दगाम गन्तव्य गाउँ सिफारिसले चर्चामा

पोखरा । गण्डकीका होमस्टेहरूका यतिबेला दगाम गाउँ चर्चामा छ । तनहुँको शुक्लागण्डकी–२ मा पर्ने यो गाउँलाई गाउँ पर्यटन प्रवर्धन मञ्च नेपाल (भिटोफ) गण्डकीले यस वर्ष ‘गन्तव्य गाउँ’का रूपमा सिफारिस गरेपछि चर्चा पाएको हो । पाहुनाका लागि दगाम दृश्यावलोकनमा मात्र सीमित छैन; मगर समुदायको मौलिक जीवनशैली, खानपान र आतिथ्यले आकर्षित गर्न थालेको छ । 
भिटोफले हरेक वर्ष तीन गाउँलाई गन्तव्यका रूपमा सिफारिस गर्दै आएको छ । ‘हरेक गाउँ पर्यटकीय ठाउँ’ नारासहित गाउँ पर्यटन प्रवर्धनमा लागेको भिटोफका अध्यक्ष रमेश अर्यालले बताए । उनका अनुसार पहाडी भूगोल र हिमाली पदयात्राको प्रवेशद्वार भएकाले गण्डकीमा गाउँ पर्यटनको सम्भावना उच्च छ । दगाममा २३ घर छन् । तीमध्ये २० घर मगर र तीन घर गुरुङ समुदायका छन् । मगर समुदायको मौलिक भेषभुषा, नाचगान, संस्कृति र खानपान गाउँको मुख्य आकर्षण हुन् ।
२०६५ सालमा सिरुबारी गाउँ अवलोकन गरेपछि स्थानीयले दगाम सामुदायिक होमस्टे सुरु गरेका थिए । होमस्टे संयोजक नन्द थापाका अनुसार पोखरासहित भैरहवा, बुटवल, नारायणगढ र काठमाडौंबाट पर्यटक आउन थालेका छन् । दगामबाट धौलागिरिदेखि गणेश हिमालसम्मका हिमशृंखला देखिन्छन् । पर्यटकलाई कोदो, मकै, पिँडालु, सिस्नु र स्थानीय महबाट तयार परिकार खुवाइन्छ । शुक्लागण्डकीका मेयर कृष्णराज पण्डितले होमस्टेलाई नगरपालिकाले प्राथमिकतामा राखेको बताए । सरसफाइ, सुरक्षा र इन्टरनेट सुविधा विस्तारसँगै पोखराबाट पर्यटक ल्याउने प्रयास भइरहेको उनले जानकारी दिए ।
विश्व पर्यटन दिवसका अवसरमा भिटोफ गण्डकीले यही साता सोमबार र मंगलबार दगाममा घरबास प्रवर्धन कार्यक्रमसमेत गरेको थियो ।