कांग्रेसको १५औँ महाधिवेशन: केन्द्रीय सदस्यमा भरतराज ढकालको उम्मेदवारी

काठमाडौँ । नेपाली कांग्रेसका नेता तथा व्यावसायिक व्यक्तित्व भरत राज ढकालले पार्टीको ऐतिहासिक १५औँ महाधिवेशनमा केन्द्रीय सदस्य पदमा आफ्नो उम्मेदवारी घोषणा गरेका छन् । उनले 'पेसागत विषयगत क्षेत्र (खुला)' विधाबाट केन्द्रीय कार्यसमिति सदस्यका लागि दाबी प्रस्तुत गरेका हुन् ।

"विचारमा स्पष्टता, नेतृत्वमा क्षमता, संगठनमा एकता, काममा इमानदारी" भन्ने मूल संकल्पका साथ ढकाल चुनावी मैदानमा उत्रिएका छन्। उम्मेदवारी सार्वजनिक गर्दै उनले बदलिँदो समय, जनअपेक्षा र नयाँ पुस्ताको आकांक्षालाई सम्बोधन गर्न कांग्रेसलाई अझ बढी जनमुखी, गतिशील र परिणाममुखी बनाउनु आजको आवश्यकता रहेको औंल्याएका छन् ।

लामो समयदेखि वित्तीय तथा कृषि क्षेत्रमा आबद्ध रहँदै आएका ढकालले आफ्नो व्यावसायिक अनुभवलाई अब पार्टीको नीति निर्माण तहमा उपयोग गर्ने प्रतिबद्धता व्यक्त गरेका छन् । अर्थतन्त्र, कृषि, उत्पादन, उद्यमशीलता र रोजगारीका क्षेत्रमा हासिल गरेको व्यावहारिक ज्ञानलाई राजनीतिक दृष्टिकोणसँग जोड्दै आम नागरिकको जीवनस्तर उकास्ने नीति बनाउनु आफ्नो मुख्य उद्देश्य रहेको उनले बताएका छन् ।

राजनीतिलाई पद र प्रतिष्ठाको विषय मात्र नभई जनताको जीवनमा देखिने परिणाममुखी परिवर्तनको जिम्मेवारीका रूपमा बुझ्नुपर्नेमा ढकालले जोड दिएका छन्। व्यक्तिगत आकांक्षाभन्दा माथि उठेर आफ्नो अनुभव, विचार र जिम्मेवारीलाई पार्टीको नीति निर्माणसँग जोड्नका लागि उनले महाधिवेशन प्रतिनिधिहरूसमक्ष अमूल्य मतको अपिल समेत गरेका छन् ।

नेपाली कांग्रेसको यो महाधिवेशनले पार्टीको आगामी दिशा, नीति र राजनीतिक यात्रालाई थप स्पष्ट र सुदृढ बनाउने विश्वास लिइएको छ ।