दशौं राष्ट्रिय खेलकुद र पर्यटन दशकबारे व्यवसायीसँग छलफल

कर्णाली प्रदेशका मुख्यमन्त्री मंगलबहादुर शाहीले दशौं राष्ट्रिय खेलकुद प्रतियोगितासँग सम्बन्धित भएर पर्यटन प्रवर्धनका विषयमा पर्यटन दशकबारे होटल व्यवसायीसँग छलफल गरेका छन् ।
    उनले शुक्रबार आफ्नै कार्यकक्षमा होटल व्यवसायी संघ कर्णाली प्रदेश समितिका पदाधिकारीसँग आगामी मङ्सिर १६ देखि २९ गतेसम्म कर्णालीमा आयोजना हुने  दशौं राष्ट्रिय खेलकुद प्रतियोगितालाई प्रदेशको आर्थिक विकास र पर्यटन क्षेत्र प्रवर्धनसँग जोड्नुपर्ने बताएका छन् ।
    खेलकुदसँगै स्वास्थ्य र पर्यटन प्रवर्धन गरी प्रदेशमा आर्थिक गतिविधि चलायमान बनाउनका लागि होटल व्यवसायीको सक्रियता जरुरी रहेको मुख्यमन्त्री शाहीले बताए । कर्णाली प्रदेशमा पर्यटक भिœयाउन र पर्यटन दशक मनाउने सम्बन्धमा गर्न सकिने कामहरूका बारेमा उनले होटल व्यवसायीसँग जिज्ञासा राख्नुका साथै सुझावसमेत मागेका थिए ।
    सुर्खेतमा हुन लागेको दशौं राष्ट्रिय खेलकुदको समयमा यहाँका होटलहरूले गर्नुपर्ने व्यवस्थापनका सम्बन्धमा मुख्यमन्त्री शाहीले होटल व्यवसायी संघका प्रतिनिधिसँग छलफल गरेका थिए ।
    छलफलमा होटल व्यवसायी संघ कर्णाली प्रदेशका अध्यक्ष तर्कबहादुर शाहीले पर्यटन दशकको तयारी गर्नुअघि पर्यटकीय क्षेत्रहरूसम्म जाने बाटोको सहजता हुनुपर्ने र त्यहाँ नजिकै रहेका जग्गा उपलब्ध गराएर होटल क्षेत्रमासमेत लगानी भिœयाउन सकिने बताए ।
    होटल व्यवसायी संघ सुर्खेतका अध्यक्ष प्रतिभा वलीले कर्णालीमा सञ्चालित होटलहरूको वर्गीकरण गर्न र पर्यटक बोक्ने गाडीको नम्बर प्लेट दिने विषयमा पहल सरकारलाई गरिदिन आग्रह गरे । कर्णालीमा पर्यटन क्षेत्रको विकासका लागि निजी क्षेत्रसँग सहकार्य गरेर अगाडि बढ्न तयार रहेको मुख्यमन्त्री शाहीले बताए ।