अवस्थामा लगानीको संरक्षणका लागि उद्योगी व्यवसायीहरूको शान्ति र सुरक्षाको प्रत्याभूति दिलाउनुपर्नेमा उनले जोड दिए । उनले यो घटनाले सरकारको राजस्वसमेत गुम्ने अवस्था आएको बताए ।

महासंघबाट अध्यक्ष ढकालसहित उपाध्यक्षद्वय हेमराज ढकाल र ज्योत्स्ना श्रेष्ठ कोषाध्यक्ष भरतराज आचार्य र केन्द्रीय सदस्यहरू सैलेन्द्र गुरागाईं, डा.रामशरण थपलिया, पशुपतिदेव पाण्डे र कमला श्रेष्ठलगायतले क्षतिग्रस्त संरचनाहरूको निरीक्षण गर्दै आगजनीबाट भएको क्षतिबारे जानकारी लिएका थिए ।

महासंघले यस अघि अर्थमन्त्री तथा गृहमन्त्रीसंग भेट गरेर निजी क्षेत्रले अझै पनि शान्ति सुरक्षाको अनुभूति गर्न नसकिरहेकोले सो को प्रत्याभूति दिन, आन्दोलनका क्रममा निजी क्षेत्रको सम्पत्तिमाथि भएको आक्रमण, तोडफोड र आगजनीमा संलग्नहरूमाथि कानूनी दायरामा ल्याउन आग्रह गरेको थियो ।

महासंघले निजी क्षेत्रको संरक्षण, सुरक्षाको प्रत्याभूति र लगानीमैत्री वातावरण सुनिश्चित गर्न सरोकारवाला सबै पक्षलाई आग्रह गर्दै आएको छ ।