मेस्सीको १०१औं खेल बराबरीमा

लियोनल मेसीले इन्टर मियामीका लागि आफ्नो १०१औं गोल गरे पनि एन्डर्स ड्रेयरले दुई गोल गरेपछि आइतबार राति इन्टर मियामी र सान डीएगो एफसीले २–२ गोलको बराबरी खेलेका छन् ।
एमएलएस खेलमा इन्टर मियामीको यो लगातार चौथो बराबरी हो ।
ड्रेयरले १२औं मिनेटमा सान डिएगोलाई १–० को अग्रता दिलाए । जेप्पे ट्वेर्सकोभले दिएको थ्रु बलमा अगाडि बढेका उनले गोलरक्षक डेयन सेन्ट–क्लेयरलाई छक्याउँदै बललाई गोलपोस्टभित्र चिप गरेका थिए ।
२४औं मिनेटमा मेसीले मियामीलाई बराबरीमा ल्याए । यो सिजन लिगमा उनको २०औं गोल थियो । मैदानको दायाँ भागबाट उनले प्रहार गरेको फ्रिकिकलाई कसैले छोएन र बल टाढाको पोस्टतर्फको जालीमा पुग्यो । चार दिनअघि मात्रै मेसीले मेक्सिकोको क्लब क्रुज अजुलविरुद्ध क्याम्पियोनेस कपमा २–० को जित निकाल्दा इन्टर मियामीका लागि आफ्नो १००औं गोल पूरा गरेका थिए ।
७४औं मिनेटमा लुइस सुवारेजले मियामीलाई २–१ को अग्रता दिलाए। तर त्यसको आठ मिनेटपछि नै ड्रेयरले रातको आफ्नो दोस्रो गोल गर्दै सान डिएगोलाई पुनः बराबरीमा ल्याए ।
बराबरीपछि मियामीको कीर्तिमान १२ जित, ४ हार र १० बराबरी भएको छ भने उसको ४६ अंक पुगेको छ । यसअघि आइतबार फिफाले २०२७ फिफा महिला च्याम्पियन्स कपको अन्तिम चरण जनवरीमा इन्टर मियामीको घरेलु मैदान नु स्टेडियममा आयोजना हुने घोषणा गरेको थियो । खेलको मध्याह्न विश्रामका क्रममा फिफाकी प्रमुख फुटबल अधिकृत जिल एलिसले प्रतियोगिता मियामीमा ल्याउने विषयमा बोलिन् ।
‘हामीले यो सहरले फुटबललाई कति माया गर्छ भन्ने देखेका छौं । यसै गर्मीयाममा विश्वकपका क्रममा पनि हामीले त्यो देख्यौं,’ एलिसले भनिन्, ‘अब मियामीमा एउटा ठूलो महिला फुटबल प्रतियोगिता ल्याउने समय आएको छ । यो निकै रोमाञ्चक कुरा हो ।’