सस्तियो कुखुराको मासु, तयारी मासु अब ३८५ मै

काठमाडौं  । दसैं सकिएलगत्तै काठमाडौंमा कुखुराको मासुको मूल्य घटेको छ । राष्ट्रिय कुखुरा बिक्री व्यवसायी संघले सोमबारदेखि लागू हुने गरी जिउँदो कुखुरा र तयारी मासु दुवैको मूल्य घटाएको हो ।

संघले जिउँदो कुखुराको मूल्य प्रतिकिलो १० रुपैयाँ र तयारी मासुको मूल्य प्रतिकिलो १५ रुपैयाँ घटाएको जनाएको छ । नयाँ मूल्यअनुसार अब जिउँदो कुखुरा प्रतिकिलो २८० रुपैयाँ र तयारी मासु ३८५ रुपैयाँमा बिक्री हुनेछ ।
यसअघि जिउँदो कुखुराको मूल्य प्रतिकिलो २९० रुपैयाँ र तयारी मासुको मूल्य ४०० रुपैयाँ थियो । नयाँ मूल्य लागू भएसँगै उपभोक्ताले तयारी मासु खरिद गर्दा प्रतिकिलो १५ रुपैयाँ कम तिर्नुपर्नेछ ।
संघका अनुसार दसैंपछि बजारमा कुखुराको मासुको खपत घटेकाले मूल्य समायोजन गरिएको हो । दसैंका बेला कुखुराको तुलनामा खसीबोकाको मासुको खपत बढी हुने गर्छ । त्यसको प्रभाव कुखुराको मासुको मागमा पर्दा मूल्य घटाउनुपरेको व्यवसायीको भनाइ छ ।
त्यस्तै, दसैं मनाउन काठमाडौं उपत्यकाबाट बाहिरिएका अधिकांश मानिस अझै फर्किनसकेकाले पनि बजारमा मासुको माग घटेको छ । उपत्यकामा उपभोक्ताको उपस्थिति कम हुँदा कुखुराको मासुको बिक्री प्रभावित भएको व्यवसायीले बताएका छन् ।
चाडपर्वका बेला मासुको खपत र मागमा हुने परिवर्तनले बजार मूल्यमा समेत प्रभाव पार्ने गरेको छ । दसैंअघि बढेको मासुको माग चाडपर्व सकिएसँगै घट्दा कुखुराको मूल्यमा गिरावट आएको हो ।

व्यवसायीका अनुसार उपत्यकामा मानिसहरूको चहलपहल बढ्दै जाँदा मासुको माग र खपतमा पनि सुधार आउन सक्छ । तर, तत्कालका लागि मागमा आएको कमीका कारण कुखुराको मासुको मूल्य घटाइएको संघले जनाएको छ ।