ओमानमाथि नेपालको शानदार जित, लगातार दोस्रो खेलमा विजय

आईसीसी क्रिकेट विश्वकप लिग–२ अन्तर्गत ओमानमा जारी त्रिकोणात्मक एकदिवसीय शृङ्खलामा नेपालले लगातार दोस्रो जित निकालेको छ । मंगलबार घरेलु टोली ओमानलाई ११३ रनको फराकिलो अन्तरले पराजित गर्दै नेपालले आफ्नो विजयी यात्रालाई निरन्तरता दिएको हो । यसअघि शृंखलाको पहिलो खेलमा नेपालले क्यानडालाई २४ रनले हराएको थियो ।
ओमानको अल अमेरतस्थित क्रिकेट ग्राउन्ड मिनिस्ट्री टर्फ–१ मा भएको खेलमा नेपालले प्रस्तुत गरेको २६४ रनको लक्ष्य पछ्याएको घरेलु टोली ४० ओभरमा १५० रनमै समेटियो । नेपालका ब्याटरले सामूहिक रूपमा उत्कृष्ट प्रदर्शन गर्दा बलिङतर्फ कप्तान सन्दीप लामिछाने र नन्दन यादवले समान तीन विकेट लिए । ओमानका कप्तान विनायक शुक्लाले एक्लै ७७ रनको योगदान दिए पनि टोलीलाई हारबाट जोगाउन सकेनन् ।
टस जितेर पहिले ब्याटिङ रोजेको नेपालले निर्धारित ५० ओभरमा आठ विकेट गुमाउँदै २६३ रनको प्रतिस्पर्धात्मक योगफल तयार पारेको थियो । नेपालका पूर्वकप्तान रोहितकुमार पौडेलले सर्वाधिक ६१ रन बनाए । उनले ६७ बलको सामना गर्दै तीन चौका र एक छक्का प्रहार गरे । नेपालको पारीलाई बलियो बनाउन अन्य मध्यक्रमका ब्याटरले पनि महŒवपूर्ण योगदान दिएका थिए ।
करण केसीले अन्तिमतिर आक्रामक ब्याटिङ गर्दै नेपालको योगफल बढाउन उल्लेखनीय भूमिका निर्वाह गरे । उनले केवल १६ बलमा चार छक्का र एक चौकाको मद्दतमा ४० रन बनाए । उनको तीव्र गतिको ब्याटिङले नेपाललाई २६० रनको आँकडा पार गर्न सहयोग पु¥यायो ।
त्यस्तै, अर्जुन कुमालले ४० रन बनाउँदा ईशान पाण्डे र बसिर अहमदले समान ३७ रन जोडे । दीपेन्द्रसिंह ऐरीले २२ तथा सन्दीप जोराले १० रनको योगदान दिए । नेपालका विभिन्न ब्याटरले रन जोड्दा ओमानले कुनै एक ब्याटरलाई सस्तैमा आउट गर्दै खेल आफ्नो नियन्त्रणमा राख्न सकेन ।
ओमानका तर्फबाट साह फैसल, शाकिल अहमद र करण सोनावालेले समान दुई विकेट हात पारे । यद्यपि, नेपाली ब्याटरलाई ठूलो योगफल बनाउनबाट रोक्ने घरेलु टोलीको प्रयास सफल भएन ।
२६४ रनको लक्ष्यसहित जवाफी ब्याटिङमा उत्रिएको ओमानले सुरुदेखि नै नेपाली बलरको चुनौती सामना गर्नुप¥यो । कप्तान विनायक शुक्लाले एक छेउबाट पारी सम्हाल्ने प्रयास गरे पनि अन्य ब्याटरले उनलाई पर्याप्त साथ दिन सकेनन् । शुक्लाले ८३ बलमा छ चौका र एक छक्कासहित ७७ रन बनाए । उनी ओमानका सर्वाधिक रन बनाउने खेलाडी बने ।
ओमानका जय ओडेराले २५ तथा जतिन्दर सिंहले १८ रन जोडे । यी तीन खेलाडीबाहेक अन्य कुनै पनि ब्याटरले दोहोरो अङ्कमा रन बनाउन सकेनन् । नेपाली बलरले नियमित अन्तरालमा विकेट लिँदै ओमानलाई लक्ष्यसम्म पुग्न दिएनन् ।
बलिङमा नेपालका कप्तान सन्दीप लामिछाने र नन्दन यादवले समान तीन विकेट लिए । उनीहरूको प्रभावशाली प्रदर्शनमा दीपेन्द्रसिंह ऐरीले दुई विकेट थपे । करण केसी र ललित राजवंशीले पनि समान एक विकेट हात पारे । यसरी ओमानका सबै १० विकेट नेपाली बलरले आपसमा बाँडे ।
यसअघि क्यानडाविरुद्धको खेलमा नेपालले दिएको २३६ रनको लक्ष्य पछ्याएको क्यानडा ४८.४ ओभरमा २११ रनमा समेटिएको थियो । उक्त खेल २४ रनले जितेको नेपालले ओमानविरुद्ध ब्याटिङ र बलिङ दुवैमा प्रभावशाली प्रदर्शन गर्दै जितको अन्तर अझ फराकिलो बनाएको हो ।
लगातार दुई जितसँगै नेपालले जारी शृंखलामा आफ्नो प्रदर्शनलाई बलियो बनाएको छ । नेपालले अब शृंखलाको आगामी खेल शनिबार क्यानडासँग खेल्नेछ । पहिलो भेटमा क्यानडालाई पराजित गरिसकेको नेपाल दोस्रो भेटमा पनि जित निकाल्दै विजयी क्रमलाई निरन्तरता दिने लक्ष्यमा हुनेछ ।